༢༠༡༢ ཟླ་ ༡༠ ཚེས་ ༡༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༩ ནང་རྒྱ་ནག་ཏུ་རྟེན་གཞི་བྱས་པའི་ཨ་རིའི་གཞུང་ཚབ་སྐུ་ཞབས་གྷེ་རི་ལོཀ་ Gary Locke མཆོག་བོད་མདོ་སྨད་རྔ་པར་འཚམས་གཟིགས་སུ་ཕེབས་པ་ཨ་རིའི་ཕོ་བྲང་དཀར་པོའི་མགྲིན་ཚབ་ལྕམ་སྐུ་ཝིཀ་ཊོ་རི་ཡ་ནུ་ལཎྜ་ Victoria Nuland མཆོག་གིས་ཕྱི་ལོ་ ༢༠༡༢ ཟླ་ ༡༠ ཚེས་ ༡༦ ཉིན་ཕོ་བྲང་དཀར་པོའི་ཉིན་རེའི་གསར་འགོད་གསལ་བསྒྲགས་སྐབས་གསུངས་ཡོད། དེ་ཡང་སྐབས་དེར་གསར་འགོད་པ་ཞིག་གིས་གཞུང་ཚབ་མཆོག་ཕྱི་ཟླ་ ༩ ནང་བོད་རྔ་པའི་ས་ཁུལ་དུ་འཚམས་གཟིགས་སུ་ཕེབས་པའི་འདྲ་པར་ཊུ་ཝི་ཊར་དྲ་ལམ་ཐོག་ཐོན་ཡོད་པ་དང། བོད་མདོ་སྨད་རྔ་པའི་ས་ཁུལ་དུ་སྔ་ལོ་ནས་བཟུང་བོད་མི་ ༣༠ ལྷག་གིས་རང་ལུས་མེར་སྲེག་བཏང་བའི་གནས་ཚུལ་བྱུང་བར་བརྟེན། སྐུ་ཉིད་མཆོག་ནས་རྒྱ་ནག་ཏུ་རྟེན་གཞི་བྱས་པའི་ཨ་རིའི་གཞུང་ཚབ་སྐུ་ཞབས་གྷེ་རི་ལོཀ་མཆོག་ཁུལ་དེར་ཕེབས་མིན་གྱི་གནས་ཚུལ་དང་ཨ་རིའི་ཕྱི་སྲིད་ལས་ཁུངས་ལ་དེ་འབྲེལ་གསལ་བཤད་གནང་རོགས་ཞུས་པར། ལྕམ་སྐུ་ནུ་ལཎྜ་མཆོག་གིས་ལན་འདེབས་གནང་དོན།
གཞུང་ཚབ་མཆོག་བོད་མདོ་སྨད་རྔ་པར་ཕེབས་པ་དེ་ནི་ཁོང་གིས་རྒྱ་ནག་ཁྲུང་ཅིང་ Chongqing དང་སི་ཁྲོན་ Sichuan ཞིང་ཆེན་སོགས་སུ་གཞུང་འབྲེལ་འཚམས་གཟིགས་སུ་ཕེབས་པའི་ཆ་ཤས་ཤིག་ཡིན། སྐབས་དེར་གཞུང་ཚབ་མཆོག་ནས་བོད་རིགས་གཙོ་བོར་གྱུར་བའི་ས་གནས་ཡུལ་མི་མང་པོ་དང་ཐུག་འཕྲད་གནང་ཡོད་པ་མ་ཟད། ཁུལ་དེའི་གྲོང་ཁྱེར་དང་དགོན་པ་སོགས་ཀྱི་ནང་དུའང་ཕེབས་ཏེ་ས་གནས་བོད་རིགས་ཚོ་དང་གསུང་མོལ་བརྒྱུད་ཁོང་ཚོའི་གནས་སྟངས་དང་འཚོ་བའི་ལས་དོན་སྐོར་ཤེས་ཐབས་གནང་ཡོད། ཨ་རིའི་གཞུང་གིས་བོད་ཀྱི་གནད་དོན་ཐོག་འཛིན་བཞིན་པའི་སྲིད་བྱུས་ནི་ཧ་ཅང་ཁ་གསལ་པོ་དང་ཕྱི་གསལ་ནང་གསལ་ཞིག་ཡིན་པར་བརྟེན་ཁྱེད་ཚོས་ཤེས་རྟོགས་ཐུབ་རྒྱུའི་རེ་བ་ཞུ་བཞིན་ཡོད། བོད་ཀྱི་དཀའ་ངལ་སེལ་ཆེད་རྒྱ་ནག་གཞུང་གིས་བོད་མི་དང་ལྷན་གྲོས་མོལ་གནང་རྒྱུར་ང་ཚོས་རྒྱབ་སྐྱོར་ཞུ་བཞིན་ཡོད་པ་མ་ཟད། བོད་ནང་དུ་རང་ལུས་མེར་སྲེག་གཏོང་མཁན་ཇེ་མང་དུ་འགྲོ་བཞིན་པའི་གནས་སྟངས་ཐོག་ང་ཚོར་ཧ་ཅང་སེམས་འཚབ་ཡོད། ཅེས་ལན་འདེབས་གནང།
