༢༠༡༢ ཟླ་ ༩ ཚེས་ ༡༧ རེས་གཟའ་ཟླ་བ།
སྐུ་པར་འདི་དག་དགའ་ལྡན་ཕོ་བྲང་ཡིག་ཚང་གི་ལས་བྱེད་ཆོས་འབྱོར་ལགས་ནས་མཁོ་སྤྲོད་གནང།
༄༅། །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་འགན་འཛིན་སྐལ་བཟང་མཁས་གྲུབ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༩ ཚེས་ ༡༦ ཉིན་གྱི་སྔ་དྲོ་ཆུ་ཚོད་ ༩།༡༥ ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བདེ་སྐྱིད་གླིང་དུ་རྟེན་གཞི་བྱས་པའི་ས་སྐྱ་རིན་ཆེན་གླིང་བཙུན་དགོན་དུ་བཞུགས་ཞག་མཛད་ཡོད་པ་ནས་དགོན་དེའི་གཙུག་ལག་ཁང་དུ་ཆིབས་སྒྱུར་བཀའ་དྲིན་ཆེ་བ་བསྐྱངས་ཏེ་ཐོག་མར་གནས་གཟིགས་དང་དེ་ནས་ཞབས་སྟེགས་ཐོག་༸ཞབས་སོར་འཁོད་སྐབས་རྟེན་འབྲེལ་གསོལ་ཇ་འབྲས་སིལ་འདེགས་འབུལ་ཞུས། དེ་ནས་བཙུན་མ་ཚོས་༸གོང་ས་མཆོག་ལ་རིགས་ལམ་རྟགས་གསལ་གཟིགས་འབུལ་ཞུས་རྗེས་གཙུག་ལག་ཁང་དེའི་ཕྱིར་མཇལ་ཁར་བཅར་བའི་རྒན་འཁོགས་ལོ་ན་བརྒྱད་ཅུ་བརྒལ་བ་མི་གྲངས་ ༧༠ ཙམ་ལ་མཇལ་ཁ་དང་ཐུགས་བརྩེའི་གསུང་གིས་བྱིན་རླབས་སྩལ་ཏེ་སྟོན་འཁོར་རྣམས་ལྷོ་བྲག་དགའ་ལྡན་དོན་ཡོད་གླིང་ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་དགོན་དེར་ཆིབས་ཞལ་བསྒྱུར། ཆུ་ཚོད་ ༨།༣༠ ཐོག་ལྷོ་བྲག་དགོན་དུ་༸ཞབས་སོར་འཁོད་དེ་ཐོག་མར་གནས་གཟིགས་དང་དེ་ནས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་དགོན་དེའི་ལས་སྣེས་མཎྜལ་རྟེན་གསུམ་འདེགས་འབུལ་ཞུས། སྐབས་དེར་༸གོང་ས་མཆོག་གིས་དགོན་དེའི་ལས་སྣེ་སོགས་ལ་དགོན་དེའི་དེ་སྔའི་གནས་ཚུལ་དང་ད་ལྟ་འདིར་བཞེངས་ཡོད་པ་འདིའི་སྐོར། དེ་བས་བསླབ་པ་སློབ་གཉེར་ཇི་ལྟར་བྱེད་ཀྱི་ཡོད་མེད། ཇི་ལྟར་བྱེད་དགོས་སོགས་ཀྱི་བཀའ་རྩད་དང་ལམ་སྟོན་བཀའ་སློབ་ཕེབས་པ་མ་ཟད། དགོན་དེ་༸གོང་ས་ལྔ་པ་ཆེན་པོས་ཕྱག་བཏབ་པ་ཡིན་སྐོར་དང་
སྲུང་མ་བསྟེན་ཕྱོགས་སྐོར་སོགས་ཞིབ་པར་གསུང་མོལ་མཛད་རྗེས་དགེ་འདུན་པ་རྣམས་དང་ལྷན་དུ་སྐུ་པར་ཡང་བསྒྲོན་ཏེ་ཐོག་ཁར་བཞེངས་ཡོད་པའི་གཟིམ་ཆུང་ལའང་གནས་གཟིགས་མཛད་དེ་ཐེག་མཆོག་བསམ་གཏན་གླིང་གོང་དཀར་ཆོས་སྡེའི་མཚམས་ཁང་ལ་ཆིབས་སྒྱུར་བསྐྱངས། དེ་ནས་རྭ་ཇ་པུར་བོད་ཀྱི་བུད་མེད་མཉམ་ལས་བཟོ་གྲྭར་ཆིབས་ཞལ་བསྒྱུར།
དེ་ནས་སྔ་དྲོ་ཆུ་ཚོད་ ༡༠།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་རྣམས་རྭ་ཇ་པུར་བོད་ཀྱི་བུད་མེད་མཉམ་ལས་བཟོ་གྲྭར་༸ཞབས་སོར་འཁོད་སྐབས་སློབ་ཕྲུག་ཚོས་བཀྲ་ཤིས་ཞོལ་པ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་དང་སྦྲགས་བུད་མེད་མཉམ་ལས་བཟོ་གྲྭའི་ཐང་ཆེན་དུ་གོ་སྒྲིག་ཞུས་ཡོད་པའི་ཞབས་སྟེགས་ཐོག་༸ཞབས་སོར་འཁོད་བསྟུན་མཉམ་ལས་བཟོ་གྲྭའི་ཚོགས་གཙོས་འཚམས་འདྲིའི་མཇལ་དར་རྐྱང་འབུལ་ཞུས་རྗེས་རྭ་ཇུ་པུར་མཉམ་ལས་བཟོ་གྲྭའི་ལས་བསྡོམས་སྙིང་བསྡུས་སྙན་སྒྲོན་ཞུས་པའི་ནང་། བཟོ་གྲྭ་འདི་ནི་ཕྱི་ལོ་ ༡༩༦༥ ལོའི་ཟླ་ ༡ ཚེས་ ༡ ཉིན་འགོ་བཙུགས་པ་ནས་ད་བར་མི་ལོ་ ༤༧ ཧྲིལ་པོ་སོང་ཡོད། བཟོ་གྲྭ་འདིའི་ཐོག་མའི་དམིགས་ཡུལ་ནི་བོད་མི་རྣམས་ལ་རང་གི་ཐུན་མོང་མིན་པའི་རུམ་གདན་བཟོ་ལས་ཀྱི་སློབ་སྦྱོང་དང་རང་ཁ་རང་གསོ་ཡོང་སླད་འབད་བརྩོན་བྱས་ཡོད་པར་བོད་མི་མང་པོ་ཞིག་ལ་ཕན་ཐོགས་ཆེན་པོ་བྱུང་ཡོད། ད་ལྟའི་ཆར་རུམ་འཐག་དང་། ཚེམ་ལས། པང་གདན་བཟོ་ལས་བཅས་ཀྱི་སྡེ་ཚན་ཁག་ཡོད་པ་འདིས་བོད་མི་རྣམས་ལ་སྡོད་ཁང་དང་། ཕྲུ་གུར་སློབ་ཡོན། སློབ་འཇུག རྒན་པ་ཚོར་འཚོ་སྣོན་སོགས་ཕན་ཐོགས་རིམ་པས་ཞུས་དང་ཞུ་མུས་ཡིན་ལ། བཟོ་གྲྭ་སྤྱི་ལ་དགོས་མཁོ་ཆེ་བའི་འཆར་གཞི་ཁག་ཀྱང་འབད་བརྩོན་ལྷོད་མེད་ཞུ་མུས་ཡིན། ད་ལྟའི་ཆར་བཟོ་གྲྭ་འདིའི་ནང་ཁྱིམ་ཚང་ ༧༦ དང་། མི་འབོར་ ༣༥༨ ལས་བྱེད་གྲངས་ ༡༡ ཚོགས་མི་མཉམ་ལས་བཟའ་མི་ ༧༦ ཡོད་ཅེས་སོགས་ཀྱི་ལས་བསྡོམས་སྙིང་བསྡུས་སྙན་སྒྲོན་ཞུས།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ལམ་སྟོན་ཕེབས་དོན། སྔོན་མ་འདི་གར་ཕྲེང་རིང་ཨ་མ་ལགས་བཞུགས་སྐབས་ངོས་འདི་ཕྱོགས་ཐེངས་འགའ་ཡོང་མྱོང་ཡོད། ད་བར་དུས་ཡུན་གང་ཙམ་སོང་སྟེ་ཧ་ལམ་མི་རབས་གསར་པ་བརྗེས་འགྲོ་གི་ཡོད། མཉམ་ལས་འདི་ང་ཚོ་བཙན་བྱོལ་བ་ཆགས་ནས་སྔ་ཤོས་ལྟ་བུ་ཆགས་ཡོད། ད་ཆ་ཐོག་མར་འགོ་འཛུགས་སྐབས་ཀྱི་སྤོ་རྨོ་ག་ཚད་བསྡད་ཡོད་དམ། ཧ་ལམ་མང་ཆེ་བ་གསར་པ་རེད་འདུག ང་ཚོ་བཙན་བྱོལ་བ་ཆགས་ནས་མི་ལོ་ལྔ་བཅུ་ང་གསུམ་བརྒལ་འགྲོ་གི་ཡོད། ང་ཚོ་ཐོག་མ་བཙན་བྱོལ་བ་ཆགས་སྐབས་ཧ་ལམ་ཕྱི་ལོ་ ༢༠༠༠ ལོ་བར་འགོར་གྱི་མ་རེད་བསམས་པ་དྲན་གྱི་ཡོད། ང་ཚོའི་འཆར་གཞིར་དུས་ཀྱི་འགྱུར་བ་མགྱོགས་པོ་བྱུང་ན་དགོས་རྒྱུ་དེ་རེད། འོན་ཀྱང་ང་ཚོས་གྲ་སྒྲིག་སྡུག་ས་ནས་བྱེད་དགོས་པ་རེད། ང་ཚོ་དུས་ཡུན་རིང་པོར་བཙན་བྱོལ་བ་བྱས་ཏེ་སྡོད་དགོས་བྱུང་ཡང་སྡོད་ཐུབ་པར། སྔོན་ལ་རང་ཉིད་རང་ཁ་རང་སོ་བྱེད་ཐུབ་པ་ཞིག་དང་། དེ་ནས་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་འཕེལ་ཡོང་བར་རྒྱུན་འཛིན་ཐུབ་པའི་ལས་འགན་གཙོ་བོ་བཟུང་ཡོད། དེ་ལྟར་གཞིས་ཆགས་ཁག་དང་བཟོ་གྲྭ་འདིས་མཚོན་པའི་དམིགས་ཡུལ་དེ་འདྲ་བཟུང་སྟེ་དུས་ཡུན་དེའི་རིང་ལ་ང་ཚོ་བཙན་བྱོལ་བ་རྣམས་བཙན་བྱོལ་འདྲ་འདྲའི་ནང་ཚགས་ཚུད་ཤོས་དང་གྲ་སྒྲིག་ཤོས་ཤིག་ཆགས་ཡོད། དེ་ཡང་ང་ཚོས་བཤད་པ་མ་རེད། བཙན་བྱོལ་བའི་སྐོར་ལ་རོགས་རམ་བྱེད་མཁན་ཚོགས་པ་དེ་འདྲའི་མི་རྒན་པོ་རྒན་མོ་ཆགས་པ་དེ་དག་གིས་ཁྱེད་ཚོ་བོད་པར་ལོ་དེ་དག་གི་ནང་རོགས་རམ་བྱས་པར་གྲུབ་འབྲས་ཐོན་པ་ཆགས་ཏེ་ཧ་ཅང་ཡག་པོ་རེད་ཅེས་མང་པོས་ཤོད་ཀྱི་འདུག