༢༠༡༢ ཟླ་ ༨ ཚེས་ ༨ རེས་གཟའ་ལྷག་པ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༨ ཚེས་ ༨ ཉིན་བཏང་གནས་ནང་འཁོད་དོན། བོད་མདོ་སྨད་རྔ་པ་ནས་རང་ལུས་མེ་སྲེག་གིས་རྒྱ་ནག་གཞུང་ལ་ངོ་རྒོལ་གནང་མཁན་རྔ་པ་ཀིརྟི་དགོན་གྱི་རྒྱལ་གཅེས་དཔའ་བོ་གྲྭ་བློ་བཟང་ཚུལ་ཁྲིམས་ལགས་ཀྱིས་ཕྱི་ཚེས་ ༦ ཉིན་རང་ལུས་མེར་སྲེག་བཏང་རྗེས་མཚན་མོ་ཆུ་ཚོད་ ༡༢ ཙམ་ལ་འབར་ཁམས་སུ་སླེབས་ཙམ་གྱི་རྗེས་འབར་ཁམས་སྨན་ཁང་དུ་སྐུ་གྲོངས་འདུག ཁོང་ནི་རང་ལོ་ ༢༡ ཡིན་ཞིང་ཁོང་སྐུ་གྲོངས་མ་ཐག་འབྲེལ་ཡོད་ཀྱིས་ཕུང་པོ་ནང་མིར་སྤྲོད་རྒྱུའི་རེ་འདུན་ཞུས་ཀྱང་དང་ལེན་མ་བྱས་པར་རྒྱ་ནག་གཞུང་གིས་མེར་སྲེག་བཏང་སྟེ་རུས་ཐལ་ཞིག་ནང་མིར་སྤྲད་འདུག འབྲེལ་ཡོད་དགེ་འདུན་པ་བཞིས་ཀིརྟི་དགོན་པའི་ལྟག་རྒྱབ་ཀྱི་དུར་སའི་ནང་ཕྱི་ཚེས་ ༧ ཉིན་གྱི་མཚན་མོར་སྐྱེལ་ཡོད།
བློ་བཟང་ཚུལ་ཁྲིམས་ལགས་ཀྱིས་རང་ལུས་མེ་བསྲེགས་གནང་ནས་གོམས་པ་བཅུ་གྲངས་འགའི་རིང་ཕེབས་ཡོད་ལ་སྐབས་དེར་ཁོང་གིས་༸གོང་ས་མཆོག་བོད་ལ་གདན་འདྲེན་ཞུ་དགོས། སྐྱབས་རྗེ་ཀིརྟི་རིན་པོ་ཆེ་བོད་ལ་ཕེབས་འཇུག་དགོས། ཀིརྟི་དགོན་པའི་སློབ་གྲྭ་སྒོ་ཕྱེ་དགོས། ཞེས་སྐད་འབོད་གནང་ཡོད་འདུག དེ་བཞིན་ཁོང་གིས་ཤུལ་དུ་ཁ་ཆེམས་ཤིག་བཞག་ཡོད་ཀྱང་འདི་ནས་ལག་སོན་བྱུང་མེད། ཁོང་ནི་རྔ་པ་རྫོང་གཅའ་ཞང་རྭ་རུ་བའི་རྗའ་དར་ཚང་གི་ཡིན་ཞིང་། ཕ་དབང་ཚེ་དང་།
མ་སྒྲོན་དཀར་སྐྱིད་གཉིས་ཀྱི་བུ་ཡིན་འདུག ཆུང་ཆུང་སྐབས་ནས་རྔ་པ་ཀིརྟི་དགོན་པར་གྲྭ་པ་བྱས།
དེང་སྐབས་ཐོས་བསམ་གླིང་གྲྭ་ཚང་གི་འཛིན་གྲྭ་རྟགས་རིགས་ཡིན་འདུག་པ་བཅས།།
