༢༠༡༢ ཟླ་ ༩ ཚེས་ ༢༡ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༡ ཉིན་རྡ་ས་ཐེག་ཆེན་གཙུག་ལག་ཁང་དུ་དྭང་སློབ་གྱི་གོ་སྒྲིག་འོག་༸རྒྱལ་བའི་སྐུ་ཕྱཱ་དང་། བོད་དོན་བདེན་མཐའ་སེལ་ཐབས་སུ་དམིགས་ཏེ་མཧཱ་གུ་རུའི་འབུམ་ཚོགས་འབུལ་གཤོམ་དབུ་འཛུགས་གནང་འདུག
དེ་ཡང་ཆོས་རིག་ལས་ཁུངས་ནས་སྤེལ་བའི་གསལ་བསྒྲགས་ནང་འཁོད་དོན། རང་རིགས་དྭང་སློབ་ནས་ལོ་ལྟར་མཧཱ་གུ་རུའི་འབུམ་ཚོགས་འབུལ་གཤོམ་ཞུ་མུས་བཞིན། འདི་ལོ་ཡང་བོད་རྒྱལ་ལོ་ ༢༡༣༩ རབ་གནས་ཆུ་འབྲུག་ལོའི་བོད་ཟླ་ ༨ ཚེས་ ༦ ནས་ཚེས་ ༡༠ ཕྱི་ལོ་ ༢༠༡༢ ཟླ་ ༩ ཚེས་ ༢༥ བར་ཉིན་ལྔའི་རིང་༸རྒྱལ་བའི་སྐུ་ཕྱྭ་དང། བོད་དོན་བདེན་མཐའ་གསལ་ཐབས་སུ་དམིགས་ཏེ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་དང། རྣམ་རྒྱལ་གྲྭ་ཚང་གི་མཁན་རིན་པོ་ཆེ་དབུ་བཞུགས་ཐོག་རྣམ་གྲྭ་འདུས་ཚོགས་དང། བཞུགས་སྒར་ཁུལ་གནས་འཁོད་རིས་མེད་ཆོས་སྡེ་ཁག་གི་དགེ་བཙུན་སྔགས་གསུམ་བཅས་ནས་བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མ་ཧཱ་གུ་རུའི་ཚོགས་མཆོད་འབུམ་ཐེར་སྨིན་སྒྲུབ་ཞུ་རྒྱུར་ཞིང་མཆོག་འདུས་པ་རྒྱ་མཚོར་བསྙེན་བཀུར་གསོལ་ཇ་དང། བཞེས་བག དགུང་ཚིགས་དཀར་སྐྱོང། དགེ་བཙུན་སྔགས་གསུམ་ལ་སྐུ་འགྱེད་བཅས་འབུལ་རྒྱུ་ལགས་ན། ཚོགས་དུས་སྔ་དྲོ་ཕྱག་ཚོད་ ༦།༣༠ ནས་ ༡༢། བར་དང། ཉིན་རྒྱབ་ཕྱག་ཚོད་ ༡།༣༠ ནས་ཕྱག་ཚོད་ ༤།༣༠ བར་ཡིན་པས། བོད་མི་སེར་སྐྱ་ཡོངས་ནས་༸རྒྱལ་བའི་སྐུ་ཕྱྭ་དང། བསྟན་སྲིད་རྩ་དོན་གལ་ཆེར་དགོངས་བཞེས་ཀྱིས་ཕྱག་དཔེ་མཉམ་བསྣམས་ཐོག་འབུམ་ཚོགས་སུ་ངེས་ཕེབས་ཡོང་བའི་ཆོས་བརྡར། ཆོས་རིག་ལས་ཁུངས་ནས་ཕྱི་ལོ་ ༢༠༡༢ ཟླ་ ༩ ཚེས་ ༡༠ ལ། །
