༢༠༡༢ ཟླ་ ༨ ཚེས་ ༡༣ རེས་གཟའ་ཟླ་བ།

༄༅། །འདིར་བོད་ནས་གནས་ཚུལ་ཁུངས་ལྡན་འབྱོར་དོན། ཕྱི་ཟླ་ ༦ ཚེས་ ༡༨ ཉིན་མདོ་སྨད་ཀན་ལྷོ་ཁུལ་རྨ་ཆུ་རྫོང་དབལ་བཎ་ཡུལ་འཚོའི་༼ཞིང་༽རོང་སྐོར་སྡེ་བའི་འབྲོག་པ་གཞོན་ནུ་དཔལ་ལྡན་ཞུ་བ་ཡུལ་འཚོའི་ཇ་ཁང་ཞིག་ཏུ་ཡོད་སྐབས། རྨ་ཆུ་རྫོང་གི་བདེ་འཇགས་རུ་ཁག་ཟེར་བ་དང་སྤྱི་བདེ་ཇུས་གཉིས་མཉམ་འབྲེལ་གྱིས་སྣུམ་འཁོར་ཆུང་བ་དཀར་ནག་བཞི་ལྔ་ཞིག་ཡོང་སྟེ་གཞོན་ནུ་དཔལ་ལྡན་ལགས་འཛིན་བཟུང་བཙན་ཁྲིད་བྱས་འདུག དེ་ཉིན་ནང་མི་སོགས་འབྲེལ་ཡོད་ཀྱི་མི་སུས་ཀྱང་ཁོང་རྫོང་ཐོག་ཏུ་ཁྲིད་སོང་བ་ཙམ་ལས་གནས་ཚུལ་ཅི་ཡང་ཤེས་རྟོགས་ཐུབ་མི་འདུག  ཕྱི་ཚེས་ ༢༠ ཉིན་འབྲེལ་ཡོད་ཀྱི་ཡུལ་མི་བཅུ་གྲངས་ཤིག་རྫོང་ཐོག་ཏུ་སོང་སྟེ་འབྲེལ་ཡོད་ལས་ཁུངས་ལ་འབྲེལ་བ་བྱེད་སྐབས། ཁོང་ཚོའི་ནང་ནས་མི་ལྔ་ལས་ཁུངས་ནང་དུ་ཡོང་བཅུགས་ཏེ་རྒྱ་དཔོན་ཚོས་བཤད་དོན། གཞོན་ནུ་དཔལ་ལྡན་ཕྱི་ལོ་ ༢༠༠༨ ལོར་དབལ་དབཎ་ཡུལ་འཚོ་རུ་སེར་སྐྱ་མི་མང་གིས་ཉིན་གསུམ་རིང་ངོ་རྒོལ་བྱེད་སྐབས་ཀྱི་མི་མང་གི་ཚོགས་གཙོའམ་མགོ་ཁྲིད་གཙོ་བོ་དེ་ཡིན་པ་ང་ཚོས་འདིར་འཛིན་བཟུང་བྱས་པའི་མི་མང་བོ་ཞིག་གིས་ཤོད་བཞིན་འདུག  དེ་བས་ང་ཚོས་གཞོན་ནུ་དཔལ་ལྡན་ཁོང་འདིར་སྐད་བཏང་བ་ཡིན། ང་ཚོས་ད་དུང་ཟླ་གཅིག་རིང་ཁོང་ལ་འདྲི་གཅོད་བྱས་རྗེས་གཏོང་རྒྱུ་ཡིན་པས་ཁྱེད་རང་ཚོ་ཕྱིར་སོང་། ཞེས་བཤད་འདུག ད་ལྟའི་ཆར་གཞོན་ནུ་དཔལ་ལྡན་གང་ཡོད་དང་ཅི་བྱས་ཀྱི་གནས་ཚུལ་ཅི་ཡང་གསལ་བོ་ཤེས་རྟོགས་མེད། འབྲེལ་ཡོད་ཀྱིས་བཤད་པ་ལྟར་ན། སྤྱིར་གཞོན་ནུ་དཔལ་ལྡན་ལགས་ཕྱི་ལོ་ ༢༠༠༨ ལོ་ནས་ད་བར་རྒྱ་མིས་ཐེངས་མང་འཛིན་གྲབས་བྱས་འདུག་ཀྱང་མཚམས་རེ་རི་མགོ་དང་ལུང་ཁོག་སོགས་སུ་བྲོས་བྱོལ་དུ་སོང་བ་སོགས་བྱས་ཏེ་ད་བར་འཛིན་བཟུང་མ་ཐུབ་པ་རེད། འོན་ཀྱང་ད་ཐེངས་གློ་བུར་དུ་འཛིན་བཟུང་བྱས་སོང་ཞེས་བརྗོད། གཞོན་ནུ་དཔལ་ལྡན་ནི། རང་ལོ་ ༣༤ ཕ་མིང་ལ་མགོན་ཚེ་དང་། མ་མིང་ལ་བདེ་ཆེན་ཟེར་བ་དང་། འཚོ་ཐབས་འབྲོག་པ། རྨ་ཆུ་རྫོང་དབལ་བཎ་རོང་སྐོར་སྡེ་བའི་མི་ཡིན་འདུག་པ་བཅས།།