དེར་བརྟེན་ང་ཚོས་འདི་དག་ཡག་ཐག་ཆོད་ཟེར་དགོས་པ་རེད། ཅེས་སོགས་ཀྱི་བཀའ་སློབ་ཕེབས་པ་མ་ཟད། དཔེ་ཆ་ལྟ་ཀློག་བྱས་ཏེ་ནང་ཆོས་རང་ཉིད་ཀྱིས་ཤེས་པ་བྱེད་དགོས་པ་དང་བཀའ་འགྱུར་བསྟན་འགྱུར་དེ་བཞིན་དཔེ་དེབ་ལ་བརྩིས་ཏེ་སློབ་སྦྱོང་བྱེད་དགོས་པ་སོགས་ཀྱི་ལམ་སྟོན་བཀའ་སློབ་ཟབ་རྒྱས་སྩལ་གྲུབ་མཚམས་ས་སྐྱ་ཆོས་སྒར་དུ་ཆིབས་སྒྱུར་གྱི་ཉིན་གུང་ལྗགས་སྨིན་མཛད་རྗེས་མ་སུ་རིར་ཆིབས་ཞལ་བསྒྱུར།
དེ་ནས་ཆུ་ཚོད་༡།༡༥ ཐོག་མ་སུ་རིར་རྟེན་གཞི་བྱས་པའི་ཝུ་ཌི་སི་ཏོཀ་(Woodstock School) སློབ་གྲྭའི་ཚོགས་ཁང་ནང་༸ཞབས་སོར་འཁོད་སྐབས་སློབ་གྲྭ་དེའི་སློབ་སྤྱི་ཇོ་ན་ཐན་ལོང་ ( Jonathan Long) ལགས་ཀྱིས་ཕེབས་བསུའི་གསུང་བཤད་དང་སློབ་ཕྲུག་རྣམས་ལ་༸གོང་ས་མཆོག་ངོ་སྤྲོད་ཞུས་རྗེས་དགེ་ལས་སློབ་ཕྲུག་རྣམས་ལ་༸གོང་ས་མཆོག་གིས། སྟོང་ལོ་གསར་པའི་བཟང་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་དང་སློབ་ཕྲུག་ཚོའི་དྲི་བར་བཀའ་ལན་སྩལ་ཡོད། དེ་ནས་༸གོང་ས་མཆོག་སྟོན་འཁོར་རྣམས་ཐེངས་འདིར་གདན་ཞུའི་གསོལ་འདེབས་ཞུ་མཁན་མ་སུ་རི་བོད་ཁྱིམ་སློབ་གྲྭའི་དགོན་པ་སྟེ་བོད་མི་བཙན་བྱོལ་དུ་འབྱོར་རྗེས་ཀྱི་ལོ་རྒྱུས་ཐོག་གི་དགོན་པ་དེར་ཆིབས་སྒྱུར་སྐབས་སློབ་ཕྲུག་རྣམས་ཀྱིས་བཀྲ་ཤིས་ཞོལ་པ་དང་། སེང་གེ ལྷ་མོ། བྲོ། གར་གླུ རལ་པ། དམག་མིའི་རོལ་དབྱངས་བཅས་དཀྲོལ་གཏོང་འཁྲབ་གསུམ་གྱི་ལམ་ནས་ཕེབས་བསུ་ཧ་ཅང་གཟབ་རྒྱས་ཀྱིས་གདན་འདྲེན་ཞུས་ཏེ་བཞུགས་གནས་དགོན་དེར་༸ཞབས་སོར་བདེ་བར་འཁོད་རྗེས་ཉིན་འདིའི་མཛད་འཕྲིན་ཁག་ཡོངས་སུ་ལེགས་པར་གྲུབ། ཐེངས་འདི་ནི་༸གོང་ས་མཆོག་མ་སུ་རི་ནས་བཞུགས་སྒར་རྡ་སར་གནས་སྤོ་མཛད་རྗེས་ཀྱི་ཆིབས་སྒྱུར་བསྐྱངས་ཐེངས་དྲུག་པ་དེ་ཡིན་འདུག་པ་བཅས།།
