༢༠༡༢ ཟླ་ ༩ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༤ རེས་གཟའ་ཟླ་བའི་ཕྱེད་ཡོལ་ཆུ་ཚོད་ ༣།༣༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ས་བྱི་ཁྲག་བྲིས་དམར་པོ། ཞེས་པའི་དཔེ་དེབ་དབུ་འབྱེད་གནང་ཡོད། དེ་ཡང་ཐོག་མར་རྡ་སར་རྟེན་གཞི་བྱས་པའི་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་ངམ་བོད་ཀྱི་བང་ཆེན་གསར་ཁང་གི་ལྷོ་ཕྱོགས་ས་གནས་གསར་འགོད་པ་བཀྲིས་བདེ་ལེགས་ལགས་ཀྱིས་དཔེ་དེབ་ངོ་སྤྲོད་སྙིང་བསྡུས་གནང་བའི་ནང། ཕྱི་ལོ་ ༢༠༠༨ ལོར་བོད་དུ་ས་བྱི་ཞི་རྒོལ་ཆེན་མོའི་ནང་རྩོམ་པ་པོ་རང་ཉིད་ཀྱིས་དངོས་སུ་མཐོང་ཐོས་བྱུང་བའི་གནས་ཚུལ་དང་བོད་མིས་ཞི་རྒོལ་བྱས་པ། རྒྱ་ནག་གིས་བོད་མི་ཞི་རྒོལ་བ་རྣམས་ལ་དྲག་གནོན་ཇི་ལྟར་བྱས་ཚུལ། བོད་མིའི་རེ་བ་དང་འབོད་སྒྲ་གང་བསྒྲགས་པ། རྒྱ་ནག་གིས་འཁྱོག་བཤད་དང་རྫུན་སྒྲིག་གཏམ་བཤད་གང་འདྲ་བཤད་པ་བཅས་ཀྱི་གནས་ཚུལ་སྒྲོ་འདོགས་འཁྱོག་བཤད་མེད་པར་ཕྱོགས་སྒྲིག་བྱས་པའི་དཔེ་དེབ་ཞིག་ཡིན་སྐོར་སོགས་ཞིབ་ཕྲ་ངོ་སྤྲོད་གནང་ཡོད།
དེ་ཡང་དཔེ་དེབ་འདིའི་རྩོམ་པ་པོ་ཁོང་སློབ་གྲྭའི་དགེ་རྒན་ཞིག་ཡིན་འདུག དེང་སྐབས་ཁོང་རྒྱ་ནག་གཞུང་གིས་འཛིན་བཟུང་བཀག་ཉར་འོག་ཡོད་སྟབས། བོད་ནང་དུ་དཔེ་དེབ་འདི་བཞིན་འདོན་སྤེལ་ཐུབ་ཐབས་བྲལ། དེར་བརྟེན་འབྲེལ་ཡོད་མི་སྣ་བརྒྱུད་རྒྱ་གར་ནང་བཏང་སྟེ་པར་སྐྲུན་ཞུས་པ་ཞིག་ཡིན་འདུག དཔེ་དེབ་འདི་བཞིན་རྒྱ་གར་ནང་འགྲེམས་སྤེལ་གནང་མཁན་རྡ་སར་རྟེན་གཞི་བྱས་པའི་བོད་ཀྱི་བང་ཆེན་གསར་ཁང་གི་ལྷོ་ཕྱོགས་ས་གནས་གསར་འགོད་པ་བཀྲིས་བདེ་ལེགས་དང་ཁོང་གི་ཕྱག་རོགས་ཤིག་ཡིན་འདུག་པ་བཅས།།
