༢༠༡༢ ཟླ་ ༨ ཚེས་ ༧ རེས་གཟའ་མིག་དམར།
སྒྲིལ་དཀར་མཚོ༼སྐྱིད།༽
༄༅། །ཨ་མདོ་ཀན་ལྷོ་གཙོས་དགོན་པའི་མཆོད་རྟེན་མཐའ་རུ་བོད་རིགས་བུད་མེད་གཅིག་གིས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༨ ཚེས་ ༧ ཉིན་བོད་ནས་ (WeChat) བརྒྱུད་སྐད་བསྐུར་གནང་བ་ལྟར་ན། དེ་རིང་ཉིན་རྒྱབ་བོད་ནང་གི་ཆུ་ཚོད་ ༢།༣༠ ཙམ་ལ་ཨ་མདོ་ཀན་ལྷོ་ཁུལ་གཙོས་གྲོང་ཁྱེར་གྱི་ཉེ་འདབས་སུ་ཡོད་པའི་གཙོས་དགོན་པའི་གཡས་ངོས་ཀྱི་གླིང་སྐོར་ལམ་གྱི་མཆོད་རྟེན་མདུན་དུ། བོད་རིགས་བུ་མོ་རང་ལོ་ ༢༦ ཡས་མས་ཅན་ཞིག་གིས་རང་ལུས་མེར་སྲེག་བཏང་འདུག དེ་མ་ཐག་ཉེ་འཁོར་གྱི་སྐོར་བར་འགྲོ་མཁན་དག་གིས་མེ་གསོད་ཐབས་བྱས་ཡོད་ཀྱང་། རྗེས་སུ་བུ་མོ་དེ་འདས་གྲོངས་སུ་གྱུར་ཟིན་པའི་གནས་ཚུལ་ཞིག་ཀྱང་འབྱོར་འདུག
སྐད་འཇོག་མཁན་གྱིས་བརྗོད་དོན། གནས་ཚུལ་དེ་ངོ་མ་ཡིན་པ་དང་། ང་རང་ས་དེར་དངོས་སུ་ཡོད། སྐོར་བ་རྒྱག་མཁན་ཚོས་ཁོ་མོའི་ལུས་ཀྱི་མེ་བསད་དེ། ད་ལྟ་གྲྭ་མང་ཚོས་དགོན་པའི་གཞུང་གི་དོ་དམ་ཁང་དུ་སྲུང་སྟེ་ས་གནས་མང་ཚོགས་ཇེ་མང་དུ་འགྲོ་བཞིན་ཡོད་སྐོར་བརྗོད་འདུག
ཁོས་སྐད་བསྐུར་གཉིས་པ་འབྱོར་བའི་ནང་། “ ད་ལྟ་རང་གཙོས་དགོན་པའི་འཁྲིས་སུ་བོད་རིགས་བུད་མེད་གཅིག་གིས་རང་ལུས་མེར་སྲེག་བཏང་ཟིན་པ་མ་ཟད། ཁོང་མོ་དེ་མ་ཐག་འདས་གྲོངས་སུ་གྱུར་འདུག ཁོང་མོ་གཙོས་རྟ་གསར་སྡེ་བ་ནས་རེད། མིང་ལ་སྒྲོལ་དཀར་མཚོ་༼སྐྱིད།༽ཟེར་ཞིང་། ད་ལྟ་རང་ལོ་ ༢༦ རེད་འདུག” ཅེས་བརྗོད་འདུག
སྐད་སྐུར་གསུམ་པ་འབྱོར་བའི་ནང་། ” བུ་མོ་དེའི་ཨ་ཕའི་མིང་ལ་འབྲུག་རྒྱལ་མཁར་དང་། ཨ་མའི་མིང་ལ་སངས་རྒྱས་མཚོ་ཟེར་གྱི་འདུག ཁོང་མོས་རང་ལུས་མེར་སྲེག་བཏང་མ་ཐག་འདས་གྲོངས་སུ་འདུག ” ཅེས་བརྗོད་འདུག་པ་བཅས། །
