༢༠༡༢ ཟླ་ ༡༠ ཚེས་ ༢༠ རེས་གཟའ་སྤེན་པ།

༄༅། །ཕྱ་ལོ་ ༢༠༡༢ ཟླ་ ༡༠ ཚེས་ ༡༩ རེས་གཟའ་པ་སངས་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཌན་བུ་རིའི་མངའ་སྡེའི་ཌན་བུ་རི་གྲོང་ཁྱེར་དུ་རྟེན་གཞི་བྱས་པའི་ནུབ་ཕྱོགས་ཀེ་ན་ཊི་ཀ་ཊི་གཙུག་ལག་སློབ་གཉེར་ཁང་གི་(Western Connecticut State University) ཨོ་ནེལ་ཚོགས་ཁང་ (O’Neill Center) དུ་ཞོགས་ཟས་ཀྱི་མཛད་སྒོར་ཆིབས་སྒྱུར་བསྐྱངས་ཏེ་གཙུག་ལག་སློབ་གྲྭའི་འགན་འཛིན་ལས་བྱེད་རྣམས་དང་། མཛད་སྒོ་གོ་སྒྲིག་གནང་མཁན་གྱི་འབྲེལ་ཡོད་ལས་བྱེད་བཅས་དང་ལྷན་ཞོགས་ཟས་རྒྱས་བཞེས་མཛད། སྐབས་དེར་མགོན་པོ་གང་ཉིད་མཆོག་གི་སྐུ་ཚེའི་ནང་འགྲོ་བ་མིའི་བཟང་སྤྱོད་ཀྱི་རིན་ཐང་དང། ཆོས་ལུགས་མཐུན་སྒྲིལ་གོང་མཐོར་གཏོང་གནང་མཛད་རྒྱུའི་མཛད་འགན་གཙོ་བོ་རྣམས་ངོ་སྤྲོད་མཛད་དོན། ཆོས་ལུགས་ཚང་མས་བྱམས་པ་དང་བརྩེ་བའི་བསླབ་བྱ་གསུངས་ཡོད་པ་གཅིག་མཚུངས་ཆགས་ཡོད། དེར་བརྟེན་རྒྱ་གར་ལྟ་བུ་ཆོས་ལུགས་འདྲ་མིན་འཆམ་མཐུན་ངང་མཉམ་གནས་ཐུབ་པ་ཞིག་ཡོང་ཐུབ་ངེས་ཡིན། ཞེས་སོགས་ཀྱི་བཀའ་སློབ་སྩལ་ཡོད།

དེ་ནས་ཚོགས་ཁང་གཞན་ཞིག་ནང་ཆིབས་སྒྱུར་བསྐྱངས་ཏེ་མང་ཚོགས་ ༣༥༠༠ བརྒལ་བ་ཚང་འཛོམས་ཐོག་ཞབས་སྟེགས་སྟེང་༸ཞབས་སོར་འཁོད་མཚམས་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆ་ཌི་གེར་ (Richard Gere )ལགས་ཀྱིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་མང་ཚོགས་རྣམས་ལ་ངོ་སྤྲོད་ཞུས་ཡོད། དེ་ནས་གཙུག་ལག་སློབ་གྲྭའི་གཙོ་འཛིན་སྐུ་ཞབས་ཇེམ་སི་ཤུ་མོ་ཊར་ (James Schmotter) མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་བྱམས་བརྩེ་དང་འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་འགྲོ་བ་མིའི་བཟང་པོ་རིན་ཐང་གོང་མཐོར་གཏོང་གནང་མཛད་པའི་མཛད་རྗེས་ལ་ངོས་འཛིན་ཞུ་ཆེད། གཙུག་ལག་སློབ་གྲྭའི་མཁས་དབང་གི་ཕྱག་འཁྱེར་ (honorary doctorate in liberal humanities) ཞེས་པ་འདི་འབུལ་ལམ་ཞུས་ཡོད། སྐབས་དེར་༸གོང་ས་མཆོག་གིས་ཕྱག་འཁྱེར་འབུལ་བཞེས་མཛད་པ་དང་སྦྲགས་བཀའ་སློབ་སྩལ་དོན། ངོས་ཀྱིས་འདི་གར་སློབ་སྦྱོང་གང་ཡང་མ་བྱས་པར་གཙུག་ལག་སློབ་གྲྭས་ངོས་ལ་མཁས་པའི་ཕྱག་འཁྱེར་འདི་འདྲ་ཞིག་གནང་བར་ཡི་རང་ཞུ་རྒྱུ་ཡིན། ངོས་ལ་མཁས་པའི་ཕྱག་འཁྱེར་འདི་འདྲ་ཐོག་མར་ཕྱི་ལོ་ ༡༩༥༦ ལོར་རྒྱ་གར་བྱང་ཕྱོགས་སུ་རྟེན་གཞི་བྱས་པའི་གནས་མཆོག་ཝ་ར་ཎ་སིའི་གྲོང་ཁྱེར་གྱི་ལེགས་སྦྱར་གཙུག་ལག་སློབ་གྲྭས་(Sanskrit University in Varanasi) གནང་བ་རེད། ཅེས་བཀའ་སྩལ།

དེ་རྗེས་མི་ཚེ་དོན་དང་ལྡན་པ་ཞིག་ཇི་ལྟར་བསྐྱལ་དགོས་སྐོར་བཀའ་སློབ་སྩལ་དོན། ངོས་ཀྱི་རྒྱུན་དུ་རང་གི་གྲོགས་པོ་ཚོར་དངུལ་དང་དཔལ་འབྱོར་རྐྱང་པས་མི་ཚེ་བདེ་སྐྱིད་ལྡན་པ་ཞིག་བཟོ་ཐུབ་རྒྱུའི་རེ་བ་འཆང་རྒྱུ་མེད། ཅེས་བརྗོད་བཞིན་ཡོད། འབྱོར་ལྡན་ཤེས་ཡོན་ཅན་མང་པོ་ཞིག་ཕྱི་དངོས་པོའི་མཐུན་རྐྱེན་ཆ་ཚང་ལྡན་ཡང་སེམས་ནང་ཞི་བདེ་མེད་མཁན་དེ་འདྲ་མང་པོ་ཡོད་པ་ངོས་ཀྱིས་ཤེས་ཀྱི་ཡོད། མི་ཚེ་བདེ་སྐྱིད་ལྡན་པ་ཞིག་ཡོང་བར་དེང་དུས་ཤེས་ཡོན་གྱི་ལམ་ལུགས་ནང་འགྲོ་བ་མིའི་ནང་གི་བཟང་སྤྱོད་དང་འབྲེལ་བའི་རིན་ཐང་ཐོག་སློབ་སྦྱོང་སྤྲད་དེ་ཤེས་ཡོན་ལམ་ལུགས་ཆ་ཚང་བ་ཞིག་བཟོ་ཐབས་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། སེམས་ནང་གི་ཞི་བདེ་བརྗོད་སྐབས་རང་གི་ཉེ་འཁོར་དུ་གནས་ཚུལ་ཇི་འདྲ་ཞིག་བྱུང་ཡང་། རང་ཉིད་ཀྱི་སེམས་ཞི་བདེ་བག་ཕེབས་ངང་གནས་ཐུབ་པ་ཞིག་དགོས་རྒྱུ་དེ་ཡིན། སེམས་ནང་ཞི་བདེ་ལྷིང་འཇགས་ཡོང་བར་བློའི་གདེང་ཚོད་དང་སེམས་