༢༠༡༢ ཟླ་ ༨ ཚེས་ ༡༧ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༡༥ རེས་གཟའ་ལྷག་པའི་ཉིན་ཧི་མཱ་ཅལ་མངའ་སྡེའི་སྐོར་སྲུང་ཉེན་རྟོག་རུ་ཁག་གིས་གོ་སྒྲིག་འོག་སྐོར་སྲུང་ཉེན་རྟོག་གི་ཐང་ཆེན་དུ་རྒྱ་གར་ཨིན་ཇིའི་མངའ་འོག་ནས་རང་བཙན་ཐོབ་སྟེ་ལོ་ངོ་དྲུག་ཅུ་རེ་ལྔ་འཁོར་བའི་དུས་ཆེན་སྲུང་བརྩིའི་མཛད་སྒོ་ཚོགས་ཡོད། སྐབས་དེར་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་དང་ཆོས་རིག་བཀའ་བློན་པདྨ་ཆོས་འབྱོར་མཆོག འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་བཅས་མགྲོན་འབོད་ལྟར་མཛད་སྒོར་མཉམ་ཞུགས་གནང་ཡོད་པ་མ་ཟད། བཀའ་ཁྲི་མཆོག་གིས་མཛད་སྒོའི་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་གྲོང་གསེབ་ཡར་རྒྱས་བློན་ཆེན་སྐུ་ཞབས་ཇེ་རམ་ཐ་ཀུར་ Mr Jai Ram Thakur མཆོག་ལ་མངའ་སྡེའི་ནང་གནས་སྡོད་བྱེད་བཞིན་པའི་བོད་མི་སྐྱབས་བཅོལ་བ་ཡོངས་ཀྱི་ཚབ་ཞུས་ཏེ་ཧི་མཱ་ཅལ་གཞུང་མང་གཉིས་ལ་འཚམས་འདྲི་ཞུས་པ་དང་སྦྲགས། ད་བར་བོད་མི་ཚོར་མཐུན་འགྱུར་རོགས་རམ་གནང་བར་སྙིང་ཐག་པ་ནས་བཀའ་དྲིན་རྗེས་དྲན་ཞུས་ཡོད། ཕྱོགས་མཚུངས་སྐབས་དེར་བཀའ་ཁྲི་མཆོག་དང་ཕྱག་སྦྲེལ་བཀའ་བློན་བཅས་ཀྱིས་རྒྱ་གྲམ་དམར་པོའི་རྒྱན་ཤོག་འདེམས་སྒྲུག་གིས་མཐའ་མའི་རྒྱལ་ཁ་ཐོབ་མཁན་གསུམ་གྱི་མཚན་གཞུང་གསལ་བསྒྲགས་ཀྱང་གནང་ཡོད། དེ་བཞིན་མཛད་སྒོའི་སྐབས་བོད་ཀྱི་ཟློས་གར་ཚོགས་པས་བོད་མིའི་ཐུན་མིན་རིག་གཞུང་འཁྲབ་སྟོན་གནང་ཡོད་པ་བཅས།།
