༢༠༡༢ ཟླ་ ༩ ཚེས་ ༡༠་རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༧ ཉིན་བཀའ་ཁྲི་བློ་བཟང་སེང་གེ་མཆོག་གིས་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་འཕེལ་གླིང་ཚོགས་པ་གསར་པ་ཞིག་དབུ་འབྱེད་གནང་ཡོད། དེ་ཡང་གོང་ཚེས་ཉིན་གྱི་ཕྱི་དྲོ་མེག་གྷན་དུ་རྟེན་གཞི་བྱས་པའི་བྷག་སུ་གསོལ་མགྲོན་ཁང་གི་ཚོགས་ཁང་ནང་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་འཕེལ་གླིང་ཞེས་པ་ཚོགས་པ་གསར་འཛུགས་ཀྱི་མཛད་སྒོ་ཚོགས་ཡོད། སྐབས་དེར་སྐུ་མགྲོན་གཙོ་བོ་བཀའ་ཁྲི་མཆོག་གིས་ཐོག་མ་སྣང་གསལ་ཞལ་ཕྱེ་དང་ཐང་བྲིས་སྒྱུ་རྩལ་ཚོགས་པ་གསར་པ་དེ་དབུ་འབྱེད་གནང་ཡོད། དེ་ནས་བཀའ་ཁྲི་མཆོག་གིས་ཐང་བྲིས་ཚོགས་པ་དེ་ནི་བཀའ་ཤག་གི་གཞི་རིམ་ལྟ་གྲུབ་ཆིག་སྒྲིལ་དང། གསར་གཏོད། རང་ཁ་རང་གསོ་བཅས་ལག་བསྟར་གནང་བར་བསྔགས་བརྗོད་གནང་ཡོད། མཛད་སྒོ་དེའི་དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་དོན་རྒྱུད་དགའ་ཚལ་གླིང་གི་དགོན་བདག་དགེ་བཙུན་མ་བསྟན་འཛིན་དཔལ་མོ་ལགས་རྣམ་གཉིས་ཀྱང་གདན་ཞུས་གནང་ཡོད། སྐབས་དེར་སྤྱི་འཐུས་ཚོགས་གཞོན་མཆོག་གིས་ཐང་བྲིས་རིག་གཞུང་དེ་བཞིན་ཚོང་ཁོ་ནའི་ཆེད་མ་དམིགས་པར་ལོ་རྒྱུས་ལྡན་པའི་ཐུན་མོང་མ་ཡིན་པའི་ཐང་བྲིས་རིག་གཞུང་དར་འཕེལ་དང་། ལྷག་པར་ཐང་བྲིས་དགེ་རྒན་གསོ་སྐྱོང་སོགས་གནང་བར་སྤོབས་སེམས་འཕེལ་དགོས་པ་ཞིག་ཆགས་ཡོད་སྐོར་གསུངས་ཡོད། དེ་བཞིན་སྐུ་མགྲོན་གཞན་ཁག་གཅིག་གིས་གཙོས་མང་ཚོགས་བརྒྱ་སྐོར་ཁ་ཤས་ལ་ཚོགས་པའི་འགན་འཛིན་སྐལ་བཟང་དམ་ཆོས་ལགས་ཀྱིས་ཐང་བྲིས་ཚོགས་པ་ངོ་སྤྲོད་དང་ཆབས་ཅིག་ཐང་བྲིས་ཚོགས་པ་དེ་བཞིན་གསར་འཛུགས་བྱེད་དགོས་དོན་གཙོ་བོ་ནི་ཐང་བྲིས་སྒྱུ་རྩལ་ཐོག་ཆེད་ལས་མི་སྣ་འཐོན་ཐབས་བྱ་རྒྱུ་ཡིན་ཞེས་བརྗོད་གནང་ཡོད། དེ་བཞིན་ཁོང་གིས་ཐང་བྲིས་ཚོགས་པ་གསར་འཛུགས་འདིས་བརྒྱུད་བོད་ནང་རང་ལུས་མེར་སྲེག་གཏོང་གནང་མཁན་རྣམས་ཀྱི་ཞལ་ཆེམས་ཟུར་ཙམ་སྒྲུབ་ཐུབ་པའི་རེ་བ་དང། ལྷག་པར་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་འཕེལ་གླིང་ནས་ལོ་རྗེས་མའི་གསུམ་བཅུའི་དུས་དྲན་སྐབས་བོད་མི་རྒྱལ་གཅེས་པ་ཕོ་མོ་ཡོངས་ཀྱིས་བློས་གཏོང་ལ་རྗེས་དྲན་ཞུ་ཆེད་རྒྱལ་བ་རིགས་ལྔའི་སྐྱེས་རྟགས་བཞེང་རྒྱུ་ཡིན་ཞེས་གསུངས་ཡོད། སྤྱིར་སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་འཕེལ་གླིང་ནང་ད་ལྟའི་ཆར་སློབ་མ་ཉི་ཤུ་ཙམ་ཡོད་པ་བཅས།།