མ་འཁྲུག་པ་དགོས། དེ་ལྟར་མེད་ན་ལམ་སེང་ཡིད་ཆེས་མེད་པ་དང་འཇིགས་སྣང་ཡོང་རྒྱུ་མ་ཟད། སེམས་རང་བཞིན་གྱིས་འཁྲུག་འགྲོ་གི་རེད། དེ་དག་གི་གཉེན་པོ་མཆོག་ཏུ་གྱུར་བ་ནི་གཞན་གྱི་བདེ་དོན་ལ་སེམས་ཁུར་བྱ་རྒྱུ་དེ་ཁོ་ན་ཡིན། ང་ཚོས་ཉིན་ལྟར་ཀུན་སློང་དེ་འདྲ་ཞིག་གོམས་འདྲིས་བསྟེན་ཐབས་བྱེད་དགོས། ཞེས་སོགས་ཀྱི་བཀའ་སློབ་སྩལ་ཡོད།
ཉིན་གུང་ལྗགས་སྨིན་མཛད་རྗེས། ཁུལ་དེ་ནས་ཨ་རིའི་གྲོང་ཁྱེར་ནིའུ་ཡོཀ་ཏུ་( New York City) ཆིབས་སྒྱུར་བསྐྱངས། ཁུལ་དེར་རྟེན་གཞི་བྱས་པའི་ཧན་ཊར་གཙུག་ལག་སློབ་གྲྭར་༸ཞབས་སོར་འཁོད་མཚམས། གཙུག་ལག་སློབ་གྲྭའི་གཙོ་འཛིན་སྐུ་ཞབས་ཇེ་ནི་ཕར་ཇེ་རཱབ་ (Jennifer J Raab) མཆོག་གིས་ཕེབས་བསུ་གཟབ་རྒྱས་ཞུས་པ་དང་སྦྲགས། གཙུག་ལག་སློབ་གྲྭའི་ཀ་ཡེ་འཁྲབ་སྟོན་ཚོགས་ཁང་ཆེན་མོར་( Kaye Playhouse) གདན་འདྲེན་ཞུས་ཏེ་བགྲོ་གླེང་ལྷན་ཚོགས་སུ་ལྷན་ཞུགས་མཛད། སྐབས་དེར་སྲིད་དོན་ཚན་རིག་པའི་གཙུག་ལག་སློབ་དཔོན་སྐུ་ཞབས་མིང་ཤི་ཡ་ (Ming Xia)ལགས་དང་། སྤྱི་ཚོགས་ཚན་རིག་གི་གཙུག་ལག་སློབ་དཔོན་སྐུ་ཞབས་ཧོ་ཕུང་ཧུང་ (Ho-Fung Hung) ལགས་བཅས་དང་ལྷན་བགྲོ་གླེང་མཛད་ཡོད།

དེ་ཡང་ཚོགས་ཁང་ནང་རྒྱ་རིགས་སློབ་ཕྲུག་དང་སྒྱུ་རྩལ་བ། ཤེས་ལྡན་མི་སྣ། དེ་བཞིན་རིག་གནས་འདྲ་མིན་ཐོག་ཆེད་ལས་མི་སྣ་བཅས་ཁྱོན་མི་གྲངས་ ༦༠༠ བརྒལ་བར་༸གོང་ས་མཆོག་གིས་བཀའ་སློབ་སྩལ་དོན། ཆོས་གྲོགས་ཕོ་མོ་ཚོ་དང། ལྷག་པར་རྒྱ་རིགས་ཆོས་གྲོགས་ཕོ་མོ་རྣམ་པར། ཁྱེད་རྣམ་དང་ཐུག་འཕྲད་བྱུང་བར་ངོས་རང་ཧ་ཅང་དགའ་པོ་བྱུང། དེ་སྔ་ངོས་རང་ཁུལ་འདིར་འབྱོར་སྐབས་བོད་མིའི་ཆབ་སྲིད་ཀྱི་འགན་དབང་ཡོད། ད་ཆ་ངོས་ཀྱིས་བོད་མིའི་ཆབ་སྲིད་ཀྱི་འགན་དབང་ནས་དགོངས་པ་ཆ་ཚང་ཞུས་ཟིན། འོན་ཀྱང་ཏཱ་ལའི་བླ་མའི་གོ་གནས་ནས་དགོངས