༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༤ རེས་གཟའ་ཉི་མའི་ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་མི་ནེ་སོ་ཊའི་ཨར་བོད་མཐུན་ཚོགས་ (Tibetan American Foundation of Minnesota) ནས་ཇི་ལྟར་མགྲོན་འབོད་ཞུས་པ་ལྟར་ཁུལ་དེར་ཕེབས་འབྱོར་བྱུང་ཡོད། སྐབས་དེར་གནམ་ཐང་དུ་གོང་བརྗོད་ཚོགས་པའི་ཚོགས་གཙོ་སྐུ་ཞབས་རྣམ་རྒྱལ་རྡོ་རྗེ་ལགས་དང་ཚོགས་པའི་འགན་འཛིན་ལྷན་ཚོགས་ཀྱི་འཐུས་མི་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་ལུགས་གཉིས་ཕུན་ཚོགས་ཚོགས་ཁང་དུ་ཕེབས་སྐབས་བོད་མིའི་ཐུན་མིན་གྱི་རིག་གཞུང་འཁྲབ་སྟོན་ཞུས་ཐོག་ཕེབས་བསུ་གཟབ་རྒྱས་ཞུས་ཡོད། དེ་ནས་ཚོགས་ཁང་ནང་བོད་རིགས་ ༢༠༠ བརྒལ་བ་འདུ་འཛོམས་ཐོག་སྲིད་སྐྱོང་མཆོག་གིས་དེང་སྐབས་བོད་ནང་དུ་གཞིས་ལུས་བོད་མི་ཚོས་རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་གནང་རྗེས་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཧ་ཅང་ཇེ་ཤུགས་ཆེ་རུ་བཏང་བར་བརྟེན། ད་ལྟའི་ཆར་གནས་སྟངས་ཧ་ཅང་ཛ་དྲག་ཅན་དུ་གྱུར་ཡོད་པ་དེར་སེམས་འཚབ་ཀྱི་རྣམ་པ་ཤུགས་ཆེ་བསྟན་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་ལྷག་བསམ་ཟོལ་མེད་ཐོག་ནས་ཞབས་ཞུ་མུ་མཐུད་བསྒྲུབ་རྒྱུའི་ཆོད་སེམས་བརྟན་པོ་འཆང་བཞིན་ཡོད་སྐོར་གསུངས། མཛད་སྒོའི་མཐའ་མར་མི་ནེ་སོ་ཊའི་ཨར་བོད་མཐུན་ཚོགས་ཀྱི་ཚོགས་གཙོས་སྲིད་སྐྱོང་མཆོག་གི་ད་བར་བོད་མིའི་དབུ་ཁྲིད་ཀྱི་ལས་དོན་ལ་བསྔགས་བརྗོད་ངོས་འཛིན་ཞུ་ཆེད་ཕྱག་རྟགས་ཤིག་ཕུལ་བ་དང་སྦྲགས། སྲིད་སྐྱོང་མཆོག་ལ་མི་ནེ་སོ་ཊའི་ཨར་བོད་མཐུན་ཚོགས་ཀྱི་ཚོགས་མིའི་མཚན་གནས་ཕུལ།
དེ་རྗེས་ཕྱི་དྲོ་མི་ནེ་སོ་ཊའི་བོད་རིགས་ཚོགས་པས་རེ་ཌི་སོན་གསོལ་མགྲོན་ཁང་དུ་Radisson Hotel སྲིད་སྐྱོང་མཆོག་དང་མི་ནེ་སོ་ཊ་མངའ་སྡེའི་གྲོ༞ས་ཚོགས་གོང་མའི་འཐུས་མི་སྐུ་ཞབས་ཇོ་མུ་ལ་རེ་Joe Mullery མཆོག ཀེ་རོ་ལ་ཡིན་ལེ་ནེ་Carolyn Laine མཆོག དེ་བཞིན་བོད་རིགས་བཅས་ཁྱོན་མི་གྲངས་ ༢༠༠ ཙམ་དང་ལྷན་གསོལ་ཚིགས་དགྱེས་བཞེས་གནང་ཡོད། ཕྱི་ཚེས་ ༡༢ ཉིན་སྲིད་སྐྱོང་མཆོག་མི་ནེ་སོ་ཊར་རྟེན་གཞི་བྱས་པའི་བོད་རིགས་སློབ་གྲྭ་Tibetan Culture School ཞིག་ཡོད་པ་དེར་ཕེབས་སྐབས་སློབ་ཕྲུག་གྲངས་ ༡༢༠ ཙམ་དང་ཕ་མ་བཅས་ཀྱིས་ཕེབས་བསུ་གཟབ་རྒྱས་ཞུས། སྐབས་དེར་སྲིད་སྐྱོང་མཆོག་གིས་སློབ་གྲྭ་དེའི་གལ་གནད་སྐོར་གསུང་བཤད་གནང་བ་མ་ཟད། དགེ་ལས་དང་ཕ་མ་རྣམས་ལའང་བསྔགས་བརྗོད་གནང་ཡོད། དེ་རྗེས་སྲིད་སྐྱོང་མཆོག་གིས་བོད་མི་གཞོན་སྐྱེས་ ༣༠ ཙམ་དང་ཐུག་འཕྲད་ཀྱིས་ཤེས་ཡོན་གལ་ཆེན་པོ་ཡིན་པ་དང་མ་འོངས་པར་བོད་མིའི་འཐབ་རྩོད་ཀྱི་འགོ་ཁྲིད་ཐུབ་ཐབས་བྱེད་དགོས་པའི་ལམ་སྟོན་གསུང་བཤད་གནང་། དེ་ནས་སྲིད་སྐྱོང་མཆོག་གིས་སི་ཊར་ཊིར་བུན་Star Tribune ཞེས་པའི་གྲགས་ཅན་གསར་ཤོག་གི་གསར་འགོད་པའི་དྲི་བར་ལན་འདེབས་གནང་ཡོད། དེ་རྗེས་སྲིད་སྐྱོང་མཆོག་བྷོ་སི་ཊོན་ Boston དུ་ཕེབས་ཏེ་ཁུལ་དེར་རྟེན་གཞི་བྱས་པའི་མེ་ས་ཆུ་སི་ཊི་འཕྲུལ་རིགས་བསྟི་གནས་ཁང་དུ་Massachusetts Institute of Technology ཕེབས་ཡོད་པ་བཅས།།
