༢༠༡༢  ༩  ༢༡ རེས་གཟའ་པ་སངས།

༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༠ ཉིན་རྒྱ་ནག་གི་སྲིད་བློན་ཝུན་ཅཱ་པའོ་ཡུ་རོབ་སྤྱི་མཐུན་ཚོགས་པ་དང་རྒྱ་ནག་དབར་ཚོང་འབྲེལ་ལྷན་ཚོགས་ཐེངས་ ༡༥ ཐོག་མཉམ་ཞུགས་བྱས་ཡོད། དེ་ཡང་ཚོང་འབྲེལ་ལྷན་ཚོགས་མཇུག་བསྒྲིལ་རྗེས་ཡུ་རོབ་སྤྱི་མཐུན་ལྷན་ཁང་གི་གཙོ་འཛིན་ European Council སྐུ་ཞབས་ཧར་མན་ཝོན་རོམ་པེ་ Herman Van Rompuy མཆོག་དང་ཡུ་རོབ་སྤྱི་མཐུན་ཚོགས་པའི་འཛིན་སྐྱོང་ལྷན་ཁང་གི་ཚོགས་གཙོ་སྐུ་ཞབས་ཇོ་སེ་མེ་ནུལ་བྷ་རོ་སོ་ Joseé Manuel Barroso མཆོག་དབུ་བཞུགས་ཀྱིས་་ཕ་རན་སིའི་རྒྱལ་ས་པེ་རི་སིའི་ནང་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན། ཡུ་རོབ་མང་ཚོགས་ཀྱིས་ཡུ་རོབ་དང་འཛམ་གླིང་ས་ཕྱོགས་གཞན་ཙམ་མ་ཟད། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དོ་སྣང་ཧ་ཅང་བྱེད་བཞིན་ཡོད། ཅེས་གསུངས། དེ་བཞིན་རྒྱ་ནག་གི་སྲིད་བློན་ཝུན་ཅཱ་པའོ་དང་ཐུག་འཕྲད་སྐབས་གླེང་མོལ་བྱུང་བའི་སྐོར་གསུང་དོན།

ང་ཚོས་རྒྱ་ནག་གི་སྲིད་བློན་ཝུན་ཅཱ་པའོ་དང་ཐུག་འཕྲད་སྐབས།  རྒྱ་ནག་དང་ལྷན་འགྲོ་བ་མིའི་ཐོབ་ཐང་གི་གནད་དོན་ཐོག་གྲོས་མོལ་བྱ་རྒྱུ་དེ་ཡུལ་གཉིས་ཀྱི་འབྲེལ་ལམ་ཐོག་གནད་དོན་གལ་ཆེ་ཞིག་ལ་ངོས་འཛིན་བྱེད་བཞིན་ཡོད། ལོ་གཅིག་ལྷག་ཙམ་རྗེས་སུ་ང་ཚོ་ཡུལ་གཉིས་དབར་འགྲོ་བ་མིའི་ཐོབ་ཐང་གི་གནད་དོན་ཐོག་གྲོས་མོལ་བསྐྱར་མཐུད་བྱུང་ཐུབ་པར་དགའ་བསུ་ཞུ་རྒྱུ་ཡིན། ང་ཚོའི་བསམ་ཚུལ་ལྟར་ན།  གནད་དོན་དེར་ངོ་ཐོག་ལག་ལེན་ཐོག་དོན་སྙིང་ལྡན་པའི་གྲུབ་འབྲས་སོན་པ་ཞིག་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།  དེར་བརྟེན་གནད་དོན་དེའི་ཐད་ད་དུང་ཡར་རྒྱས་གཏོང་རྒྱུའི་གོ་སྐབས་མང་པོ་ཡོད་པ་ངོས་འཛིན་ཐོག་ང་ཚོས་གནད་དོན་དེར་དམིགས་བཀར་གྱིས་འབད་བརྩོན་བྱ་རྒྱུ་གལ་ཆེན་པོ་ཆགས་ཡོད། ང་ཚོས་འཛམ་གླིང་ས་ཕྱོགས་གཞན་ནང་གི་འགྲོ་བ་མིའི་ཐོབ་ཐང་གི་གནད་དོན་ལྟར།  རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་དེ་ཧ་ཅང་གལ་ཆེན་པོ་ཞིག་ལ་ངོས་འཛིན་བྱེད་བཞིན་ཡོད། རྩ་བའི་རྒྱ་ནག་ནང་དཔལ་འབྱོར་ཡར་རྒྱས་ཐོག་དབུལ་ཕོངས་ས་ཡ་མང་པོའིདཀའ་ངལ་སེལ་ཐུབ་པ་དེར་ང་ཚོས་ངོས་འཛིན་གྱིས་བསྔགས་བརྗོད་ཞུ་རྒྱུ་ཡིན། འོན་ཀྱང་ད་དུང་རྒྱ་ནག་ནང་སྨྲ་བརྗོད་ཀྱི་རང་དབང་ལ་དམ་བསྒྲགས་བྱེད་བཞིན་པ་དང་། བོད་ནང་གི་གནས་སྟངས་སོགས་ལ་ང་ཚོས་སེམས་འཚབ་བྱེད་དགོས་པའི་གནད་དོན་མང་པོ་ཞིག་ཡོད། ཅེས་ཞུ་རྒྱུ་བྱུང་ཞེས་སོགས་ཀྱི་གསར་འགོད་གསལ་བསྒྲགས་སྤེལ་ཡོད།