་པ་ཞུ་ཐབས་མེད། ཅེས་ཞལ་ཤོབ་མཛད་རྗེས་མུ་མཐུད་བཀའ་སློབ་སྩལ་དོན། ངོས་རང་འཛམ་གླིང་ནང་འགྲོ་བ་མི་ཐེར་འབུམ་བདུན་ཡོད་པའི་ཆ་ཤས་ཤིག་ཡིན། འགྲོ་བ་མི་སུས་ཀྱང་དཀའ་ངལ་འདོད་ཀྱི་མེད། ང་ཚོ་ཚང་མས་མི་ཚེ་ཞི་བདེ་ལྡན་པ་ཞིག་འདོད་ཀྱི་ཡོད། ངོས་ཀྱིས་མི་ཚེ་བདེ་སྐྱིད་ལྡན་པ་ཞིག་འདོད་པ་བཞིན་ཁྱེད་ཚོས་ཀྱང་དེ་མཚུངས་འདོད་ཀྱི་ཡོད། གཞན་གྱི་བདེ་དོན་ཆེད་ཇི་ཙམ་བསམ་བློ་མང་བ་བཏང་བ་དེས་ཚོད་ཀྱིས་རང་གི་སེམས་ནང་སྙིང་སྟོབས་འཕེལ་རྒྱུ་ཡིན།

ང་ཚོའི་སེམས་ནང་དོགས་པ་རྣམ་རྟོག་དང་ཕྲག་དོག ཁོང་ཁྲོ། འཇིགས་སྣང་སོགས་ཡང་ཡང་ཡོང་བཞིན་ཡོད། འོན་ཀྱང་ང་ཚོས་དུས་ནམ་ཞིག་གང་ཟག་ཕ་རོལ་པོ་རང་གི་ཆོས་གྲོགས་ཕོ་མོ་ཡིན་བསམ་པའི་འདུ་ཤེས་རྣལ་མ་ཞིག་བསྐྱེད་ཚེ་ང་ཚོའི་སེམས་ནང་སྙིང་སྟོབས་རང་བཞིན་གྱིས་ཆེ་རུ་འགྲོ་གི་རེད། རང་ཉིད་ཀྱིས་གཞན་ལ་ཇི་ཙམ་དྲང་པོ་དང་ཕྱི་གསལ་ནང་གསལ་བྱས་པ་དེས་ཚོད་ཀྱིས་གཞན་དང་སེམས་ཐག་ཉེ་བ་དང་ཕན་ཚུན་ཡིད་ཆེས་ཆེ་རུ་ཕྱིན་པའི་ཐོག་ནས་འཆམ་མཐུན་གྱི་སྤྱི་ཚོགས་ཤིག་བསྐྲུན་ཐུབ། བོད་རྒྱ་གཉིས་ཁྱིམ་མཚེས་ཡིན་པར་བརྟེན། བྱུང་རབས་ལོ་རྒྱུས་ཐོག་ཡུན་རིང་ནས་འབྲེལ་བ་ཉེ་པོ་ཡོད། བོད་མི་ཚོ་ཡར་རྒྱས་འགྲོ་རྒྱུར་རྒྱ་ནག་མི་མང་གིས་ཕན་ཐོགས་བྱེད་ཐུབ་པ་བཞིན་རྒྱ༌ནག་མི་མང་ཚོ་ལའང་རོགས་པ་དགོས་ཀྱི་ཡོད། བོད་མི་ཚོར་ནང་ཆོས་དང་འབྲེལ་བའི་རིག་གཞུང་ཧ་ཅང་ཕྱུག་པོ་ཡོད། བོད་ལ་ནང་ཆོས་ཐོག་མར་དར་འཕེལ་མཛད་མཁན་མཁན་ཆེན་ཞི་བ་འཚོ་( Shantarakshita )རང་ཉིད་ཀྱང་མཁས་པ་ཕུལ་དུ་ཕྱིན་པ་ཞིག་ཡིན། དེར་བརྟེན་བོད་ཀྱི་ནང་ཆོས་དེ་ཡང་དབུ་ཚད་དང། ཕར་ཕྱིན་སོགས་ནང་པའི་ལྟ་གྲུབ་ཀྱི་རྣམ་གཞག་ཧ་ཅང་ཞིབ་ཚགས་པོ་དང་ཟབ་ཅིང་རྒྱས་པའི་ཐོག་ནས་གཏན་ལ་ཕབ་ཡོད། དེར་བརྟེན་རིག་གཞུང་དེས་རྒྱ་རིགས་ཆོས་གྲོགས་རྣམས་ལའང་ཏན་ཏན་ཕན་ཐོགས་བྱེད་ཐུབ་རྒྱུ་ཡིན། ཞེས་སོགས་ཀྱི་བཀའ་སློབ་དང་དྲི་བའི་གོ་སྐབས་གསོལ་རས་སྩལ་བ་ལྟར།

