༢༠༡༢ ཟླ་ ༩ ཚེས་ ༡ རེས་གཟའ་སྤེན་པ།
༄༅། །བོད་བསྟན་སྲིད་མི་རིགས་ཀྱི་ཆེད་རང་ལུས་མེར་སྲེག་གཏོང་མཁན་རྒྱལ་གཅེས་པ་འདས་གསོན་ཡོངས་ཀྱི་ཆེད་ཕྱི་ལོ་ ༢༠༡༢ ཟླ་ ༨ ཚེས་ ༣༡ ཉིན་གྱི་ཕྱེད་ཡོལ་ཆུ་ཚོད་ ༣ ཐོག་བཀའ་ཤག་གི་བཀའ་འབྲེལ་འོག་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསུང་བཤད་གནང་དོན། བཀའ་ཟུར་ཀིརྟི་རིན་པོ་ཆེ་མཆོག་གིས་གཙོས་མཁན་རིན་པོ་ཆེ་མཆོག་དང། སྐྱབས་གནས་དགེ་འདུན་གྱི་སྡེ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། སེར་སྐྱ་མི་མང་རྣམ་པ། དེ་བཞིན་སློབ་ཕྲུག་རྣམ་པར་ཞུ་རྒྱུར། དེ་རིང་ང་ཚོ་འདི་གར་འཛོམས་དགོས་པའི་རྒྱུ་མཚན་ཁྱེད་རྣམ་པས་ཤེས་གསལ་རེད།
ཉེ་ཆར་ཕྱི་ཟླ་ ༨ ཚེས་ ༢༧ ཉིན་ཀིརྟི་དགོན་པའི་དགེ་འདུན་པ་རང་ལོ་ ༡༨ ཡིན་པ་བློ་བཟང་སྐལ་བཟང་ལགས་དང་རང་ལོ་ ༡༧ ཡིན་པ་མི་སྐྱ་དམ་ཆོས་ལགས་གཉིས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད། སྤྱི་ཡོངས་ནས་རྣམ་པ་ཚོས་མཁྱེན་གསལ་རེད། རང་ལུས་མེར་སྲེག་གཏོང་གནང་མཁན་ཁོང་རྣམ་པ་གཉིས་རྩིས་པའི་ཁྱོན་མི་གྲངས་ ༥༡ ཆགས་ཡོད། གྲངས་འབོར་དེ་མཐོ་པོ་རེད། བཀའ་ཤག་གིས་འདིའི་ཐད་དེ་སྔ་ནས་ཞུ་རྒྱུ་བྱུང། རང་སྲོག་མེར་སྲེག་གཏོང་གནང་མཁན་ཚོ་གྲངས་ཀར་འགྱུར་བའི་ཉེན་ཁ་འདུག ཁོང་ཚོ་ཡང་མི་ཡིན་པ་དང་ང་ཚོ་བཞིན་སྲོག་རྩ་ཆེན་དུ་རྩིས་མཁན། ནང་མི་དང་གཉེན་ཉེ་མཉམ་མི་ཚེ་སྐྱེལ་འདོད་ཡོད་མཁན་ཞིག་ཡིན། འོན་ཀྱང་ཁོང་རྣམ་པས་བོད་རྒྱ་ཆེའི་མི་མང་གི་ཆེད་རང་སྲོག་བློས་གཏོང་གནང་དང་གནང་མུས་ཡིན། ཁོང་རྣམ་པའི་དགོས་འདུན་གཙོ་བོ་ནི། ༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་ཞེས་པ་འདི་གཉིས་ཡིན། དེར་བརྟེན་ང་ཚོས་དགོས་འདུན་འདི་དུས་ནམ་ཡང་བརྗེད་རྒྱུ་མེད། བོད་ནང་གི་བོད་མི་ཚོ་དོན་གྱི་བདག་པོ་ཡིན་པ་དང། དེའི་ནང་ནས་རྒྱ་ནག་གི་མཁྲེགས་བཟུང་གི་སྲིད་བྱུས་འོག་་སྡུག་བསྔལ་མྱངས་དང་མྱོང་བཞིན་པའི་ཤ་ཁྲག་གཅིག་པའི་བོད་རིགས་རྣམས་ཀྱིས་དཀའ་ལས་ག་ཚོད་རྒྱག་མུས་ཡིན་པ་དེ་མ་བརྗེད་པ་བྱེད་དགོས།
