༢༠༡༢ ཟླ་ ༨ ཚེས་ ༡༦ རེས་གཟའ་ཕུར་བུ།
བསྟན་ཉི་ལགས།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༨ ཚེས་ ༡༥ ཉིན་བཏང་གནས་ནང་འཁོད་དོན། ཕྱི་ལོ་༢༠༡༢ ཟླ་༡ ཚེས་ ༦ ཉིན་རང་ལོ་ ༢༠ ཡིན་པའི་རྒྱལ་གཅེས་དཔའ་བོ་བློ་བཟང་ཚུལ་ཁྲིམས་དང་ལྷན་དུ་རྔ་པ་རྫོང་ནས་རང་ལུས་མེར་སྲེག་བཏང་ཞིང་། ཉིན་དེར་འདས་གྲོངས་སུ་གྱུར་པའི་རྒྱལ་གཅེས་དཔའ་བོ་བསྟན་ཉི་ལགས་ཀྱི་འདྲ་པར་སྐབས་དེར་ལག་སོན་བྱུང་མེད་ཀྱང་། ཉེ་ཆར་བོད་ནས་སྐུར་འབྱོར་བྱུང་བ་འདི་ཡིན་འདུག་པ་དང་། བསྟན་ཉི་ནི་རྔ་པ་རྫོང་མཐའ་བ་གོང་མ་ནས་ཡིན་ཞིང་། རང་ལོ་༢༠ ། ཕ་མིང་ལ་ཡར་འཕེལ་ཡིན། ཁོང་ཆུང་ཆུང་སྐབས་ཀིརྟི་དགོན་པར་གྲྭ་པ་བྱས་ཤིང་ལོ་ཤས་གོང་སྐྱ་སར་བབ་པ་ཞིག་ཡིན་འདུག ཕྱི་ལོ་ ༢༠༡༢ ཟླ་ ༢ ཚེས་ ༨ ཉིན་བོད་ཨ་མདོ་རྔ་པ་ནས་རང་ལུས་མེར་སྲེག་གིས་ངོ་རྒོལ་གནང་མཁན་རིག་འཛིན་རྡོ་རྗེའམ་རིག་བྷེ། རང་ལོ་ ༡༩ ཡིན་པ་ཁོང་གི་འདྲ་པར་སྐབས་དེར་ལག་སོན་མ་བྱུང་བ་ཉེ་ཆར་ལག་སོན་བྱུང་བ་ཟུར་གསལ་གྲྭ་ཆས་གྱོན་ཡོད་པ་དེ་ཡིན་མོད།
རིག་འཛིན་རྡོ་རྗེ་ལགས།
དཔར་འདི་ཁོང་གྲྭ་པ་ཡིན་སྐབས་ཀྱི་པར་ཡིན་པ་མ་གཏོགས་རང་ལུས་མེར་སྲེག་གཏོང་སྐབས་ཁོང་མི་སྐྱ་ཡིན་འདུག ཁོང་གི་ཕ་མིང་བརྩོན་ཁོ་དང། མ་མིང་ལ་དུང་དཀར་ཡིན། ཁོང་འདི་ལོའི་ཕྱི་ཟླ་ ༢ ཚེས་ ༢༡ ཉིན་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་དུ་འདས་གྲོངས་སུ་གྱུར་ཡོད་པ་བཅས།།