༸གོང་ས་མཆོག་ལ་དེང་སྐབས་རྒྱལ་ཞེན་གྱི་བསམ་བློའི་སྐོར་དགོངས་ཚུལ་ཇི་ཡོད་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། དེ་སྔ་རྒྱ་རིགས་དངོས་ཁམས་རིག་པ་སྨྲ་བ་ཞིག་ནས་རང་ཉིད་ཀྱིས་ཉམས་ཞིབ་བྱེད་སའི་སློབ་ཚན་གང་ཡིན་པ་དེར་ཞེན་ཁོག་མ་སླེབས་པ་ཞིག་དགོས་རྒྱུ་ཧ་ཅང་གལ་ཆེན་པོ་ཡིན། གལ་ཏེ་དེ་ལྟར་མ་བྱུང་ཚེ་ཕྱོགས་ལྷུང་གི་བསམ་བློ་སླེབས་རྒྱུའི་ཉེན་ཁ་ཡོད་པ་དང། ཕྱོགས་ལྷུང་གི་བསམ་བློ་སླེབས་ན་བློ་གཟུ་བོར་གནས་པའི་ཐོག་ནས་དངོས་པོའི་གནས་ལུགས་ལ་དཔྱད་པ་བྱ་རྒྱུ་ཁག་པོོ་ཆགས་རྒྱུ་ཡིན་པ་བརྗོད་བྱུང། དེར་བརྟེན་རྒྱལ་ཞེན་གྱི་བསམ་བློ་དེ་ཡང་ཆགས་པའི་བློ་ཡིན་པར་བརྟེན། ཕྱོགས་སུ་ལྷུང་བའི་བློ་ལྟ་བུ་ཆགས་ཡོད། ཕྱོགས་ལྷུང་ཐོག་ནས་རྒྱལ་ཞེན་གྱི་བསམ་བློའམ་ལྟ་གྲུབ་འདི་ཉེན་ཁ་ཆེན་པོ་ཡིན། ཞེས་བཀའ་སྩལ་བ་དང་སྦྲགས། མགོན་པོ་གང་ཉིད་མཆོག་གིས་ཉི་ཧོང་དང་ཇར་མན་མི་མང་ཚོས་འཛམ་གླིང་དམག་ཆེན་གཉིས་པའི་སྐབས་དཀའ་སྡུག་ཧ་ཅང་མྱངས་ཡོད་ཀྱང། ཁོང་ཚོར་ཕམ་ཉེས་གཏོང་མཁན་གྱི་དགྲ་བོར་འཁོན་འཛིན་གྱི་བསམ་བློ་སྤངས་ཏེ་འཛུགས་སྐྲུན་ཡར་རྒྱས་ཧ་ཅང་ཕྱིན་ཡོད། དེར་བརྟེན་རྒྱ་ནག་ནན་ཅིང་གྲོང་ཁྱེར་དུ་དེ་སྔ་རྒྱ་ནག་གི་མི་མང་མང་པོ་ཉི་ཧོང་གིས་དམར་གསོད་བཏང་བའི་དོན་རྐྱེན་དེ་གླེང་སློང་བྱས་པས་ཕན་ཐོགས་གང་ཡང་མེད། དེ་སྔ་གསར་འགོད་པ་ཞིག་གིས་བརྙན་འཕྲིན་བརྒྱུད་འདས་པའི་བྱུང་རབས་ཐོག་སྐད་ཆ་དྲིས་སྐབས་ངོས་ཀྱིས་འདས་ཟིན་པའི་སྐད་ཆ་དེ་དག་ཡང་བསྐྱར་བླངས་ནས་ཕན་ཐོགས་གང་ཡང་མེད་སྐོར་བརྗོད་བྱུང་ཞེས་བཀའ་ལན་སྩལ་ཡོད།