དེ་རིང་ང་ཚོ་འདིར་འཛོམས་ཏེ་མཆོད་འབུལ་སྨོན་ལམ་རྒྱས་པ་འདིའི་ཐོག་ཁོང་རྣམ་པ་ཡོངས་ཀྱི་ཆེད་སྨོན་ལམ་རྒྱག་རྒྱུ་དང། ལྷག་པར་བོད་ཀྱི་རྩ་དོན་ཆེད་རང་སྲོག་བློས་གཏོང་གནང་མཁན་དང། དཀའ་ལས་རྒྱག་མཁན། དེ་བཞིན་བོད་ནང་རྒྱ་ནག་གཞུང་གི་མཁྲེགས་བཟུང་གི་སྲིད་བྱུས་འོག་སྡུག་བསྔལ་མྱོང་བཞིན་པ། དམིགས་བསལ་རང་ལུས་མེར་གཏོང་གནང་མཁན་གྱི་ཕ་མ་སྤུན་མཆེད་རྣམས་ལ་དུས་ནས་དུས་སུ་ང་ཚོས་སྨོན་ལམ་རྒྱག་རྒྱུ་ཧ་ཅང་གལ་ཆེན་པོ་རེད། དེར་བརྟེན་སྨོན་ལམ་སྐྱོན་རོགས་ཞེས་ཞུ་རྒྱུ་ཡིན། བོད་ནང་གི་ཛ་དྲག་གནས་སྟངས་དེ་ཚང་མས་མཁྱེན་གསལ་རེད། འདས་པའི་ལོ་གཉིས་ལྷག་རིང་རང་ལུས་མེར་སྲེག་གཏོང་གནང་མཁན་མང་དུ་ཕྱིན་ཡོད་སྟབས། རྒྱལ་སྤྱིའི་སྡིངས་ཆའི་སྟེང་དང་། གསར་འགྱུར་བརྒྱུད་ལམ་ཁག གནད་ཡོད་མི་སྣ་ནས་ཐུགས་སྣང་གནང་རྒྱུ། གྲོས་ཚོགས་ཀྱི་ཐོག་ནས་གྲོས་ཆོད་འཇོག་རྒྱུ་སོགས་མང་དུ་འགྲོ་བཞིན་ཡོད། བོད་དོན་ཆེད་རྒྱབ་སྐྱོར་ཤུགས་ཆེ་རུ་འགྲོ་གི་ཡོད་པ་གསལ་པོ་རེད། དཔེར་ན། ཉེ་ཆར་བོད་ཀྱི་ཐོག་སྙན་ཐོ་གཉིས་ཐོན་འདུག གཅིག་ཨ་རིའི་གཞུང་དང་འབྲེལ་བ་ཡོད་པ་དེའི་ནང་གཞུང་དང་གྲོས་ཚོགས་གཉིས་ཀའི་ཚོགས་ཆུང་ཞིག་བཙུགས་ཡོད། དེའི་ཁོངས་རྒྱ་ནག་ལ་ཞིབ་འཇུག་བྱེད་མཁན་གྱི་བོད་དོན་སྐོར་གྱི་སྙན་ཐོ་དེའི་ནང་རང་སྲོག་མེར་སྲེག་གཏོང་དགོས་པའི་རྒྱུ་རྐྱེན་ནི། རྒྱ་ནག་གཞུང་གི་མཁྲེགས་བཟུང་གི་སྲིད་བྱུས་ལས་བྱུང་བ་ཞིག་ཡིན་པ་འཁོད་ཡོད། དེ་བཞིན་རྒྱལ་སྤྱིའི་རྒྱལ་མཚམས་མེད་པའིགསར་འགོད་མཐུན་ཚོགས་པ་(Reporters