༢༠༡༢ ཟླ་ ༩ ཚེས་ ༡༧་རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༡༦ རེས་གཟའ༌ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་མ་སུ་རིར་རྟེན་གཞི་བྱས་པའི་དབྱིན་ཇིའི་སློབ་གྲྭ་སྙན་གྲགས་ཅན་ཝུཌ་སི་ཊོཀ་ (Woodstock School) ཞེས་པར་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་རྣམས་ལ་བཀའ་སློབ་སྩལ་དོན། ངོས་ཀྱིས་རྒྱུན་ལྡན་ལྟར་ཁྱེད་རྣམས་ལ་ཆོས་གྲོགས་ཕོ་མོ་ཚོ་ཞེས་འབོད་ནས་འཚམས་འདྲི་ཞུ་དགོས་པའི་རྒྱུ་མཚན་ནི་ང་ཚོས་ཡང་ཡང་ང་ཚོ་ཚང་མ་འགྲོ་བ་མིའི་རིགས་གཅིག་མཚུངས་ཤིག་ཡིན་པ་དེར་སྣང་མེད་ལྟ་བུས་བརྗེད་དེ་མཚམས་རེ་ཕན་ཚུན་མི་འདྲ་བ་ཕྲན་བུ་ཡོད། དཔེར་ན། རིགས་རུས་དང། ཆོས་ལུགས། རྒྱལ་ཁབ གོ་གནས་སོགས་ལ་གཙིགས་ཆེན་པོར་འཛིན་བཞིན་ཡོད།
དེ་ལྟར་བྱས་པའི་རྐྱེན་གྱིས་དམག་འཁྲུག་དང་འཁོན་རྩོད་སོགས་ཀྱི་རྒྱུ་རྐྱེན་བྱས་ཏེ་ང་ཚོ་དང་ཁོང་ཚོ་ཞེས་ཕན་ཚུན་དབར་དབྱེ་འབྱེད་ཀྱི་ས་མཚམས་ཤིག་རང་བཞིན་གྱིས་ཡོང་གི་ཡོད། གོ་ལ་གཅིག་གྱུར་གྱི་དཔལ་འབྱོར་ལམ་ལུགས་ལྟར་རྒྱལ་སྤྱིའི་རང་བཞིན་ལྡན་པའི་སློབ་གྲྭ་འདིའི་ནང་དུ་ཆ་བཞག་ནའང་། རྒྱལ་ཁབ་དང་མི་རིགས་ཀྱི་ས་མཚམས་ལས་བརྒལ་བའི་ལྟ་ཚུལ་ཞིག་ང་ཚོས་བཟུང་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། དེང་སྐབས་ཁོར་ཡུག་གནད་དོན་ཐོག་ལའང་ལྟ་ཚུལ་དེ་བཟུང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། གང་ཡིན་བརྗོད་ན། ཁོར་ཡུག་གི་གནད་དོན་དེ་རྒྱལ་མཚམས་དང་མི་རིགས་ཀྱི་དབྱེ་བ་གང་ཡང་མེད་པའི་ཐོག་ནས་ང་ཚོ་ཚང་མའི་བདེ་དོན་དང་ཐད་ཀར་འབྲེལ་བ་ཆགས་ཡོད།
ཅེས་བཀའ་སློབ་སྩལ་རྗེས་བྱམས་བརྩེའི་སྐོར་བཀའ་སློབ་སྩལ་དོན། ང་ཚོ་ཚང་མ་མའི་བྱམས་བརྩེའི་འོག་འཚར་ལོངས་བྱུང་བར་བརྟེན། གཞན་ལ་བྱམས་བརྩེའི་རྣམ་པ་སྟོན་རྒྱུར་སྐྱེ་སྟོབས་ཀྱི་ནུས་པ་ལྡན་ཡོད་པས་ཚང་མས་དེ་མཚུངས་གལ་ཆེན་པོར་བརྩི་སྟེ་འབད་བརྩོན་གང་ཡོད་བྱེད་དགོས། ཕྱི་དངོས་པོའི་མཐུན་རྐྱེན་འཛོམས་ཀྱང་སེམས་མ་སྐྱིད་པ་བྱས་ནས་སྡོད་མཁན་འབྱོར་ལྡན་མང་པོ་མཐོང་རྒྱུ་ཡོད།
དེའི་རྒྱུ་རྐྱེན་གཙོ་བོ་རང་གཅེས་འཛིན་གྱི་བསམ་བློ་ལས་བྱུང། བསམ་བློ་དེ་ཤུགས་ཆེན་པོ་ཆགས་སྐབས་མི་གཞན་ལ་དོགས་པ་བྱ་རྒྱུ་དང། དེས་མི་གཞན་ལ་སྡང་སེམས་དང་ཁྲོ་བ་སོགས་ཡོང་བཞིན་ཡོད། ཉོན་མོངས་དེ་དག་གིས་རང་ཉིད་ཀྱི་ལུས་ཀྱི་ཟུངས་ཤུགས་ཀྱང་ཉམས་ཉེས་སུ་གཏོང་བཞིན་ཡོད་པ་ཚན་རིག་པ་ཚོས་བརྟག་དཔྱད་ཀྱི་ལམ་ནས་གསལ་བཤད་ཐུབ་ཡོད། ཅེས་སོགས་ཀྱི་བཀའ་སློབ་སྩལ་བསྟུན། སློབ་ཕྲུག་ཚོའི་དྲི་བར་བཀའ་ལན་མཛད། དེ་རྗེས་སློབ་གྲྭའི་སློབ་སྤྱི་སྐུ་ཞབས་ཇོ་ན་ཐན་ལོང་ Mr Jonathan Long དང་ཁོང་གི་བཟའ་ཟླ་གཉིས་ཀྱིས་༸གོང་ས་མཆོག་ལ་ཕྱག་རྟགས་འབུལ་ལམ་ཞུས་སྐབས་ཚོགས་བཅར་བ་ཚང་མས་དགའ་བསུའི་ཐལ་མོ་དྲག་ཏུ་བརྡབ། དེ་རྗེས་ཁུལ་དེ་ནས་མ་སུ་རི་བོད་ཁྱིམ་སློབ་གྲྭར་ཆིབས་༸ཞལ་སྒྱུར། ཕྱི་ཚེས་ ༡༧ ཉིན་མ་སུ་རི་བོད་ཁྱིམ་སློབ་གྲྭ་དབུ་བརྙེས་ནས་མི་ལོ་ཧྲིལ་པོ་ལྔ་བཅུ་འཁོར་བའི་དུས་དྲན་སྲུང་བརྩིའི་མཛད་སྒོར་དབུ་བཞུགས་མཛད་རྒྱུ་ཡིན་འདུག་པ་བཅས།།
