༢༠༡༢ ཟླ་ ༩ ཚེས་ ༢༥ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༥ ནས་ ༢༨ བར་ཉིན་བཞིའི་རིང་འཚོགས་རྒྱུའི་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ པའི་འོག་དམིགས་བསལ་ཚོགས་ཆེན་ཐེངས་གཉིས་པ་རྡ་སྟེང་བོད་ཕྲུག་ཁྱིམ་སྡེའི་ཚོགས་ཁང་ཆེན་མོའི་ནང་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༢༠ ཐོག་སྐུ་མགྲོན་རྣམ་པ་དང་ཚོགས་བཅར་བ་རྣམ་པ་རྡ་སྟེང་བོད་ཁྱིམ་ཚོགས་ཁང་ནང་གི་བཞུགས་གྲལ་དུ་འཁོད་རྗེས་རྣམ་གྲྭ་ཕན་བདེ་ལེགས་བཤད་གླིང་གི་དགེ་འདུན་པ་རྣམས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་དུང་རྒྱ་སེར་སྦྲེངས་དང་མང་གཙོའི་ཀ་བ་གསུམ་གྱི་མཛད་གཙོ་རྣམས་ཀྱིས་སྤོས་སྣེས་སངོན་བསུས་ཏེ་ཚོགས་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་འཁོད་མཚམས། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག སྲིད་སྐྱོང་བློ་བཟང་སེང་གེ་མཆོག བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་བཅས་ཀྱིས་མཇལ་དར་སྒྲོན་འབུལ་ཞུས།
དེ་ནས་རྣམ་གྲྭའི་དགེ་འདུན་པ་རྣམས་ཀྱིས་ཤིས་བརྗོད་གསུང་འདོན་གནང་རྗེས་རྡ་སྟེང་བོད་ཁྱིམ་སློབ་ཕྲུག་རྣམས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་རྔ་རོལ་དང་བཅས་བཏང། དེ་རྗེས་བོད་བསྟན་སྲིད་མི་རིགས་ཀྱི་ཆེད་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་ཡོངས་ཀྱི་ཆེད་རྗེས་དྲན་མྱ་ངན་གུས་འདུད་ངག་བཅད་སྐར་མ་གཅིག་ཞུས་གྲུབ་བསྟུན། རྟེན་འབྱུང་གསོལ་ཇ་དང་འབྲས་བསིལ་ཕུལ་གྲུབ་མཚམས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་གིས་ཚོགས་ཆེན་དབུ་འབྱེད་ཀྱི་གསུང་བཤད་དང། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་བཀའ་ཤག་གི་གསུང་བཤད་གནང། དེ་ནས་གསོལ་ཇའི་བར་གསེང་གྲུབ་རྗེས་ཕྱི་དྲིལ་ལས་ཁུངས་ཀྱིས་ཕྱོགས་སྒྲིག་ཞུས་པའི་བོད་མི་ཚོས་རང་ལུས་མེར་སྲེག་གཏོང་དགོས་དོན་ཅི་ཡིན་ཞེས་པའི་བརྙན་འཕྲིན་གསར་པ་དང། དེ་བཞིན་བོད་ནང་གི་གླུ་པ་ཁག་གཅིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་སྐྱོང་བློ་བཟང་སེང་གེ་མཆོག་ལ་བསྟོད་གླུ་འབུལ་ལམ་ཞུས་པའི་བརྙན་འཕྲིན་ཁག་གཉིས་ཚོགས་བཅར་བ་རྣམས་ལ་བསྟན་ཡོད།
ཆུ་ཚོད་ ༡༡།༣༠ ཐོག་དམིགས་བསལ་ཚོགས་ཆེན་གྱི་དབུ་འཛུགས་མཛད་སྒོ་གྲུབ་བསྟུན་ཕྱི་ནང་གི་གསར་འགོད་པ་གྲངས་ ༥༠ བརྒལ་བར་བོད་མི་མང་སྤྱི་འཐུས་ཚོགས་གཙོ་མཆོག་དང་། ཚོགས་གཞོན་མཆོག སྲིད་སྐྱོང་མཆོག་ནས་གསར་འགོད་གསལ་བསྒྲགས་སྤེལ་བའི་ནང་གསུང་དོན། ད་རེས་དམིགས་བསལ་ཚོགས་ཆེན་ཚོགས་དགོས་དོན་ནི་བོད་ནང་ཛ་དྲག་གནས་སྟངས་འགྲོ་བཞིན་པའི་ཐོག་བཙན་བྱོལ་ནང་ཡོད་པའི་བོད་མི་ཚོས་འགན་ཇི་ཙམ་འཁྱེར་དགོས་དང་ལས་འགུལ་ཇི་འདྲ་སྤེལ་དགོས་ཀྱི་ཐོག་གོ་བསྡུར་བྱེད་རྒྱུའི་ཆེད་ཚོགས་ཡོད། བོད་མི་གནས་སྡོད་བྱེད་ཡུལ་ ༢༦ ནས་ཚོགས་བཅར་བ་གྲངས་ ༤༣༢ འདིར་ཕེབས་ཡོད། དེའི་ནང་བཀའ་བློན་རྣམས་དང། བཀའ་ཟུར་རྣམ་པ། འཛིན་སྐྱོང་ལས་བྱེད་རྒན་གྲས་རྣམ་པ། ས་གནས་འགོ་འཛིན་རྣམ་པ། ས་གནས་འཐུས་ཚོགས་དང་རང་དབང་བདེན་པའི་ལས་འགུལ་ཚོགས་ཆུང་གི་སྐུ་ཚབ། ཕྱི་རྒྱལ་ཁག་ནས་བོད་རིགས་ཚོགས་པའི་སྐུ་ཚབ་མང་པོ་ཞིག་དང། ཆོས་བརྒྱུད་ཚང་མ་ནསསྐུ་ཚབ་༦ རེ་དང། ཇོ་ནང་གི་སྐུ་ཚབ་གཅིག་སོགས་བཅར་ཡོད། ཉིན་བཞི་ཚོགས་རྒྱུའི་ནང་ང་ཚོ་བོད་མིའི་སྤྱི་ཚོགས་ནས་ལས་འགུལ་གང་འདྲ་སྤེལ་དགོས་སྐོར་དང། ང་ཚོས་གདུང་སེམས་མཉམ་སྐྱེ་གང་འདྲ་ཞུ་དགོས་པ་དང། ཨེ་ཤི་ཡའི་ནང་བོད་མི་ཚོས་ལས་འགུལ་གང་སྤེལ་དགོས་མིན་དང་བོད་དོན་རྒྱབ་སྐྱོར་ཚོགས་པ་དང་མཉམ་དུ་ལས་འགུལ་གང་དང་གང་སྤེལ་དགོས། འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་ནས་ལས་འགུལ་སྤེལ་རྒྱུ་གང་ཞིག་ཡོད་མེད། གཞུང་འབྲེལ་མིན་པའི་ཚོགས་པས་ལས་འགུལ་སྤེལ་རྒྱུ་གང་འདུག མི་སྒེར་སོ་སོ་ནས་གང་བྱེད་ཐུབ་པ་འདུག