༢༠༡༢ ཟླ་ ༨ ཚེས་ ༡༠ རེས་གཟའ་པ་སངས།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་ཕྱི་ལོ་ ༢༠༡༢ ཟླ་ ༨ ཚེས་ ༡༠ ཉིན་བཏང་གནས་ནང་འཁོད་དོན། རྒྱ་ནག་སྐམ་ས་ཐེ་ཝན་ལས་དོན་མཐུན་ཚོགས་ཀྱི་འགན་འཛིན་གྲན་ཡུན་ལིན་ཐེ་ཝན་ནང་མཚོ་འགག་གཉིས་དབར་མཉམ་འབྲེལ་ལས་དོན་བྱེད་ཕྱོགས་སྐོར་གན་ཡིག་འཇོག་རྒྱུར་འབྱོར་ཡོད་པ་ལྟར། ཐེ་ཝན་རང་བཙན་རྩོད་མཁན་ཡུལ་མི་དང་གཞུང་འབྲེལ་མིན་པའི་ཚོགས་པ། རྩ་རླུང་སྒོམ་གྲུབ་ཚོགས་པ། ཐེ་ཝན་ནང་གནས་སྡོད་བོད་མི་སོགས་ནས་ངོ་རྒོལ་སྐད་འབོད་ཤུགས་ཆེ་བྱས་ཡོད། དེ་ཡང་ཕྱི་ཚེས་ ༩ སྔ་དྲོ་ཉིན་དང་པོའི་ཚོགས་འདུ་ཚོགས་ཡུལ་དུ་བོད་རིགས་ཚོགས་པ་དང་། ས་གནས་བོད་ཀྱི་གཞོན་ནུ་བཅས་ཀྱི་ཚོགས་མི་ཁག་གཅིག་གིས་བོད་ཀྱི་རྒྱལ་དར་འཕྱར་ཏེ་ངོ་རྒོལ་སྐད་འབོད་བྱས་ཡོད།
དེ་བཞིན་བོད་མི་ཚོས་བཀྲམ་པའི་གསར་འགོད་གསལ་བསྒྲགས་ནང་འཁོད་དོན། རྒྱ་ནག་གཞུང་གི་གདུག་རྩུབ་ཀྱི་སྲིད་བྱུས་ལ་ངོ་རྒོལ་ཆེད་བོད་མི་ཚོས་རང་ལུས་མེར་སྲེག་གཏོང་བཞིན་ཡོད། འོན་ཀྱང་རྒྱ་གཞུང་གིས་མུ་མཐུད་གདུག་རྩུབ་སྲིད་བྱུས་ལག་བསྟར་བྱེད་བཞིན་ཡོད་སྟབས། ང་ཚོ་ཐེ་ཝན་དུ་ཡོད་པའི་བོད་མི་ཚོས་བོད་ནང་གི་བོད་མིའི་ཚབ་ཞུས་ཏེ་རྒྱ་གཞུང་ལ་ངོ་རྒོལ་བྱས་པ་དང་དུས་མཚུངས། ང་ཚོས་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་ཞུ་རྒྱུར། བོད་ནང་གི་བོད་མི་རྣམས་སྡུག་སྦྱོང་འོག་ནས་ཐར་ཏེ། ཆོས་དད་རང་དབང་དང་། སྨྲ་བརྗོད་རང་དབང་ཡོད་དགོས། ང་ཚོས་ཐེ་ཝན་མི་མང་ལ་དྲན་སྐུལ་གཏོང་རྒྱུར། རྒྱ་གཞུང་གིས་ཐོག་མར་བོད་ནང་བཙན་འཛུལ་བྱེད་སྐབས་ཆིངས་ཡིག་དོན་ཚན་བཅུ་བདུན་ཟེར་བ་བཞག་མྱོང་ཡོད། དེ་རྗེས་ཡང་རྒྱ་ནག་གི་རྩ་ཁྲིམས་ནང་མི་རིགས་རང་སྐྱོང་གི་ཐོབ་ཐང་གསལ་པོ་བཀོད་ཡོད་ཀྱང་། ཚང་མ་ཁ་དན་ཚིག་ལ་མ་གནས་པར། དེང་གི་བོད་ནི་རྒྱ་ནག་གི་མི་སེར་སྤེལ་ཡུལ་ཞིག་ཏུ་གྱུར་ཡོད་ཅེས་སོགས་གསལ་ཡོད།
ད་བར་མཚོ་འགག་གཉིས་ཀྱི་ལས་དོན་མཉམ་འབྲེལ་བྱ་ཕྱོགས་སྐོར་གན་ཡིག་འཇོག་པའི་ཚོགས་འདུ་ཐེངས་བདུན་ཚོགས་ཟིན་པ་དང་། ཚོགས་འདུ་ཐེངས་གསུམ་ཐེ་ཝན་ནང་ཚོགས་སྐབས་བོད་མི་ཚོས་རྣམ་པ་འདྲ་མིན་གྱི་ངོ་རྒོལ་བྱེད་པར་བསྐྱོད་ཡོད་ལ། ད་ཐེངས་ཐེངས་བརྒྱད་པའི་ཚོགས་འདུ་དང་། མི་སྣ་ཐུག་འཕྲད་སོགས་ཀྱི་ལས་རིམ་ཚང་མ་ཐེ་ཝན་གཞུང་ནང་གསང་རྒྱ་དང་། ཚོགས་འདུ་ཚོགས་ཡུལ་ཉེ་འཁོར་ས་གནས་ལ་དམ་བསྒྲགས་ཤུགས་ཆེ་བྱེད་བཞིན་ཡོད་པ་བཅས།།