ལུང་རྟོགས་ལགས་དང་བཀྲ་ཤིས་ལགས་གཉིས་ཀྱིས་རང་ལུས་མེར་སྲེག་གཏོང་སྐབས་ཀྱི་འདྲ་པར།
༢༠༡༢ ཟླ་ ༨ ཚེས་ ༡༦ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༨ ཚེས་ ༡༥ ཉིན་བཏང་གནས་ནང་འཁོད་དོན།
ཕྱི་ལོ་ ༢༠༡༢ ཟླ་ ༨ ཚེས་ ༡༣ ཉིན་རང་ལུས་མེར་སྲེག་ལམ་ནས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་གནང་མཁན་རྒྱལ་གཅེས་དཔའ་བོ་བཀྲ་ཤིས་ལགས་རྔ་པ་བོད་རིགས་རང་སྐྱོང་ཁུལ་གྱི་ལྟེ་གནས་འབར་ཁམས་སུ་ཕྱི་ཚེས་ ༡༤ ཉིན་འདས་གྲོངས་སུ་གྱུར་ཡོད་ཀྱང་ཁོང་གི་སྐུ་ཕུང་ནང་མིར་སྤྲད་ཡོད་མེད་གསལ་པོ་ཤེས་རྟོགས་བྱུང་མེད།
བཀྲ་ཤིས་ལགས་བཙན་འཁྲིད་བྱེད་བཞིན་པ།
རྒྱལ་གཅེས་དཔའ་བོ་ཁོང་གཉིས་ཀྱིས་ཕྱི་ཚེས་ ༡༣ ཉིན་རང་ལུས་མེར་སྲེག་བཏང་བར་བརྟེན་ཤུལ་ལུས་ནང་མི་དང་བཅས་པར་གདུང་སེམས་མཉམ་སྐྱེ་མཚོན་ཆེད་ཕྱི་ཚེས་ ༡༤ ཉིན་རྔ་པའི་རྫོང་མཁར་གྱི་བོད་པའི་ཟ་ཁང་དང་ཚོང་ཁང་ཚང་མ་སྒོ་བརྒྱབ་སྟེ་རྔ་པ་མི་མང་གིས་དགོན་པ་ཁག་ལ་བསྔོ་རྟེན་ཕུལ་བ་དང་སྐོར་ར། ཕྱག་མཆོད་འབུལ་སོགས་བྱས་ཏེ་གདུང་སེམས་མཉམ་སྐྱེའི་རྣམ་པ་སྟོན་གང་ཐུབ་བྱས་ཡོད་འདུག 
ཕྱི་ཚེས་ ༡༣ ཉིན་གྱི་དོན་རྐྱེན་རྗེས་སུ་རྔ་པ་ཀིརྟི་དགོན་པའི་དགེ་བསྐོས་དང་ཆོས་ལུགས་དོ་དམ་ཁང་གི་འགན་འཛིན་སོགས་དགོན་པའི་ལས་སྣེ་ཁག་གཅིག་རྫོང་སྲིད་གཞུང་དུ་ཐེངས་ཁ་ཤས་འབོད་འགུག་གིས་ཚོགས་འདུ་སྐོང་ཡོད་འདུག་པ་བཅས།།