དེ་དག་སྐོར་གོ་བསྡུར་གནང་སྟེ་ཚེས་ ༢༧ སྔ་དྲོ་ཚོགས་ཆུང་སོ་སོའི་སྙན་ཐོ་སྒྲོགས་སྦྱང་ཞུ་རྒྱུ་དང། ཉིན་རྒྱབ་ཚོགས་ཆུང་ཁག་བཅུའི་སྙན་ཐོ་དེ་དག་ཕྱོགས་སྒྲིག་ཞུ་རྒྱུ། ཕྱི་ཚེས་ ༢༨ སྔ་དྲོ་་ཉིན་མཐའ་མར་འཛིན་སྐྱོང་བཀའ་ཤག་གིས་གོ་སྒྲིག་འོག་གཞུང་དམངས་གཉིས་ཀྱིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ། ཉིན་རྒྱབ་ཚོགས་ཆུང་ཁག་གིས་སྙན་ཐོ་ཕྱོགས་གཅིག་ལ་བསྒྲིལ་ནས་སྒྲོགས་སྦྱང་ཞུ་རྒྱུ་ཡིན།
དེ་ནས་བོད་ནང་ཡོད་པའི་བོད་མི་ཚོར་ཞུ་རྒྱུར། ཁྱེད་ཚོས་དཀའ་སྡུག་མང་པོ་མྱོང་བཞིན་ཡོད། ཁྱེད་རྣམ་པས་རང་སྲོག་ཚུན་ནས་བློས་བཏང་སྟེ་བོད་སྤྱིའི་བདེ་རྩ་དང། རྒྱ་ཆེ་ས་ནས་བཤད་ན་འཛམ་གླིང་འདིའི་ནང་དང། འཇིག་རྟེན་འདིའི་ནངབོད་པ་དང་བོད་པ་འདྲ་བའི་སྡུག་སྦྱོང་མྱོང་མཁན་ཚང་མའི་ཆེད་དུ་བློས་གཏོང་ཆེན་པོ་གནང་བ་དེར་ང་ཚོས་ཡི་རང་བསྔགས་བརྗོད་ཞུ་རྒྱུ་དང། ཁྱེད་ཚོས་བློས་གཏོང་གནང་བ་དེ་ང་ཚོ་བཙན་བྱོལ་ནང་ཡོད་བོད་མི་ཚོས་རྒྱལ་སྤྱིའི་སྟེང་ཁྱབ་ཐུབ་པ་དང། ལྷག་པར་༸གོང་ས་མཆོག་གི་ཐུགས་ཀྱི་བྱིན་རླབས་ང་ཚོ་བོད་མི་ཚང་མར་ཡོད་པ་ཞིག་རེད། ད་རེས་ང་ཚོས་ལས་འགུལ་བང་ག་རེ་སྒྲིག་ཀྱང་བོད་ནང་གི་ཛ་དྲག་གནས་སྟངས་ཐོག་ཡིན་དུས་ང་ཚོས་ཤེས་འཇོན་ནུས་གསུམ་གང་ཡོད་པ་སྤུངས་རྒྱུའི་དུས་ལ་སླེབས་ཡོད་ཅེས་སོགས་ཀྱི་གསར་འགོད་གསལ་བསྒྲགས་གནང་རྗེས། གསར་འགོད་པའི་དྲི་བར་ལན་འདེབས་གནང་ཡོད།
དེ་ནས་ཚོགས་མི་རྣམ་པ་ཆ་བགོས་ལྟར་ཚོགས་ཆུང་ཚུགས་ཡུལ་སོ་སོར་ཕེབས་ཏེ་ཚོགས་ཆུང་སོ་སོའི་ཚོགས་གཙོ་དང་ཚོགས་དྲུང་བཅས་སུ་འདེམས་བསྐོ་བྱུང་བའི་ཚོགས་གཙོས་ཚོགས་ཆུང་གི་ལས་དོན་བྱེད་ཕྱོགས་དང་ལས་རིམ་གསལ་བཤད་གནང་ཡོད། དེ་རྗེས་ཚོགས་ཆུང་སོ་སོའི་ནང་ད་ལྟའི་བོད་ནང་གི་ཛ་དྲག་གནས་སྟངས་ལ་བོད་གཞུང་མང་གཉིས་ནས་གདོང་ལེན་ཆེད་བཙན་བྱོལ་བོད་མིའི་ངོས་ནས་བཀའ་སྤྱི་གཉིས་ཀྱི་སྤྱི་སྨན་ལམ་སྟོན་ཞི་བ་དང། ཡུལ་ཁྲིམས་དང་མི་འགལ་བ། ཆེ་མཐོང་ལྡན་པའི་ངང་ནས་བོད་མིའི་སྤྱི་ཚོགས་ནང་ལས་འགུལ་སྤེལ་ཕྱོགས་སྐོར་བགྲོ་གླེང་གནང་རྒྱུ་ཡིན་འདུག
