༢༠༡༢ ཟླ་ ༨ ཚེས་ ༢༨ རེས་གཟའ་མིག་དམར།
༄༅། །འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༢༩ ནས་ཟླ་ ༩ ཚེས་ ༧ བར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ལ་དྭགས་ཁུལ་དུ་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག དེ་ཡང་བཀའ་བློན་མཆོག་ཕྱི་ཚེས་ ༢༨ དགོང་དྲོ་རྡ་ས་ནས་པ་ཀོར་བརྒྱུད་ལྡི་ལིར་ཕེབས་ཐོན་དང༌། ཕྱི་ཚེས་ ༢༩ སྔ་དྲོ་ལྡི་ལི་ནས་ལ་དྭགས་སུ་མཁའ་ལམ་བརྒྱུད་ཕེབས་ཐོན་གནང་སྟེ་ཉིན་དེར་གཞིས་ཆགས་ཀྱི་སྡེ་ཁག་དང༌། སྨན་ཁང་ལ་གཟིགས་སྐོར་གནང་རྒྱུ་ཡིན་འདུག ཕྱི་ཚེས་ ༣༠ ཉིན་འཕྲོད་བསྟེན་དང་འབྲེལ་བའི་མི་སྣ་མཇལ་འཕྲད་རྗེས་སློབ་གྲྭར་གཟིགས་སྐོར་ཐོག་དགེ་ལས་སློབ་ཕྲུག་ལ་གསུང་བཤད་གནང་རྒྱུ་ཡིན་འདུག ཕྱི་ཚེས་ ༣༡ ཉིན་བསོད་ནམས་གླིང་གཞིས་ཆགས་ཀྱི་སྨན་ཁང་གསར་པ་དབུ་འབྱེད་གནང་རྒྱུ་ཡིན་པ་དང་ཉིན་རྒྱབ་གཞུང་སྒེར་སྨན་ཁང་ཁག་ལ་གཟིགས་སྒོར་གནང་རྒྱུ། ཕྱི་ཟླ་ ༩ ཚེས་ ༡ ཉིན་གཞིས་གྲོང་ཁག་ལ་འཚམས་གཟིགས་གནང་སྟེ་ཕྱི་ཚེས་ ༢ ཉིན་མང་གཙོ་དུས་དྲན་གྱི་མཛད་སྒོར་ཕེབས་རྒྱུ་ཡིན་འདུག ཕྱི་དྲོ་བསོད་ནམས་གླིང་གཞིས་ཆགས་ནས་ལ་བྱང་མཁར་ནག་ལ་ཕེབས་འབྱོར་གྱིས་མང་ཚོགས་ལ་གསུང་བཤད་གནང་རྗེས་མཁར་ནག་ནས་ས་སྨད་དུ་ཕེབས་ཐོན་དང་། ཕྱི་ཚེས་ ༣ ཉིན་ས་སྨད་མི་མང་ལ་གསུང་བཤད། དེ་བཞིན་ས་སྨན་ནས་གསུམ་མདོ་དང་ཆུ་མུར་གྱི་འབྲོག་སའི་ཁྲ་ཚང་དུ་ཕེབས་ཐོན་གྱིས་ཁུལ་དེའི་མི་མང་ལ་གསུང་བཤད་གནང་རྒྱུ་ཡིན་འདུག ཕྱི་ཚེས་ ༤ ཉིན་ལ་བྱང་ཁྲ་ཚང་ནས་ཆུ་ཤུལ་ལ་ཕེབས་ཐོན་གནང་སྟེ་ཁུལ་དེའི་མང་ཚོགས་ལ་གསུང་བཤད་གནང་རྗེས་ཕྱི་ཚེས་ ༥ ཉིན་ཆུ་ཤུལ་ནས་བསོད་ནམས་གླིང་དུ་ཕེབས་ཐོན་གནང་རྒྱུ། ཕྱི་ཚེས་ ༦ ཉིན་བསོད་ནམས་གླིང་བོད་མིའི་གཞིས་ཆགས་ཀྱི་འཐུང་ཆུ་དཀའ་ངལ་སེལ་ཐབས་སུ་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་སྦེང་ལོར་ནས་རྒྱ་གར་ཁྱད་ལས་མི་སྣ་བཞི་འབྱོར་ཡོད་པ་དེ་དག་གིས་ཞུ་སྒོ་ཁག་ལ་ས་གནས་ས་ཐོག་ཏུ་རྟོག་ཞིབ་གནང་རྒྱུ་དང༌། ཕྱི་ཚེས་ ༧ ཉིན་སྔ་དྲོ་ཆུ་ཚོད་ ༧།༤༥ ལ་དྭགས་ནས་ཇཱ་མུ་བརྒྱུད་རྡ་སར་ཕྱིར་ཕེབས་གནང་རྒྱུ་ཡིན་པ་འདུག་བཅས། །