without Border) ཞེས་པའི་ཚོགས་པའི་སྙན་ཐོའི་ནང་། རྒྱ་ནག་གཞུང་གི་མཁྲེགས་བཟུང་སྲིད་བྱུས་ཀྱིས་རྐྱེན་པས་བོད་ནང་ཉེན་ཚབས་ཆེ་བའི་གནས་ཚུལ་དང་རང་ལུས་མེར་སྲེག་གཏོང་མཁན་མང་དུ་འགྲོ་བཞིན་འདུག ངས་དེ་ལྟར་བརྗོད་དགོས་དོན་ནི། རྒྱ་ནག་གཞུང་ནས་ཧམ་བཤད་ཐོག་ནས་བོད་ནང་རང་ལུས་མེར་སྲེག་གཏོང་མཁན་གྱིས་གཙོས་ངོ་རྒོལ་བྱེད་མཁན་ཚང་མར་ཕྱི་ལ་ཡོད་པའི་ལོག་སྤྱོད་པ་ཚོས་བྱེད་ཀྱི་ཡོད་རེད་ཅེས་ཁག་དཀྲི་རྒྱུར་འབད་བརྩོན་བྱས་ཏེ། རྒྱལ་སྤྱིའི་སྡིངས་ཆའི་ཐོག་འགྲོ་སོང་བཏང་སྟེ་གསར་འགྱུར་བརྒྱུད་ལམ་ཁག་བེད་སྤྱོད་བྱས་པ་རེད། འོན་ཀྱང་རིམ་པས་ཁ་གསལ་དུ་འགྲོ་རྒྱུ་ནི་ང་ཚོས་བྱས་པ་མ་ཡིན་པར། རྒྱ་ནག་གཞུང་གི་མཁྲེགས་བཟུང་གི་སྲིད་བྱུས་དང་མི་སེར་སྤེལ་བའི་ལམ་ལུགས་འོག་བོད་མི་རྣམས་གནས་ཐུབ་ཀྱི་མེད་པར་བརྟེན་རང་གི་གཅེས་པའི་ལུས་སྲོག་བློས་གཏོང་གནང་གི་ཡོད་པ་རྒྱལ་སྤྱི་ནང་ང་ཚོ་བདེན་པ་ཡིན་པའི་དཔང་རྟགས་གསལ་དུ་འགྲོ་བཞིན་ཡོད་པ་དང་ལྷན་རྒྱབ་སྐྱོར་གྱི་རྣམ་པ་ཤུགས་ཆེ་རུ་འགྲོ་གི་འདུག་ཅེས་ཞུ་རྒྱུ་ཡིན།
ཕྱི་ཟླ་ ༩ པའི་ཟླ་མཇུག་ཏུ་བཀའ་སྤྱི་གཉིས་ཀས་དམིགས་བསལ་ཚོགས་ཆེན་ཐོག་ལ་ཡིན་ནའང་གནད་དོན་དེའི་ཆེད་དུ་གྲོས་བསྡུར་ཐོག་གཞུང་མང་གཉིས་ཀྱིས་ལས་འགུལ་ཇི་འདྲ་ཞིག་སྤེལ་རྒྱུ་ཡོད་མེད། སོགས་ལ་རིམ་བཞིན་གོ་བསྡུར་དང་འཆར་གཞི་གཏན་འབེབས་བྱ་རྒྱུ་ཡིན། དེ་བཞིན་གྲོས་ཚོགས་ཀྱི་ཚོགས་གཙོས་དབུས་རྒྱུན་ལས་ཁག་གཅིག་ཉེ་ལམ་རྒྱ་གར་རྒྱལ་ས་ལྡི་ལིར་ཕྱི་རྒྱལ་གཞུང་ཚབ་ཁག་མང་པོ་ཞིག་ལ་བཅར་ཏེ་བོད་ནང་གི་ཛ་དྲག་གི་གནས་སྟངས་སྐོར་སྙན་སེང་ཞུས་ཡོད། ཅེས་གསུངས་པ་དང། མཐར་བཀའ་ཁྲི་མཆོག་གིས་བོད་མི་རང་སྲོག་ཞུགས་འབུལ་གནང་མཁན་ཚང་མར་ཐུགས་སྨོན་ཡག་པོ་གནང་རོགས་ཞེས་འབོད་སྐུལ་ཞུས་ཡོད་པ་བཅས།།
