༢༠༡༢ ཟླ་ ༨ ཚེས་ ༢༧ རེས་གཟའ་ཟླ་བ།
སིམ་ལ་ས་གནས་འགོ་འཛིན་གྱིས་བོན་གཞིས་ས་གནས་འགོ་འཛིན་ལ་རྩིས་སྤྲོད་གནང་བཞིན་པ།
༄༅། །འདི་གར་བོད་གཞིས་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་གོ་སྒྲིག་ཚོགས་ཆུང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༢༤ ཉིན་རྒྱ་གར་བྱང་ཁུལ་གྱི་བདེན་པའི་མེ་ལྕེ་སིམ་ལར་སྐོར་བསྐྱོད་ལེགས་པར་གྲུབ་སྟེ། གོང་ཚེས་ཉིན་སོ་ལན་བོན་གཞིས་ས་གནས་སུ་འབྱོར་ཡོད། སྐབས་དེར་བོན་གཞིས་ས་གནས་གཞིས་འགོ་དང་། བོན་གཞིས་ས་གནས་འཐུས་ཚོགས་ཀྱི་ཚོགས་གཙོ། རང་བདེན་ཚོགས་ཆུང་གི་ཚོགས་མི། གཡུང་དྲུང་བོན་འཛིན་སྐྱོང་ལྷན་ཚོགས་ཀྱི་སྐུ་ཚབ། བོན་གཞིས་སྨན་རི་གྲྭ་ཚང་གི་སྐུ་ཚབ། བོན་གཞིས་བཙུན་དགོན་གྱི་སྐུ་ཚབ། བོན་བུ་ཁྱིམ་ཁང་གི་སྐུ་ཚབ་དང་འཕྲོད་ལས་པ། ས་གནས་གཞོན་ནུ་ཚོགས་པའི་ཚོགས་གཙོ། བོད་ཀྱི་བོན་པོའི་ཚོགས་པའི་ཚོགས་གཞོན་བཅས་ལས་གྲུབ་པའི་བོན་གཞིས་ས་གནས་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་གོ་སྒྲིག་ཚོགས་ཆུང་ནས་ས་གནས་ཨོ་ཇིའི་སྒར་དུ་བདེན་པའི་མེ་ལྕེ་ཕེབས་བསུ་ཞུས་ཡོད། དེ་ནས་སིམ་ལ་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་ཚོགས་ཆུང་ནས་བདེན་པའི་མེ་ལྕེ་བོན་གཞིས་ས་གནས་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་གོ་སྒྲིག་ཚོགས་ཆུང་ལ་བརྒྱུད་སྤྲོད་གནང་ཡོད། ས་གནས་ཨོ་ཇིའི་སྒར་ནས་ཕེབས་བསུ་གནང་སྟེ་བོན་
སྨན་རིའི་བཤད་སྒྲུབ་མཁན་རིན་པོ་ཆེ་ནས་མེ་ལྕེ་ཕེབས་བསུ་གནང་བ།
གཞིས་སུ་འབྱོར་སྐབས་སྨན་རིའི་བཤད་སྒྲུབ་མཁན་རིན་པོ་ཆེས་དབུས་བོན་གཞིས་སེར་སྐྱ་མང་ཚོགས་དང་ས་གནས་ཉིན་སློབ་ཀྱི་སློབ་ཕྲུག་སོགས་མང་ཚོགས་སྟོང་ལ་ཉེ་བ་ཙམ་གྱིས་སེར་སྦྲེངས་བསྒྲིགས་ཏེ་བདེན་པའི་མེ་ལྕེ་གདན་ཞུས་རྗེས་བོན་གཞིས་གསང་སྔགས་སྒོམ་སྒྲུབ་གླིང་དུ་བོན་གཞིས་ས་གནས་འགོ་འཛིན་གཡུང་དྲུང་འཆི་མེད་ལགས་ཀྱིས་གཏམ་བཤད་གནང་། ཕྱི་ཚེས་ ༢༥ ཉིན་ནས་ས་རྟགས་བསྡུ་རུབ་སོགས་ཀྱི་ལས་འགུལ་རིམ་བཞིན་སྤེལ་ཡོད་པ་བཅས།།
