༢༠༡༢ ཟླ་ ༨ ཚེས་ ༢༤ རེས་གཟའ་པ་སངས།
༄༅། །ཨ་རིའི་གྲོས་ཚོགས་ནང་བོད་དོན་སྙན་སེང་དང་འབྲེལ་འདས་པའི་ལོ་གཉིས་ནང་བོད་མིའི་རང་ལུས་མེར་བསྲེགས་དང་ས་ཆའི་ཁྱབ་ཚད་ཆེ་རུ་ཕྱིན་ཡོད་སྐོར་གསུངས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར། ཕྱི་ལོ་ ༢༠༡༢ ཟླ་ ༨ ཚེས་ ༢༢ ཉིན་ཨ་རིའི་གྲོས་ཚོགས་ཀྱི་ཁྱབ་ཁོངས་རྒྱ་ནག་དང་འབྲེལ་བའི་ཚོགས་ཆུང་ནས་གྲོས་ཚོགས་ནང་བོད་ནང་གི་ཛ་དྲག་གནས་སྟངས་སྙན་གསེང་ཞུས་པ་དང་ཆབས་ཅིག་ཕྱི་ལོ་ ༢༠༡༡ ནས་ད་བར་བོད་ནང་གི་བོད་མི་རང་ལུས་མེར་སྲེག་གཏོང་མཁན་ཇེ་མང་དུ་སོང་ཡོད་པ་མ་ཟད། ས་ཆའི་ཁྱབ་ཚད་ཀྱང་ཆེ་རུ་ཕྱིན་ཡོད་གསུངས་པ་ལྷན་བོད་མིས་རང་ལུས་མེར་སྲེག་གཏོང་དགོས་དོན་ནི། རྒྱ་ནག་གཞུང་ནས་ཁྲིམས་ལུགས་བེད་སྤྱོད་ལོག་པ་བཏང་སྟེ་བོད་ཀྱི་རིག་གཞུང་རྩ་གཏོར་བཏང་དང་གཏོང་མུས་ཡིན་པ་མ་ཟད། བོད་མི་རིགས་ལ་མནར་གཅོད་དང་དམ་བསྒྲགས་སོགས་བྱེད་ཤུགས་ཆེ་རུ་བཏང་ཡོད། ལྷག་པར་བོད་རྒྱ་གྲོས་མོལ་ལ་བཟང་ཕྱོགས་ཀྱི་གྲུབ་འབྲས་གང་ཡང་སོན་མེད་པར་བརྟེན་ནས་བྱུང་བ་ཞིག་ཡིན། དེ་བཞིན་ད་བར་རྒྱ་ནག་གཞུང་ནས་ནོར་འཁྲུལ་ཅན་གྱི་སྲིད་བྱུས་བཟུང་སྟབས། བོད་མིས་མི་འདོད་པའི་སྒོ་ནས་རྣམ་པ་འདྲ་མིན་གྱི་ཞི་རྒོལ་ལས་འགུལ་སྤེལ་མུས་ཡིནའང། རྒྱ་ནག་གཞུང་ནས་སྲིད་བྱུས་དེར་བསྒྱུར་བཅོས་གཏོང་རྒྱུ་ལས་ལྡོག་སྟེ་བོད་མིའི་ལས་འགུལ་ལ་བསྙད་འདོགས་འདྲ་མིན་བྱེད་བཞིན་ཡོད་སྐོར་གསུངས་ཡོད།
རྩ་བའི་ཚོགས་ཆུང་དེ་ནས་ཐེངས་འདི་ཙམ་མ་ཟད། སྔ་ལོ་ཕྱི་ཟླ་ ༡༢ ནང་ལ་ཡང་གྲོས་ཚོགས་ནང་བོད་མི་རང་ལུས་མེར་བསྲེགས་ཀྱི་གནད་དོན་དང་ཁ་གྲངས་སོགས་སྙན་སེང་ཞུས་ཡོད་པའི་ནང་ཕྱི་ལོ་ ༢༠༠༩ ལོའི་ཕྱི་ཟླ་ ༢ པ་ནས་ ༢༠༡༡ ཕྱི་ཟླ་ ༡༢ བར་ཁྱོན་བོད་མི་ ༡༣ བྱུང་ཡོད་པ་དང་། དེའི་ནང་ནས་བོད་མི་བཅུ་གཉིས་རྒྱ་ནག་གཞུང་ནས་དབྱེ་བའི་ཟི་ཁྲོན་ཞིང་ཆེན་ནས་ཡིན་སྐོར་སོགས་གསུངས་ཡོད་པ་བཅས། །
