༢༠༡༢ ཟླ་ ༨ ཚེས་ ༡༠ རེས་གཟའ་པ་སངས།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༨ ཚེས་ ༡༠ ཉིན་གྱི་བོད་ནང་གི་སྔ་དྲོའི་དུས་ཚོད་ ༡༠།༡༥ ཙལ་ལ་བོད་མདོ་སྨད་རྔ་པ་རྫོང་རྨེའུ་རུ་མ་ཞང་། རུ་ཆེན་དང་པོའི་ཉག་སྐོར་མའི་ཕ་དཔའ་ལོ་དང་། མ་མ་སྒྲོན་གཉིས་ཀྱི་བུ་གཅོད་པ། རང་ལོ་ ༢༤ ཙམ་ཡིན་པ་ཁོང་གིས་རྨེའུ་རུ་མའི་ཞང་ཐོག་ནས་རང་ལུས་མེར་སྲེག་བཏང་སྟེ་འབར་མེ་དྲག་པོའི་ཀློང་དུ་ངོ་རྒོལ་སྐད་འབོད་བྱས་ཤིང་། སྐར་མ་ཁ་ཤས་ལས་མ་འགོར་བར་ས་གནས་སུ་ཡོད་པའི་ཉེན་རྟོག་པ་རྣམས་སླེབས་ཏེ་ཁོང་གི་ལུས་ལ་འབར་བཞིན་པའི་མེ་བསད་ནས་བཙན་ཁྲིད་བྱས་ཡོད་ཅིང་། དངོས་སུ་མཐོང་མཁན་ཁག་གཅིག་གིས་བརྗོད་པ་ལྟར་ན། སྐབས་ཐོག་དེར་འདས་གྲོངས་སུ་གྱུར་ཡོད་མེད་གསལ་པོ་མ་ཤེས་ཀྱང་མེས་ཚིག་པའི་རྨས་སྐྱོན་ཧ་ཅང་ཚབས་ཆེན་ཡིན་སྟབས། གསོན་པའི་རེ་བ་གཏན་ནས་མེད་ཚུལ་འདུག་ནའང་། ད་བར་ཚིག་ཐག་ཆོད་པོས་གྲོངས་ཡོད་མེད་འགྲེལ་བརྗོད་གནང་ཐུབ་མཁན་མ་བྱུང་ལ། སྐུ་ཕུང་གང་དུ་འཁྱེར་ཡོད་མེད་ཀྱང་གསལ་ པོ་ཤེས་རྟོགས་མ་ཐུབ། གནས་ཚུལ་བྱུང་མ་ཐག་ནས་རྨེའུ་རུ་མའི་ཞང་ཐོག་ཡོངས་སུ་དྲག་ཆས་ཉེན་རྟོག་པ་སོགས་ཀྱིས་ཁེངས་ནས་དམ་བསྒྲགས་ཤུགས་ཆེན་བྱས་འདུག་པ་བཅས། །