ཕྱི་ཚེས་ ༢༦ ཉིན་ཚོགས་ཆུང་སོ་སོའི་ནང་ད་ལྟའི་བོད་ནང་གི་ཛ་དྲག་གནས་སྟངས་ལ་བོད་གཞུང་མང་གཉིས་ནས་གདོང་ལེན་ཆེད་རྒྱལ་སྤྱིའི་ནང་ལས་འགུལ་སྤེལ་ཕྱོགས་སྐོར་དང་། ད་ལྟའི་བོད་ནང་གི་ཛ་དྲག་གནས་སྟངས་ལ་བོད་གཞུང་མང་གཉིས་ནས་གདོང་ལེན་ཆེད། རྒྱ་གར་དང་ལྷོ་ཤར་ཨེ་ཤི་ཡའི་ནང་བཅས་སུ་ལས་འགུལ་སྤེལ་ཕྱོགས་སྐོར་བགྲོ་གླེང་གནང་རྒྱུ། དེ་ནས་ཕྱི་ཚེས་ ༢༧ ཉིན་ཚོགས་ཆུང་སོ་སོ་ནང་གོང་གསལ་བརྗོད་གཞི་གསུམ་གྱི་ཐོག་ཚོགས་ཆུང་སོ་སོའི་ཕྱོགས་བསྡོམས་སྙན་ཐོ་གཏན་འབེབས་གནང་རྒྱུ་དང། དེ་ཉིན་ཚོགས་བཅར་བ་རྣམ་པ་རྡ་སྟེང་བོད་ཁྱིམ་ཚོགས་ཁང་གསར་པའི་ནང་ཚང་འཛོམས་ཐོག་ཚོགས་ཆུང་སོ་སོའི་རྒྱབ་གཉེར་སྙན་ཐོ་སྙན་སྒྲོན་ཞུ་རྒྱུ་ཡིན་འདུག དེ་བཞིན་ཚོགས་བཅར་བའི་ཁོངས་ནས་བསམ་ཚུལ་དང་བཀའ་སྤྱི་གཉིས་ནས་གསལ་བཤད་དགོས་པའི་དྲི་བ་གནང་རྒྱུའི་གོ་སྐབས་གནང་རྒྱུ་ཡིན་འདུག
ཕྱི་ཚེས་ ༢༨ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་གཞུང་མང་གཉིས་ནས་བརྟན་བཞུགས་བསྟར་འབུལ་ཞུ་རྒྱུ་དང། ཕྱི་དྲོ་རྡ་སྟེང་བོད་ཁྱིམ་དུ་ཚོགས་ཆུང་སོ་སོའི་རྒྱབ་གཉེར་རྣམས་ཕྱོགས་བསྡོམས་རྒྱབ་གཉེར་སྙན་ཐོ་སྙན་སྒྲོན་དང་འབྲེལ་གཏན་འབེབས་གནང་རྒྱུ། དེ་ནས་ཚོགས་ཆེན་མཇུག་བསྡོམས་སྐབས་སྲིད་སྐྱོང་མཆོག་གིས་བཀའ་ཤག་དང། བོད་མི་མང་སྤྱི་འཐུས་ཚོགས་གཙོ་མཆོག་གིས་ཚོགས་ཆེན་གྱི་མཇུག་བསྡོམས་ཀྱི་གསུང་བཤད་གནང་རྒྱུ། དེ་བཞིན་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་ཐུགས་རྗེ་ཆེ་ཞུའི་གསུང་བཤད་གནང་རྒྱུ་ཡིན་འདུག ཐེངས་འདིའི་ཚོགས་ཆེན་ནང་རྒྱལ་ཁབ་ཁག་ ༢༦ ནས་ཁྱོན་མི་གྲངས་ ༤༣༢ ཀྱིས་ཚོགས་བཅར་ཞུས་འདུག་པ་དང་དམིགས་བསལ་ཐེ་ཝན་དང་ཕྱི་ཕྱོགས་ནས་རྒྱ་རིགས་ཟུར་ཉན་པ་ ༥༠ བརྒལ་བ་བཅར་ཡོད་པ་བཅས།།
