༢༠༡༡༢ ཟླ་ ༨ ཚེས་ ༢༤ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༢༢ ཉིན་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ལྷོ་ཨ་ཕི་རི་ཀའི་གྲོས་ཚོགས་ཀྱི་ཚོགས་ཁང་ (NCOP Building, Room S35) ནང་ད་ལྟའི་བོད་ནང་གི་ཛ་དྲག་གནས་སྟངས་ཐོག་རྒྱལ་སྤྱིའི་རྒྱབ་སྐྱོར་དགོས་པའི་འབོད་སྐུལ་གྱི་གསར་འགོད་གསལ་བསྒྲགས་ཤིག་སྤེལ་བའི་ནང་འཁོད་དོན། བོད་མིའི་འཐབ་རྩོད་དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་འཁོད་པའི་བོད་མིའི་ཐུན་མིན་རིག་གཞུང་དང་ངོ་བོ། སྐད་ཡིག་སོགས་སྲུང་སྐྱོབ་བྱ་རྒྱུ་མ་ཟད། རང་དབང་ལྡན་པའི་རྒྱལ་ཁབ་སྤྱི་མཚུངས་ལྟར་བོད་མི་ཚོ་ལའང་གཞུང་གིས་ཐེ་བྱུས་མེད་པར་རང་གི་ཆོས་ཉམས་ལེན་བྱ་རྒྱུའི་ཐོབ་ཐང་དེ་དག་རག་ཐབས་བྱས་དང་བྱེད་མུས་ཀྱི་འཐབ་རྩོད་ཅིག་ཡིན་པ་ལས། ང་ཚོས་རྒྱ་ནག་དང་ཁ་བྲལ་ནམ་ཡང་རྩོད་ཀྱི་མེད།
ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༤༩ རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་མཐའ་གཅིག་ཏུ་ཞི་རྒོལ་བྱས་ཡོད། བོད་མི་དེ་དག་གིས་ཁ་གཅིག་གྲག་ཐོག་བོད་ལ་རང་དབང་དགོས་པ་དང་། ༸གོང་ས་མཆོག་བོད་ལ་གདན་འདྲེན་ཞུ་དགོས་པའི་འབོད་ཚིག་བསྒྲགས་ཡོད། མང་གཙོའི་ལམ་ནས་འོས་འདེམས་བྱས་པའི་བོད་མིའི་ཆབ་སྲིད་ཀྱི་དབུ་ཁྲིད་བཀའ་ཁྲི་བློ་བཟང་སེང་གེ་མཆོག་གིས་བོད་མི་ཚོར་འུ་ཐུག་ཐབས་ཟད་ཀྱི་ལས་འགུལ་དེ་རིགས་མ་སྤེལ་རོགས་ཞེས་འབོད་སྐུལ་ཞུས་ཡོད་ཀྱང། བོད་ནང་གི་བོད་མི་ཚོར་རྒྱུན་ལྡན་གྱི་ངོ་རྒོལ་རྔམ་སྟོན་ལས་འགུལ་སྤེལ་རྒྱུ་ལས་གདམ་ཁ་གཞན་ཞིག་རྩ་བ་ནས་ལྷག་མེད་སྟབས། ཁོང་ཚོས་ལས་འགུལ་དེ་བསྟུད་མར་སྤེལ་བཞིན་ཡོད། དེར་བརྟེན་བཙན་བྱོལ་བོད་མི་ཚོས་གཞིས་ལུས་བོད་མི་རྣམས་ཀྱི་མགྲིན་ཚབ་བྱས་ཏེ་གསལ་བཤད་བྱ་རྒྱུ་དང། འཛམ་གླིང་མི་མང་ཚོའི་གདུང་སེམས་མཉམ་སྐྱེའི་རྒྱབ་སྐྱོར་ཆེད་འབོད་སྐུལ་ཞུ་རྒྱུ་ནི་ང་ཚོའི་བཟང་སྤྱོད་ཀྱི་འགན་ཞིག་ཆགས་ཡོད།
