༢༠༡༢ ཟླ་ ༨ ཚེས་ ༡༠ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༨ ཉིན་ཨུ་རུ་སུའི་རྒྱལ་ས་མོ་སི་ཀོར་རྟེན་གཞི་བྱས་པའི་ཨོ་པེན་ཝོལ་ཌི་སེན་ཊར་ (Open World Center) ཞེས་པའི་ཁུལ་དེར་བོད་མི་དང་བོད་དོན་རྒྱབ་སྐྱོར་བ། ཨུ་རུ་སུ་སྤྱི་མཐུན་རྒྱལ་ཁབ་ཀྱི་ནང་པ་བཅས་ལྷན་འཛོམས་ཐོག གཞིས་ལུས་རྒྱལ་གཅེས་པ་རྣམས་ལ་གདུང་སེམས་མཉམ་སྐྱེ་ཞུ་ཆེད་མཆོད་འབུལ་སྨོན་ལམ་ཆེད་མཆོད་སྤྲིན་འབུལ་ཤོམ་དང། བཀའ་ཁྲི་བློ་བཟང་སེང་གེ་མཆོག་གིས་བཀའ་ཁྲིའི་ལས་ཁུར་བཞེས་ཏེ་ལོ་གཅིག་ཧྲིལ་པོ་འཁོར་བ། དེ་བཞིན་བདེན་པའི་མེ་ལྕེ་སྐོར་བསྐྱོད་ཁུལ་དེར་འབྱོར་བ་བཅས་དུས་དྲན་གསུམ་འཛོམས་ཀྱི་ཉིན་མོ་སྲུང་བརྩི་གཟབ་རྒྱས་ཞུས་ཏེ་བོད་དོན་ལས་འགུལ་རྒྱ་ཆེ་སྤེལ་ཡོད།
སྐབས་དེར་ཨུ་རུ་སུའི་སྐུ་ཚབ་དོན་གཅོད་ངག་དབང་རབ་རྒྱས་ལགས་ཀྱིས་དུས་དྲན་གསུམ་འཛོམས་ཀྱི་ཉིན་མོ་ངོ་སྤྲོད་གནང་བ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་བཀའ་ཁྲི་བློ་བཟང་སེང་གེ་མཆོག་ལ་རྩིས་སྤྲོད་མཛད་རྗེས་སྐབས་བཅུ་བཞི་པའི་བཀའ་ཤག་གིས་ལས་ཁུར་བཞེས་ཏེ་ལོ་གཅིག་ཧྲིལ་པོ་འཁོར་བའི་ཉིན་མོ་འཁེལ་བ་དང་། རྒྱ་ནག་གཞུང་གིས་ཕྱི་ལོ་ ༡༩༤༩ ། ༡༩༥༠ ནས་བོད་དུ་བཙན་འཛུལ་བྱས་པ་ནས་བཟུང་བོད་ནང་དམ་བསྒྲགས་ཅན་གྱི་སྲིད་བྱུས་བསྟུད་མར་ལག་བསྟར་བྱས་དང་བྱེད་མུས་ལ་བརྟེན་བོད་མི་རིགས་ཀྱི་ཐུན་མིན་ཆོས་དང་རིག་གཞུང། སྐད་ཡིག ངོ་བོ་བཅས་དང་། དེ་བཞིན་བོད་ཀྱི་ཁོར་ཡུག་ལ་གཏོར་བཤིག་བཏང་དང་གཏོང་མུས་ཡིན་པ་མ་ཟད། ཆབ་སྲིད་ཀྱི་དམ་བསྒྲགས་ཧ་ཅང་ཆེ་བའི་འོག་བོད་མི་ཚོ་རང་གི་ལུང་པའི་ནང་གྲངས་ཉུང་མི་རིགས་སུ་གྱུར་ཏེ་སྤྱི་ཚོགས་དང་དཔལ་འབྱོར་གང་གི་ཆ་ནས་ཟུར་ཕུད་ཀྱི་སྲིད་བྱུས་ལག་བསྟར་བྱེད་བཞིན་པར་བརྟེན། ད་བར་བོད་མི་ ༤༦ གིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་གནང་ཡོད་སྐོར་སོགས་གསུངས་པ་མ་ཟད། བོད་མི་རང་ལུས་མེར་སྲེག་གཏོང་མཁན་མཐའ་མ་དེ་རང་ལོ་ ༢༦ སོན་པ་བུད་མེད་སྒྲོལ་དཀར་མཚོ་ལགས་ཀྱི་འདྲ་པར་ཞིག་ཀྱང་མང་ཚོགས་རྣམས་ལ་བསྟན་ཡོད།
