༢༠༡༢ ཟླ་ ༡༠ ཚེས་ ༡༨ རེས་གཟའ་ཕུར་བུ།
༄༅། །ཨ་རིའི་ཤར་ཕྱོགས་མངའ་སྡེའི་(Rhode Island)རོ་ཌེ་ཨར་ལན་གྱི་(Providence)ཕོར་ཝེ་ཌན་སིར་རྟེན་གཞི་བྱས་པའི་(Brown)བྷོ་རོན་གཙུག་ལག་སློབ་གྲྭ་ཆེན་མོས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། ཕྱི་ལོ་ ༢༠༡༢ ཟླ་ ༡༠ ཚེས་ ༡༧ ཉིན་གྱི་ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་གིས་མངའ་སྡེ་དེའི་ཚོགས་ཁང་ཆེན་མོའི་ནང་འཛམ་གླིང་གི་འགྱུར་བ་དང་ཞི་བདེའི་རིག་གཞུང་བསྐྲུན་ཐབས་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།
དེ་ཡང་གོང་ཚེས་ཉིན་མགོན་པོ་གང་ཉིད་མཆོག་ཚོགས་ཁང་དེའི་ནང་༸ཞབས་སོར་འཁོད་སྐབས་གཙུག་ལག་སློབ་ཁང་དེའི་འགན་འཛིན་མཆོག་གིས་ཕེབས་བསུ་གཟབ་རྒྱས་ཞུས་པ་དང་སྦྲགས་ཚོགས་ཁང་དེའི་ནང་འདུ་འཛོམས་བྱུང་བའི་ཁྱོན་མི་གྲངས་ ༥༠༠༠ བརྒལ་བ་རྣམས་ལ་མགོན་པོ་གང་ཉིད་མཆོག་གི་སྐུ་ཚེའི་ལོ་རྒྱུས་ངོ་སྤྲོད་ཞུས་པ་དང་ཆབས་ཅིག་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་བཞི་པ་ཆེན་པོ་མཆོག་ང་ཚོའི་མངའ་སྡེ་འདིར་ཆིབས་སྒྱུར་བཀའ་དྲིན་བསྐྱངས་པར་ངས་ང་ཚོའི་མི་མང་གི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་ཡོད། དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་གོང་འཁོད་བརྗོད་གཞིའི་ཐོག་བཀའ་སློབ་སྩལ་དོན། ངོས་ཀྱིས་འདི་གའི་དགེ་ལས་སློབ་ཕྲུག་དང་མི་མང་ཚང་མར་འཚམས་འདྲི་ཞུ་རྒྱུ་ཡིན། ངོས་རང་འདི་གར་ཡོང་ཐེངས་དང་པོ་ཆགས་ཀྱི་ཡོད། འོན་ཀྱང་མི་སུ་འདྲ་ཞིག་ཐུག་ཀྱང་ཚང་མ་ངོ་ཤེས་ལྟ་བུ་མཐོང་གི་འདུག གང་ལ་ཞེ་ན། ང་ཚོ་ཚང་མ་འགྲོ་མི་ཡིན་པ་མ་ཟད། སྡུག་བསྔལ་མི་འདོད་པ་དང་བདེ་བ་འདོད་པ། དེ་བཞིན་སེམས་ཚོར་སོགས་གང་ཅིའི་ཐོག་ནས་གཅིག་མཚུངས་ཡིན། དེར་བརྟེན་མི་ཚང་མའི་འདོད་དོན་ལྟར་མི་ཚེ་བདེ་སྐྱིད་ལྡན་པ་ཞིག་སྐྱེལ་རྒྱུའི་ཐོབ་ཐང་ཡོད།