དེ་རྗེས་བོད་རྒྱ་མི་རིགས་གཉིས་དབར་སེམས་ཐག་ཉེ་པོ་ཡོང་བའི་ཐབས་ལམ་ཇི་ཡོད་དྲི་བ་ཞུས་པར། ༸གོང་ས་མཆོག་གིས་བཀའ་ལན་སྩལ་དོན། དེ་སྔ་རྒྱ་ནག་གི་སྲིད་འཛིན་ཧུ་ཅིན་ཐའོས་རང་ཉིད་རྒྱ་ནག་གི་སྲིད་འཛིན་ཆགས་སྐབས། འཆམ་མཐུན་གྱི་སྤྱི་ཚོགས་བསྐྲུན་རྒྱུ་གལ་ཆེ་ཡིན་སྐོར་བརྗོད་ཡོད། འོན་ཀྱང་ཐབས་ལམ་དེ་དྲག་པོ་བེད་སྤྱོད་བྱས་ཡོད། དེར་བརྟེན་དྲག་པོ་བྱས་ཚེ་འཇིགས་སྣང་འོག་ཕན་ཚུན་ཡིད་ཆེས་བརླག་རྒྱུ་ཡིན། དམིགས་ཡུལ་ཡག་པོ་ཡིན་ནའང་ཐབས་ལམ་ནོར་བ་རེད། དམ་བསྒྲགས་ཚད་ལས་བརྒལ་བ་བྱས་པ་དེས་དངོས་ཡོད་གནས་ཚུལ་དང་མཐུན་པའི་བསམ་བློ་གཏོང་ཐུབ་རྒྱུ་ཁག་པོ་ཡིན། རྒྱ་ནག་མི་མང་ཚོར་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། དངོས་ཡོད་གནས་ཚུལ་ཤེས་པའི་ཐོག་ནས་བདེན་རྫུན་གྱི་དབྱེ་བ་འབྱེད་རྒྱུའི་ནུས་པ་དེ་རྒྱ་ནག་མི་མང་ཚོར་ལྡན་ཡོད། ཅེས་སོགས་ཀྱི་བཀའ་ལན་སྩལ།
དེ་རྗེས་༸གོང་ས་མཆོག་ཧན་ཊར་གཙུག་ལག་སློབ་གྲྭའི་ཚོགས་ཁང་དུ་( Hunter College Assembly) ཆིབས་སྒྱུར་བསྐྱངས་ཏེ་ཞབས་སྟེགས་སུ་༸ཞབས་སོར་འཁོད་བསྟུན། གཙོ་འཛིན་སྐུ་ཞབས་ཇེ་ནི་ཕར་ཇེ་རཱབ་ (Jennifer J Raab) མཆོག་གིས་གཙུག་ལག་སློབ་གྲྭའི་མཁས་པའི་ཕྱག་འཁྱེར་ (honorary doctorate) འབུལ་ལམ་ཞུས་ཡོད། སྐབས་དེར་༸གོང་ས་མཆོག་གིས་ཕྱག་འཁྱེར་འབུལ་བཞེས་མཛད་པ་དང་སྦྲགས་བཀའ་སློབ་སྩལ་དོན། ངོས་ལ་ཕྱག་འཁྱེར་འདི་འདྲ་ཞིག་གནང་བར་ཐུགས་རྗེ་ཆེ་ཞུ་རྒྱུ་ཡིན། ཕྱག་འཁྱེར་འདིས་ངོས་ཀྱིས་ད་བར་འགྲོ་བ་མིའི་སྤྱི་ཚོགས་བདེ་སྐྱིད་ལྡན་པ་ཞིག་ཡོང་ཆེད་འབད་བརྩོན་བྱས་པ་དེར་ངོས་འཛིན་ཐོབ་པ་ཞིག་ཡིན་པར་བརྟེན་ངོས་ལ་བློ་སྤོབས་སྤྲད་བྱུང། འབྱུང་འགྱུར་ལོ་ ༢༠ །༣༠ རིང་ངོས་ཀྱི་ལུས་ངག་ཡིད་གསུམ་གཞན་དོན་ཆེད་འབད་བརྩོན་གང་ཡོད་ཞུ་རྒྱུ་ཡིན། ཞེས་སོགས་ཀྱི་བཀའ་སློབ་སྩལ་ཡོད་པ་བཅས།།