༢༠༡༢ ཟླ་ ༩ ཚེས་ ༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢ ཉིན་བཙན་བྱོལ་བོད་མིའི་ཡང་དག་པའི་མང་གཙོའི་ལམ་བཟང་དབུ་བརྙེས་ཏེ་མི་ལོ་ ༥༢ ཧྲིལ་པོ་འཁོར་བའི་དུས་དྲན་སྲུང་བརྩིའི་ཉིན་མོ་དང་སྟབས་བསྟུན། བཞུགས་སྒར་ཉེ་འགྲམ་དུ་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲེམས་སྟོན་ཚན་པའི་ཚོགས་ཁང་ནང་སྔ་དྲོ་ཆུ་ཚོད་ ༡༠།༣༠ ཙམ་ལ་ཨོ་སི་ཊོ་ལི་ཡར་རྟེན་གཞི་བྱས་པའི་རྒྱ་རིགས་རུས་ཆི་རིག་གཞུང་ཐེབས་རྩ་ཁང་གིས་ཕྱི་ལོ་ ༢༠༠༨ ལོར་བོད་ནང་གི་དངོས་ཡོད་གནས་ཚུལ་སྐོར་གྱི་གློག་བརྙན་བཟོ་སྐྲུན་པ་དོན་གྲུབ་དབང་ཆེན་ལགས་ཀྱི་དངོས་བྱུང་གློག་བརྙན་༼འཇིགས་བྲལ་༽ཞེས་པར་ཐེབས་རྩ་ཁང་དེའི་ཐེངས་ལྔ་བའི་༼རྒྱ་ནག་ཡར་ཐོན་སྐུལ་འདེད་དམིགས་བསལ་གཟེངས་རྟགས་༽ ཞེས་པ་གནང་རྒྱུའི་མཛད་སྒོ་སྟབས་བདེ་ཞིག་ཚོགས་ཏེ། ཐེབས་རྩ་ཁང་གི་རྒྱ་རིགས་བུད་མེད་ཆི་ཅཱ་ཀྲིན་གྱིས་ཐེབས་རྩ་ཁང་གི་ལོ་རྒྱུས་ངོ་སྤྲོད་དང་འབྲེལ་དོན་འགྲུབ་དབང་ཆེན་ལ་གཟེངས་རྟགས་དེ་ཕུལ་དགོས་པའི་རྒྱུ་མཚན་ངོ་སྤྲོད་གནང་རྗེས། དོན་གྲུབ་དབང་ཆེན་ལགས་ཀྱི་བུ་མོ་ཆུང་ཤོས་རང་ལོ་ ༡༡ ཡིན་པ་ལྷ་མོ་སྒྲོལ་མས་རང་གི་ཕ་དོན་གྲུབ་དབང་ཆེན་གྱི་ཚབ་ཞུས་ཏེ་གཟེངས་རྟགས་དེ་ཞུས་ཡོད། རུས་ཆི་ཐེབས་རྩ་ཚོགས་པའི་ཚོགས་གཙོ་ཆི་ཅཱ་ཀྲིན་ལགས་ཀྱིས་བརྗོད་པ་ལྟར་ན། ཁོང་གི་ཕ་རྒན་ཆི་ཙིན་ཀྲི་ཡིས་རྒྱ་ནག་དམར་པོའི་སྲིད་གཞུང་ལ་ངོ་རྒོལ་བྱས་སྟབས་ལོ་ ༣༠ རིང་རྒྱའི་བཙོན་འོག་ཏུ་ཚུད་ཡོད་པ་མ་ཟད། མོ་རང་ཡང་ལོ་ ༡༠ རིང་རྒྱའི་བཙོན་འོག་ཏུ་བསྡད་ཡོད་འདུག་ལ། གཟེངས་རྟགས་འདི་རྒྱ་ནག་ནང་གི་གཞི་རིམ་མི་མང་ཚོའི་དཀའ་སྡུག་གི་འབོད་སྒྲ་སྒྲོག་མཁན་གྱི་རྩོམ་པ་པོ་དང་དངོས་བྱུང་གློག་བརྙན་བཟོ་སྐྲུན་བྱེད་མཁན་ཕུལ་དུ་བྱུང་བ་ཚོར་སྤྲོད་ཀྱི་ཡོད་འདུག་པ་བཅས།།