དེ་རྗེས་གསར་འགོད་པ་ཁོང་གིས་གཞུང་ཚབ་མཆོག་བོད་ཀྱི་ས་ཁུལ་དུ་ཉིན་གྲངས་ཇི་ཙམ་བཞུགས་ཡོད་པ་དང། ཁོང་རྔ་པའི་ཁུལ་དུ་འཚམས་གཟིགས་གྲུབ་རྗེས་ཁུལ་དེར་རྒྱ་ནག་གཞུང་གིས་དམ་བསྒྲགས་ཧ་ཅང་བྱེད་བཞིན་པ་དེར་ཁོང་གིས་གཟིགས་ཚུལ་ཇི་འདྲ་བྱུང་མིན་སྐོར་གྱི་དྲི་བ་ཞུས་པར། ལྕམ་སྐུ་མཆོག་གིས་ལན་འདེབས་ཞིབ་ཕྲ་གང་ཡང་གནང་མེད།
ཡང་གསར་འགོད་པས་གཞུང་ཚབ་མཆོག་ད་ལྟ་ཨ་རིའི་ནང་བཞུགས་ཡོད་མེད་དང། ཁོང་གིས་རྔ་པའི་འཚམས་གཟིགས་དང་འབྲེལ་བའི་ཉམས་མྱོང་སྐོར་ཨ་རིའི་གྲོས་ཚོགས་ཀྱི་འཐུས་མི་རྣམས་དང་ཨ་རིར་གནས་སྡོད་བོད་མི་རྣམས་ལ་གསལ་བཤད་གནང་རྒྱུ་ཡིན་སྐོར་ཞུས་པར། ལྕམ་སྐུ་མཆོག་གིས་ཨ་རིའི་གྲོས་ཚོགས་ཀྱི་འཐུས་མི་སུ་འདྲ་ཞིག་རྒྱ་ནག་ཏུ་ནམ་ཕེབས་སྐབས་རྒྱ་ནག་ཏུ་ཡོད་པའི་ཨ་རིའི་གཞུང་ཚབ་པ་མཆོག་དང་མཇལ་འཕྲད་གནང་བཞིན་ཡོད། སྐབས་དེར་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་རྟག་ཏུ་བགྲོ་གླེང་ཡོང་བཞིན་ཡོད་པ་མ་ཟད། གནད་དོན་དེའི་སྐོར་རྒྱ་ནག་གཞུང་དང་ཇི་ལྟར་གླེང་དགོས་མིན་སྐོར་གོ་བསྡུར་ཡོང་བཞིན་ཡོད། ཅེས་ལན་འདེབས་གནང་ཡོད། དེ་རྗེས་གསར་འགོད་པས་བོད་མིས་རང་ལུས་མེར་སྲེག་བཏང་བའི་གནད་དོན་ཐོག་ཨ་རིའི་གཞུང་གི་ལངས་ཕྱོགས་ཇི་འདྲ་ཡིན་གསལ་བཤད་གནང་རོགས་ཞུས་པར། ལྕམ་སྐུ་མཆོག་གིས་ཨ་རིའི་གཞུང་གིས་བོད་ནང་དུ་རང་ལུས་མེར་གཏོང་མཁན་ཇེ་མང་དུ་འགྲོ་བཞིན་པའི་གནད་དོན་ཐོག་ཧ་ཅང་སེམས་འཚབ་ཆེན་པོ་ཡོད་པ་མ་ཟད། བོད་མིའི་དངོས་ཡོད་དཀའ་ངལ་ཐོག་ཨ་རིའི་གཞུང་ལ་བློ་འཚབ་ཆེན་པོ་ཡོད་པར་བརྟེན། བོད་མིའི་དཀའ་ངལ་སེལ་ཆེད་རྒྱ་ནག་གཞུང་གིས་བོད་མིའི་སྐུ་ཚབ་དང་ལྷན་གྲོས་མོལ་གནང་དགོས་པ་བསྟུད་མར་རེ་འདུན་ཞུ་བཞིན་ཡོད། ཅེས་ལན་འདེབས་གནང་ཡོད་པ་བཅས།།
