༢༠༡༢ ཟླ་ ༡༠ ཚེས་ ༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་བོད་བརྒྱུད་ནང་བསྟན་མཐུན་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར། བྱང་ཆུབ་ལམ་སྒྲོན་གྱི་བཀའ་ཆོས་ཉིན་བཞི་པར་དད་ལྡན་ཆོས་ཞུ་བ་རྣམས་ལ་དགེ་བསྙེན་གྱི་སྡོམ་པ་འབོགས་ཆོག་དང་བྱང་ཆུབ་སེམས་བསྐྱེད། སྨན་བླའི་རྗེས་གནང་བཅས་གྲུབ་བསྟུན་རྒྱ་རིགས་ཆོས་ཞུ་བ་ཐུན་མོང་གིས་སྔ་འགྱུར་རྙིང་མའི་དབུ་འཛིན་སྟག་ལུང་རྩེ་སྤྲུལ་རིན་པོ་ཆེ་མཆོག་དབུ་བཞུགས་ཐོག་བྱང་གཏེར་ཚེ་སྒྲུབ་སྐུ་གསུམ་རིགས་འདུས་ཀྱི་ཆོ་ག་དང་འབྲེལ་བླ་མ་དགོངས་འདུས་ལྟར་བརྟན་བཞུགས་བསྟར་འབུལ་ཞུས་ཡོད།
དེ་ཉིན་སྔ་དྲོ་ཆུ་ཚོད་ ༨ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་དད་ལྡན་སྐུ་ཚབ་ཀྱིས་ཕོ་བྲང་ནས་སྤོས་སྣེས་སྔོན་བསུས་ཏེ་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་བསྟུན་སྔོན་འགྲོའི་ཆོས་འབྲེལ་སྐབས་ནང་ཆོས་ངོ་སྤྲོད་དང་འབྲེལ་དགེ་བསྙེན་གྱི་སྡོམ་པ་འབོགས་ཆོག་དང་བྱང་ཆུབ་སེམས་བསྐྱེད། སྨན་བླའི་རྗེས་གནང་བཅས་གྲུབ་བསྟུན་བྱང་ཆུབ་ལམ་སྒྲོན་གྱི་བཀའ་ཆོས་འཕྲོས་སྐྱོང་བསྐྱངས་རྗེས་རྒྱུན་ཕྱག་གསུམ་པ་སྔོན་འགྲོ་བས་བཤགས་པ་ཡེ་ཤེས་སྐུ་མཆོག་དང་། རྫེ་བཙུན་བླ་མ་གསུང་རྗེས་གསོལ་ཇ་འབྲས་སིལ་འདེགས་འབུལ་ཞུས། དེ་ནས་དཀར་གཏོར་དམར་གཏོར་བསྔོ་བ་དང་། རྡོ་རྗེ་སློབ་དཔོན་ལྷར་གསལ་ཏེ་མཎྜལ་སོ་བདུན་མ་དང་བླ་དར། མཁའ་འགྲོ་སྡེ་ལྔའི་གཏོར་འབུལ། བླ་ལུག་འབུལ་བ། ཚེ་འགུག སྐུ་རྟེན་འབུལ་བ། གསུང་རྟེན། ཐུགས་རྟེན་འབུལ་བ། སྟན་དཀར་རྡོ་རྗེ། རྣམ་བུམ། ཚེ་བུམ། ཚེ་རིལ། ཚེ་ཆང་། ཚེ་མདའ། ཚེ་འབྲང་གའུ། བཀྲ་ཤིས་རྫས་བརྒྱད། རིན་ཆེན་སྣ་བདུན། བཀྲིས་རྟགས་བརྒྱད་བཅས་འདེགས་འབུལ་ཞུས་རྗེས་བཀྲིས་ཚིགས་བཅད་ཁག་དང་། དབུ་བཞུགས་རྩེ་སྤྲུལ་རིན་པོ་ཆེ་མཆོག་གིས་མཇལ་ཁ་ཞུས་རྗེས་འབྲེལ་ཡོད་སྦྱིན་བདག་འཐུས་མི་རྣམ་པས་མཇལ་བཅར་ཞུས། དེ་ནས་༸རྒྱལ་བའི་ཞབས་བརྟན་གསུང་མུས་ཐོག་འབུལ་དངོས་སྤྱན་བསྟར་ཞུས། དེ་རྗེས་ཐེ་ཝན་ཆོས་ཞུ་བ་ཡོངས་ནས་རྒྱ་སྐད་ཐོག་གངས་རི་རྭ་བས་བསྐོར་བ་སོགས་གསུད་རྗེས་མཐའ་རྟེན་གསོལ་འདེབས་བླ་མ་སྐུ་ཁམས་བཟང་དང་། སྨོན་ལམ་རབ་འབྱམས་འཁོར་ལོའི་མགོན་པོ་བཅས་གསུང་སྟེ་བརྟན་བཞུགས་ལེགས་པར་གྲུབ། ཐེངས་འདིའི་བརྟན་བཞུགས་འདི་བཞིན་རྒྱ་རིགས་ཆོས་ཞུ་བ་ཐུན་མོང་ནས་འདེགས་འབུལ་ཞུས་པ་ཐོག་མ་ཆགས་ཡོད་པ་བཅས། །