སྐུ་ཚབ་དོན་གཅོད་ཀྱིས་སྐབས་དེར་ཕྱི་ལོ་ ༢༠༠༩ ཕྱི་ཟླ་ ༢ ཚེས་ ༧ ནས་ད་བར་བོད་ཀྱི་ས་ཁུལ་མདོ་དབུས་ཁམས་གསུམ་གྱི་ནང་རང་ལུས་མེར་སྲེག་གཏོང་མཁན་གྱི་བོད་མི་ཚོས་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པ་སོགས་ཀྱི་དགོས་འདུན་རྣམས་ཁ་གཅིག་གྲག་གིས་བཏོན་ཡོད་སྐོར་གསལ་བཤད་གནང་སྐབས་མི་མང་ཚོར་སེམས་འགུལ་ཧ་ཅང་ཆེན་པོ་ཐེབས་ཡོད། གསུང་བཤད་གྲུབ་བསྟུན་མང་ཚོགས་ནས་བདེན་ཚིག་སྨོན་ལམ་སོགས་གསུང་འདོན་གནང་བ་དང་སྦྲགས་མཆོད་འབུལ་སྨོན་ལམ་རྒྱ་ཆེ་གནང་ཡོད།
དེ་རྗེས་སྐུ་ཚབ་དོན་གཅོད་ཀྱིས་ཉིན་དེའི་མཛད་སྒོའི་མཐའ་མར་མང་ཚོགས་རྣམས་ཀྱིས་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཆེ་ཞུས་པ་མ་ཟད། བོད་ཀྱི་གནད་དོན་དེ་བཞིན་ཆབ་སྲིད་ཀྱི་གནད་དོན་ཁོ་ན་མིན་པར་དེང་སྐབས་འཛམ་གླིང་ནང་ཞི་བདེ་གོང་འཕེལ་གཏོང་རྒྱུར་ཧ་ཅང་ཕན་རླབས་ཆེ་བའི་འཛམ་གླིང་སྤྱི་ལ་དབང་བའི་གཅེས་ནོར་ལྟ་བུའི་བོད་བརྒྱུད་ནང་བསྟན་གྱི་གནས་སྟངས་ཆགས་འཇིག་ལ་ཐུག་ཡོད་པ་གསལ་བཤད་གནང་ཡོད། གཞན་ཡང་སྐབས་དེར་སེར་བྱེས་ཧར་གདོང་ཁང་མཚན་གྱི་དགེ་བཤེས་ངག་དབང་ཐུགས་རྗེ་ལགས་ཀྱིས་ཀྱང་བོད་བརྒྱུད་ནང་བསྟན་སྲུང་སྐྱོབ་གལ་ཆེ་ཡིན་སྐོར་གསུང་བཤད་གནང་ཡོད། དེ་རྗེས་རྒྱལ་ས་མོ་སི་ཁོར་བརྟེན་གཞི་བྱས་པའི་བོད་ཁང་ Tibet House གི་འགན་འཛིན་གཞོན་པ་ལྕམ་སྐུ་ན་ཌ་ཡ་བྷར་ཀེན་ཇིམ་ Mrs. Nadya Berkengeym ལགས་ཀྱིས་ཨུ་རུ་སུའི་མང་ཚོགས་ཀྱིས་བོད་མི་ཚོའི་གཞི་རྩའི་ཐོབ་ཐང་ལ་རྒྱབ་སྐྱོར་གནང་རོགས་ཞེས་འབོད་སྐུལ་ཤུགས་ཆེ་གནང་ཡོད།
ཐེངས་འདིར་བདེན་པའི་མེ་ལྕེ་སྐོར་བསྐྱོད་དེ་རྒྱལ་ས་མོ་སི་ཀོར་ཕྱི་ཚེས་ ༨ ཉིན་འབྱོར་མཚམས། རེ་ཌི་སི་ཀོ་ཝེར་ Red Square ཞེས་པའི་ཨུ་རུ་སུའི་གྲོས་ཚོགས་ལས་ཁུངས་ཡོད་ས་ཀིར་མི་ལེན་ Kremlin ཞེས་སྙན་གྲགས་ཆེ་བའི་ས་ཁུལ་དེར་སྐོར་བསྐྱོད་གནང་ཡོད། སྐོར་བསྐྱོད་ཀྱི་ལས་འགུལ་སྐབས་དེར་འཛམ་གླིང་མཉམ་འབྲེལ་རྒྱལ་ཚོགས་ལ་འབུལ་རྒྱུའི་མཚན་རྟགས་བསྡུ་རུབ་ཀྱི་ལས་འགུལ་ཡང་སྤེལ་ཡོད། བདེན་པའི་མེ་ལྕེ་སྐོར་བསྐྱོད་དེ་མོ་སི་ཀོ་ནས་ཕྱི་ཟླ་ ༩ ཚེས་ ༢ ཉིན་ཁལ་མུཀ་སྤྱི་མཐུན་རྒྱལ་ཁབ་དང་ཐུ་ཝ། བྷུར་ཡ་བཅས་ཀྱི་ནང་རིམ་བཞིན་གནང་རྒྱུ་ཡིན་འདུག དྲ་རྒྱའི་ལམ་ནས་མཚན་རྟགས་བསྡུ་རུབ་ཀྱི་ལས་འགུལ་དེ་བཞིན་ཨུ་རུ་སུའི་སྐད་ཡིག་ཐོག་དྲ་རྒྱའི་བརྒྱུད་ལམ་བཞིའི་ནང་ལས་འགུལ་སྤེལ་མུས་ཡིན་འདུག་པ་བཅས།།
