༢༠༡༢་ཟླ་ ༨ ཚེས་ ༢༩ རེས་གཟའ་ལྷག་པ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། རྔ་པ་རང་སྐྱོང་ཁུལ་འབར་ཁམས་རྫོང་རྒྱལ་རོང་ཚོ་བདུན་ཀིརྟི་དགོན་པའི་ཆོས་ལུགས་དོ་དམ་ལས་ཁུངས་ཀྱི་ལས་བྱེད་རང་ལོ་ ༣༤ ཡིན་པ་དགེ་འདུན་པ་བློ་བཟང་རབ་བརྟན་ལགས་འདི་ཟླའི་ཚེས་ ༡༩ ཉིན་གྱི་མཚན་མོ་འཛིན་བཟུང་གིས་སྐབས་ཤིག་གར་སོང་ཆ་མེད་དུ་གྱུར་འདུག འོན་ཀྱང་འབྲེལ་ཡོད་དགོན་གྲོང་རྣམས་ཀྱིས་རྩད་གཅོད་རིམ་པར་བྱས་མཐར་འབར་ཁམས་སུ་བཀག་ཉར་བྱས་ཡོད་པ་ཙམ་ལས། ད་ལྟའི་གནས་སྟངས་དང་རྒྱུ་མཚན་ཅིའི་ཕྱིར་བཀག་ཉར་བྱས་པ་སོགས་གཅིག་ཀྱང་ཤེས་རྟོགས་བྱུང་ཐུབ་མེད།
ཁོང་ནི་འབར་ཁམས་རྫོང་ཚོ་བདུན་ཞང་། གཙུག་ཚེ་སྡེ་བའི་རུ་ཆེན་གཉིས་པའི་འཚམ་འབྲས་ཚང་ཡིན་པ་དང་། ཕ་མིང་ལ་ཚེ་རིང་པོ་པོ་དང་། མ་མིང་ལ་སྒྲོལ་མ་ཡིན་འདུག དེའི་གོང་དུ་རིམ་པར་འཛིན་བཟུང་བྱས་པའི་དགེ་འདུན་པ་རྣམས་གཅིག་ཀྱང་གློད་བཀྲོལ་བྱས་མེད་པ་བཅས།།