༢༠༡༢ ཟླ་ ༨ ཚེས་ ༧ རེས་གཟའ་མིག་དམར།
༄༅། །བཀའ་དྲུང་ཡིག་ཚང་ནས་ཕྱི་ལོ་ ༢༠༡༢ ཟླ་ ༨ ཚེས་ ༦ ཉིན་བཏང་བའི་བརྡ་ཁྱབ་ནང་གསལ། དབུས་སྣེ་ལེན་ཁང་གི་ལས་དོ་རྒས་ཡོལ་བ་ཐུབ་བསྟན་ཀུན་འཕེལ་ལགས་ཀྱིས་ཕྱི་ལོ་ ༢༠༡༢ ཟླ་ ༧ ཚེས་ ༣༠ འཁོད་པའི་ཞུ་ཡིག་ནང་ཁོང་རང་ཉིད་ད་ཆ་བུ་ཕྲུག་རྣམས་འཚར་ལོངས་ཀྱིས་འཚོ་བ་འགྲིག་ཙམ་ཡོད་པར་བརྟེན། གཞུང་སྩལ་རྒས་ཕོགས་ཕྱི་ལོ་ ༢༠༡༢ ཟླ་ ༧ ཚེས་ ༡ ནས་ཞུ་མི་དགོས་པར་གཞུང་གྲོན་སྔོན་རྩིས་ཀྱི་ཞལ་འདེབས་སུ་འབུལ་རྒྱུའི་ཐག་གཅོད་གནང་བར་བཀའ་ཤག་ལྷན་རྒྱས་ནས་ལེགས་གསོལ་དང་ཡི་རང་བསྔགས་བརྗོད་གནང་ཡོད། དེ་ཡང་ཐུབ་བསྟན་ཀུན་འཕེལ་ལགས་ཀྱིས་ཕྱི་ལོ་ ༡༩༦༦ ལོར་༸རྒྱལ་བའི་ཕོ་བྲང་གི་སྐུ་སྲུང་ཞབས་ཞུ་དང། དེ་རྗེས་རྡ་སྟེང་སྣེ་ལེན་ཁང་གི་འགན་འཛིན་གནང། ཕྱི་ལོ་ ༡༩༩༦ ཕྱི་ཟླ་ ༡༢ ཚེས་ ༡༡ ནས་སྣེ་ལེན་ཁང་གི་ལས་དོའི་ལས་འགན་ཞུ་མུས་ལ་ཕྱི་ལོ་ ༡༩༩༧ ཕྱི་ཟླ་ ༡༢ ཚེས་ ༡ ནས་རྒས་ཡོལ་སྔ་བསྣུར་ཞུ་སྩལ་བཅས་མི་ལོ་ ༣༠ ལྷག་བོད་རྒྱལ་ཁབ་དང་མི་རིགས་ཀྱི་དོན་དུ་ལྷག་བསམ་རྣམ་དག་གིས་ཞབས་ཞུ་སྒྲུབ་མཁན་སྲིད་ཞུ་བ་བཟང་མཐའ་འཁྱོལ་མཁན་ཞིག་ཡིན་འདུག་པ་བཅས།།