ལྷོ་ཨ་ཕི་རི་ཀས་བྷི་རིག་སི་ BRICS ཞེས་རྒྱལ་ཁབ་ལྔའི་ཚོང་འབྲེལ་གྱི་ཁོར་ཡུག་འོག་རྒྱ་ནག་དང་ལྷན་ཚོང་གི་འབྲེལ་ལམ་བཙུགས་པ་དེས་འབྲེལ་ཡོད་རྒྱལ་ཁབ་ལྔ་ཙམ་མ་ཟད། འཛམ་གླིང་ཚང་མར་ཕན་ཐོགས་ཡོང་རྒྱུར་ང་ཚོས་རེ་བ་ཞུ་བཞིན་ཡོད། འོན་ཀྱང་ཚོང་འབྲེལ་དེའི་ནང་འབྲེལ་ཡོད་ཚོར་དཔལ་འབྱོར་ཁེ་ཕན་ཁོ་ན་འཚོལ་ཐབས་བྱ་རྒྱུ་མིན་པར་མང་གཙོ་དང་འགྲོ་བ་མིའི་ཐོབ་ཐང་སོགས་རིན་ཐང་དེ་དག་ལ་དོ་སྣང་བྱ་རྒྱུའི་འགན་ཞིག་ཀྱང་ཡོད། ལྷག་པར་དུ་ལྷོ་ཨ་ཕི་རི་ཁ་ལྟ་བུར་མཚོན་ན། རིན་ཐང་དེ་དག་སྲུང་སྐྱོབས་ཀྱི་སྣེ་འཁྲིད་མཁན་གྱི་རྒྱལ་ཁབ་ཅིག་ཡིན་པ་འཛམ་གླིང་ཡོངས་གྲགས་ཆགས་ཡོད། དེར་བརྟེན་ལྷོ་ཨ་ཕི་རི་ཁས་བཟང་སྤྱོད་ཀྱི་དབུ་ཁྲིད་འགན་དེ་འཁྱེར་རྒྱུ་རེད་བསམ་པའི་བོད་མི་ཚོས་རེ་བ་ཧ་ཅང་ཞུ་བཞིན་ཡོད། རྒྱལ་ཁབ་ལྔ་བསྡུས་པའི་བྷི་རིཀ་སི་ཚོང་འབྲེལ་སྒྲིག་འཛུགས་དེའི་ནང་ལྷོ་ཨ་ཕི་རི་ཀ་དེ་བཞིན་སྟོབས་ཤུགས་ཆེ་ཤོས་ཤིག་མིན་ནའང་བཟང་སྤྱོད་དང་རིན་ཐང་དེ་དག་སྲུང་སྐྱོབ་བྱ་རྒྱུར་ཏན་ཏན་སྣེ་ཁྲིད་ཐུབ།
བོད་མི་ཚོས་འཚེ་མེད་ཞི་བའི་ཐབས་ལམ་དེར་ཆབ་སྲིད་ཀྱི་དཀའ་ངལ་སེལ་ཐུབ་རྒྱུའི་རིན་ཐང་ཡོད་པ་གསལ་སྟོན་བྱ་རྒྱུ་མ་ཟད། རིགས་རུས་དང་ཆོས་ལུགས་སོགས་ཀྱི་དབྱེ་བ་མེད་པར་འགྲོ་བ་མི་རིགས་ཡོངས་རྫོགས་འཆམ་མཐུན་གྱི་སྤྱི་ཚོགས་ཤིག་བསྐྲུན་ཐབས་བྱེད་རྒྱུའི་འདུན་པ་འཆང་བཞིན་ཡོད། རྩོད་རྙོག་རྣམས་གྲོས་མོལ་དང་ཞི་བའི་ལམ་ནས་སེལ་ཐབས་བྱེད་བཞིན་པའི་དུས་སྐབས་འདིར་རྒྱལ་སྤྱིའི་སྤྱི་ཚོགས་ཀྱིས་བོད་མིས་མཚོན་འཚེ་མེད་ཞི་བའི་ལངས་ཕྱོགས་བཟུང་སྟེ་ལས་འགུལ་སྤེལ་མཁན་ཚོར་ངེས་པར་དུ་རྒྱབ་སྐྱོར་གནང་དགོས།
རང་ལུས་མེར་སྲེག་གཏོང་སའི་བོད་ཀྱི་ས་ཁུལ་ཁག་ཏུ་རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་དང་གསར་འགོད་པ་རྣམས་ལ་དམ་བསྒྲགས་བཀག་བསྡོམས་བྱེད་བཞིན་པར་བརྟེན། བོད་མིའི་སྒྲིག་འཛུགས་ཀྱིས་རྒྱལ་སྤྱིའི་ཚོགས་པ་དང་གཞུང་། དེ་བཞིན་སྒྲིག་འཛུགས་རྣམས་ཀྱིས་ས་ཁུལ་དེ་དག་ནང་དངོས་ཡོད་གནས་ཚུལ་རྟོག་ཞིབ་ཆེད་སྐུ་ཚབ་འཐུས་མི་གཏོང་ཐབས་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་འཁོད་ཡོད། ཐེངས་འདིར་གསར་འགོད་གསལ་བསྒྲགས་གོ་སྒྲིག་གནང་མཁན་གཙོ་བོ་ལྷོ་ཨ་ཕི་རི་ཀའི་ཆབ་སྲིད་ཚོགས་པ་གསུམ་སྟེ་མང་གཙོ་སྣ་འབྲེལ་ཚོགས་པ་ Democratic Allianceདང་མི་མང་ཚོགས་པ། (The Congress of the People) དེ་བཞིན་ཨིན་ཀ་ཐ་རང་དབང་ཚོགས་པ་ Inkatha Freedom Party བཅས་ཡིན་འདུག་པ་བཅས།།
