༢༠༡༢ ཟླ་ ༨ ཚེས་ ༢ རེས་གཟའ་ཕུར་བུ།
༄༅། །སུད་སིའི་གྲོང་ཁྱེར་ཛུ་རིཀ་གི་བདེ་འཇགས་བློན་ཆེན་མཆོག་གིས་བོད་དོན་ལ་སྔར་ལྷག་རྒྱབ་སྐྱོར་ཡོད་སྐོར་གསུང་བཤད་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༨ ཚེས་ ༡ ཉིན་བོད་མི་ཚོས་ལྷ་དཀར་ཉིན་མོ་སྲུང་བརྩི་ཞུས་པ་དང་སྟབས་བསྟུན་བློན་ཆེན་མཆོག་གིས་བོད་དོན་ལ་སྔར་ལྷག་རྒྱབ་སྐྱོར་ཡོད་སྐོར་གསུང་བཤད་གནང་དོན། འཛམ་གླིང་འདིའི་སྟེང་རང་བཞིན་འབྱུང་བའི་གནོད་འཚེའི་འོག་འཕྲད་པའི་དཀའ་ངལ་གཅིག་དང་། དེ་བཞིན་དྲང་བདེན་མེད་པར་མིས་བཟོས་པའི་དཀའ་ངལ་ཞིག་ཡོད། དཔེར་ན། བོད་མི་ཚོས་རང་གི་ཐོབ་ཐང་རྩོད་ན་རྒྱ་ནག་གཞུང་ནས་ཁ་བྲལ་རིང་ལུགས་པ་རེད་ཅེས་རྡུང་རྡེག་བཏང་སྟེ་བཙོན་འཇུག་བྱས་དང་བྱེད་མུས་རེད། དེ་དག་ནི་དྲང་བདེན་མེད་པའི་དཀའ་ངལ་ཞིག་ཡིན། གནད་དོན་དེའི་ཐོག་རྒྱ་ནག་གཞུང་ནས་བསམ་གཞིགས་ནན་པོ་གཏོང་དགོས། གང་ལ་ཞེ་ན། བོད་མི་རིགས་ནི་སྲིད་ཆགས་པ་ནས་བཟུང་བོད་ས་མཐོའི་ཐོག་སྐྱེས་འཚར་བྱུང་སྟེ་རང་བྱུང་ཁོར་ཡུག་དང་འགྲོགས་པ་ཙམ་དུ་མ་ཟད། རང་གི་སྐད་ཡིག་གིས་མཚོན་ཡུལ་གོམས་གཤིས་ལུགས་ཟུར་གསལ་ཞིག་ཡོད་པའི་མི་རིགས་ཤིག་ཡིན་སྟབས། མི་རིགས་དེས་རང་གི་ཆོས་དང་རིག་གཞུང་སོགས་སྲུང་སྐྱོབ་ཆེད་རྩོད་ལེན་བྱས་ན། དེ་ནི་བོད་མིའི་ཐོབ་ཐང་ཡིན་པ་ལས་ཁ་བྲལ་རིང་ལུགས་པ་ཆགས་ཐབས་རྩ་བ་ནས་མེད། རྒྱ་བོད་གཉིས་ཀྱི་དཀའ་ངལ་ཞི་མོལ་གྱི་ལམ་ནས་སེལ་རྒྱུ་དེ་ལས་ལྷག་པའི་ཐབས་ལམ་གཞན་མེད། དེར་བརྟེན་ཞི་མོལ་གྱི་ལམ་ནས་བོད་མི་ཚོར་རྒྱ་ནག་གཞུང་ནས་ཚད་མཐོའི་རང་སྐྱོང་གི་ཐོབ་ཐང་སྤྲོད་དགོས། དེ་ནི་བོད་མིའི་ཐོབ་ཐང་རེད། རྒྱ་ནག་གཞུང་ནས་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་ཕན་ཚུན་གྲོས་བསྡུར་བྱེད་སྐབས་གྲུབ་འབྲས་ཐོན་མིན་ལ་མ་ལྟོས་པར་དགའ་བསུ་ཞུ་འོས་པ་ཞིག་ཡིན། དེ་བཞིན་རྒྱ་ནག་གཞུང་ནས་རིང་མིན་བཀའ་ཤག་གསར་པ་དང་ལྷན་དུ་གྲོས་མོལ་དབུ་འཛུགས་གནང་དགོས་པའི་འབོད་སྐུལ་ཞུ་བཞིན་ཡོད། རྒྱ་བོད་གཉིས་ཀྱི་དཀའ་ངལ་དེ་བོད་རྒྱ་གཉིས་ནས་འགན་ཁུར་བླང་སྟེ་སེལ་ཐབས་བྱ་རྒྱུ་ལས་ཕྱོགས་གཅིག་ནས་འབད་བརྩོན་གང་ཡོད་བྱས་ཀྱང་ཕྱོགས་གཞན་ནས་སྣང་ཆུང་བཏང་ན་ཡོང་ཐབས་རྩ་བ་ནས་མེད།
དེར་བརྟེན་རྒྱ་ནག་གཞུང་ནས་གནད་དོན་དེའི་ཐོག་བསམ་གཞིགས་ནན་ཏན་གཏོང་དགོས། ང་ཚོ་ནི་བོད་ཀྱི་དངོས་ཡོད་གནས་ཚུལ་ཤེས་པའི་ཐོག་ནས་བོད་དོན་ལ་རྒྱབ་སྐྱོར་ཞུ་མཁན་ཞིག་ཡིན་སྟབས། བོད་དོན་བདེན་མཐའ་མ་གསལ་བར་དུ་བོད་དོན་ལ་རྒྱབ་སྐྱོར་མུ་མཐུད་ཞུ་རྒྱུའི་ཆོད་སེམས་བརྟན་པོ་ཡོད། དེ་བཞིན་བོད་མི་ཚོའི་ངོས་ནས་ཀྱང་རིམ་པ་བསྒྲིམ་དགོས། ཞེས་སོགས་ཀྱི་གསུང་བཤད་གནང་ཡོད་པ་བཅས། །