དེ་ཡང་ཞི་བདེ་དང་འབྲེལ་བ་ཡོད་པ་ཞིག་ཡིན། ངོས་རང་ལོ་བདུན་ཅུ་བརྒལ་འགྲོ་གི་ཡོད་པའི་མི་ཞིག་ཡིན། ངོས་རང་གི་མི་ཚེའི་ནང་འཛམ་གླིང་དམག་ཆེན་གཉིས་པ་དང་ཝི་ཏི་ནམ། དེ་བཞིན་ས་གནས་ཀྱི་དམག་འཁྲུག་མང་དག་ཅིག་མཐོང་མྱོང་ཡོད། དུས་རབས་ཉི་ཤུ་པ་དེ་ནི་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད། དེར་བརྟེན་དུས་རབས་ཉེར་གཅིག་འདི་བཞིན་ཞི་བདེའི་དུས་རབས་ཤིག་ཡོང་ཆེད་ང་ཚོ་ཚང་མས་འབད་བརྩོན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། སྤྱིར་བཏང་ཞི་བདེ་ཞེས་པ་ནི་དཀའ་ངལ་གང་ཡང་མེད་པའི་དོན་དག་མིན། འགྲོ་བ་མི་ཇི་སྲིད་གནས་པའི་བར་དུ་དེ་སྲིད་དཀའ་ངལ་ཆུང་ཙག་རིགས་ཡོད་མུས་རེད། དེང་སྐབས་འཛམ་གླིང་གི་དཔལ་འབྱོར་སོགས་གཅིག་ལ་གཅིག་བརྟེན་ཡིན་སྟབས། འཛམ་གླིང་གི་ཆ་ཤས་ཤིག་ལ་དཀའ་ངལ་འཕྲད་ན་གཞན་ཚོར་ཡང་དེ་མཚུངས་ཤུགས་རྐྱེན་ཐེབས་ཀྱི་ཡོད། འགྲོ་བ་མིར་འདོད་ཚུལ་དང་ལྟ་ཚུལ་མི་འདྲ་བ་ཡོད་པ་རྣམས་ང་ཚོས་ངོས་ལེན་བྱས་ཏེ་དུས་རབས་ཉེར་གཅིག་པ་འདི་བཞིན་གྲོས་མོལ་གྱི་དུས་རབས་ཤིག་བསྐྲུན་དགོས། འཛམ་གླིང་ནང་འགྱུར་བ་མང་དག་ཅིག་འགྲོ་གི་ཡོད། དེ་སྔ་ཡིན་ན་ཆོས་ལུགས་དང་ཚན་རིག་གཉིས་ཐ་དད་ཡིན་པར་ངོས་འཛིན་བྱེད་ཀྱི་ཡོད།
དེང་སྐབས་ཚན་རིག་མཁས་པ་ཁག་གཅིག་གིས་ང་ཚོ་འགྲོ་བ་མིའི་ཚོར་ཤུགས་དང་སེམས་ཁམས་ལ་རྟོག་ཞིབ་བྱེད་དགོས་སྙམ་གྱི་ཡོད། དཔེར་ན། མི་ཞིག་ལ་ནད་ཚ་བྱུང་ན་དེར་གདོང་ལེན་བྱ་རྒྱུར་སེམས་ཁམས་ཀྱི་ནུས་པས་ན་ཚ་དྲག་སྐྱེད་ཡོང་རྒྱུར་ཕན་ཐོགས་ཡོང་གི་ཡོད། དེ་བཞིན་ཕྱི་དངོས་པོ་ཡར་རྒྱས་གཅིག་པུས་བདེ་སྐྱིད་ཆ་ཚང་བསྐྲུན་ཐུབ་ཀྱི་མེད་པ་ཧ་ཅང་གསལ་པོ་ཡིན། གང་ལྟར་ཆོས་ལུགས་ལ་ཡིད་ཆེས་མ་བྱས་ཀྱང་བྱམས་དང་སྙིང་རྗེ་ཚང་མར་དགོས་ངེས་ཤིག་ཆགས་ཡོད། དེང་སྐབས་ཆོས་ལུགས་ལ་ཡིད་ཆེས་མེད་མཁན་ཁག་གཅིག་གིས་བྱམས་སྙིང་རྗེ་ནི་ཆོས་ལུགས་པའི་དོན་དག་ལྟ་བུ་མཐོང་གི་ཡོད་པས་དེ་ནི་ནོར་འཁྲུལ་གྱི་བསམ་བློ་གཏོང་སྟངས་ཤིག་རེད། འགྲོ་བ་མི་ཚང་མར་བྱམས་སྙིང་རྗེ་དགོས་ཀྱི་ཡོད། བྱམས་སྙིང་ཞེས་པ་དེ་ནི་ཆོས་ལུགས་རིས་མེད་དང་ཆོས་ལ་ཡིད་ཆེས་མེད་མཁན། མདོར་ན་འགྲོ་བ་མི་ཡོངས་ལ་དགོས་ངེས་ཤིག་ཆགས་ཡོད། ཅེས་སོགས་ཀྱི་བཀའ་སློབ་སྩལ་ཡོད།
དེ་བཞིན་སྔ་དྲོ་༸གོང་ས་མཆོག་གི་བཞུགས་གནས་མགྲོན་ཁང་དུ་འཛམ་གླིང་ཀུན་ཕན་ཐེབས་རྩ་ཚོགས་པའི་གོ་སྒྲིག་འོག་ནིའུ་ཡོཀ་དང་ནིའུ་ཇར་སི་ཁུལ་གྱི་རྒྱ་རིགས་ཁྱོན་ ༩༠ བརྒལ་བ་མཇལ་ཞུར་བཅར་ཡོད་པ་རྣམས་ལ་མགོན་པོ་གང་ཉིད་མཆོག་གིས་ལམ་སྟོན་བཀའ་སློབ་ཀྱང་སྩལ་ཡོད་པ་བཅས། །
