༢༠༡༢ ཟླ་ ༡༠ ཚེས་ ༡༡ རེས་གཟའ་ཕུར་བུ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༢ ཟླ་ ༡༠ ཚེས་ ༩ ཉིན་ཨ་རིའི་ནིའུ་ཡོཀ་མངའ་སྡེའི་(Syracuse University)སེ་ར་ཁུ་སི་གཙུག་ལག་སློབ་གཉེར་ཁང་དུ་ཉིན་གྲངས་གཉིས་རིང་བསྐྱངས་པའི་མཛད་འཕྲིན་མཐའ་མར་འཛམ་གླིང་ཞི་བདེ་དང་འབྲེལ་བའི་འཛམ་གླིང་གཅིག་(One World)ཅེས་པའི་རོལ་དབྱངས་འདུ་འཛོམས་གོ་སྒྲིག་ཞུས་པའི་ཐོག་གདན་ཞུས་ལྟར་ཆིབས་སྒྱུར་བསྐྱངས་ཏེ་བྱམས་སྙིང་རྗེ་དང་ཤེས་ཡོན་སོགས་བརྗོད་གཞི་ཁག་གཅིག་ཐོག་བཀའ་སློབ་སྩལ་ཡོད།
དེ་ཡང་སེ་ར་ཁུ་སི་གཙུག་ལག་སློབ་གཉེར་གྱི་(Carrier Dome)ཞེས་པའི་རྩེད་འགྲན་རྭ་བའི་ནང་འཛམ་གླིང་ནང་གི་གཞས་པ་གྲགས་ཅན་ཁག་གཅིག་དང་། དེ་བཞིན་རོལ་དབྱངས་ཀྱི་འདུ་འཛོམས་ཐོག་ཕེབས་པའི་མི་མང་ ༡༥༠༠ བརྒལ་བ་རྣམས་ལ་མགོན་པོ་གང་ཉིད་མཆོག་གིས་རང་གཅེས་འཛིན་གྱི་བསམ་བློ་དོར་ཏེ་སྤྱི་ཚོགས་ཀྱི་བདེ་དོན་ལ་བསམ་བློ་གཏོང་དགོས་པའི་བཀའ་སློབ་སྩལ་དོན། མི་སྒེར་པ་ཞིག་ལ་དབང་ཆ་ཇི་ཙམ་ཆེན་པོ་ཡོད་ཀྱང། སྤྱི་ཚོགས་ལ་མ་བརྟེན་པར་བདེ་སྐྱིད་ཐོབ་ཀྱི་མེད་པར་བརྟེན། སྤྱི་ཚོགས་འདི་མི་ཚེ་དོན་ལྡན་ཞིག་སྐྱེལ་རྒྱུའི་འབྱུང་ཁུངས་ལྟ་བུར་ངོས་འཛིན་བྱས་ཏེ་མི་གཞན་ལ་མགོ་སྐོར་བསླུ་བྲིད་དང་གཉའ་གནོན་བཤུ་གཞོག་སོགས་བྱ་རྒྱུ་མེད།

ལྷག་པར་རང་གཅེས་འཛིན་བྱས་ཀྱང་བྱེད་སྟངས་དེ་མི་གཞན་ལ་གནོད་པ་མ་བསྐྱལ་བའི་སྒོ་ནས་རང་གཞན་གཉིས་ཀར་ཕན་ཐོགས་ཡོད་པ་བྱ་རྒྱུ་ཧ་ཅང་གལ་ཆེན་པོ་རེད། དེ་བཞིན་སོ་སོའི་ཁེ་ཕན་སྲུང་སྐྱོབ་བྱས་པ་དང་ཆབས་ཅིག་མི་གཞན་གྱི་ཁེ་ཕན་ཡང་སྲུང་སྐྱོབ་བྱེད་དགོས། ངོས་རང་དེང་དུས་ཀྱི་ཤེས་ཡོན་སློབ་སྦྱོང་ཐོབ་པའི་མི་ཞིག་མིན་ཡང་། མཁས་པ་མང་པོ་ཞིག་གིས་ད་ལྟའི་ཤེས་ཡོན་སྲིད་བྱུས་ནང་བཟང་པོའི་ཀུན་སྤྱོད་དང་འབྲེལ་བའི་བསླབ་བྱ་འདང་གི་མེད་པ་ངོས་འཛིན་བྱེད་བཞིན་ཡོད། གལ་སྲིད་ཆོས་ལུགས་ཀྱི་ཡིད་ཆེས་དང་དད་པ་བཅས་འབྲེལ་བ་མེད་པར་རིས་མེད་ཐོག་ནས་ཡ་རབས་བཟང་པོའི་ཀུན་སྤྱོད་དེ་ཤེས་ཡོན་ནང་སློབ་ཁྲིད་བྱེད་ཐུབ་ན། ཧ་ཅང་ཕན་ཐོགས་ཆེན་པོ་ཡོད། ཅེས་སོགས་ཀྱི་བཀའ་སློབ་སྩལ་ཡོད།

ཐེངས་འདིའི་རོལ་དབྱངས་འདུ་འཛོམས་ཐོག་རྒྱལ་སྤྱིའི་ནང་སྙན་གྲགས་ཅན་གྱི་གཞས་པ་(Dave Matthews)དང། (David Crosby)ལགས། (A.R.Rahman)ལགས་རྒྱལ་ཁབ་མང་པོའི་གཞས་པ་དང་གཞས་མ་གྲགས་ཅན་ཁག་འདུ་འཛོམས་བྱུང་ཡོད་པས། རོལ་དབྱངས་འདུ་འཛོམས་དེ་ཧ་ཅང་སྙན་གྲགས་ཆེན་པོ་ཆགས་ཡོད་པ་བཅས། །