༢༠༡༢ ཟླ་ ༨ ཚེས་ ༡༧ རེས་གཟའ་པ་སངས།
༄༅། །བོད་ནང་རང་ལུས་མེར་སྲེག་གཏོང་མཁན་རྣམས་ཀྱི་ཆེད་ཕྱི་ལོ་ ༢༠༡༢ ཟླ་ ༨ ཚེས་ ༡༦ ཉིན་གྱི་ཕྱེད་ཡོལ་ཆུ་ཚོད་ ༤ ཐོག་བཀའ་ཤག་གི་བཀའ་འབྲེལ་འོག་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་བཀའ་བློན་ཁྲི་པ་བློ་བཟང་སེང་གེ་མཆོག་གིས་གསུང་བཤད་གནང་དོན། དེ་རིང་འདི་གར་ཕེབས་པའི་སྐྱབས་གནས་དགེ་འདུན་གྱི་སྡེ་དང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། སེར་སྐྱ་མི་མང་རྣམ་པ། དེ་བཞིན་སློབ་ཕྲུག་རྣམ་པར་ཞུ་རྒྱུར། དེ་རིང་ང་ཚོ་འདི་གར་འཛོམས་དགོས་པའི་རྒྱུ་མཚན་ཁྱེད་རྣམ་པས་ཤེས་གསལ་རེད། ཉེ་ཆར་བོད་མདོ་སྨད་རྔ་པ་ཁུལ་དུ་བོད་མི་གསུམ་གྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད། བོད་ནང་རང་ལུས་མེར་སྲེག་གཏོང་མཁན་ཁྱོན་ ༤༩ ཆགས་ཡོད། བོད་ནང་གི་ཤ་ཁྲག་གཅིག་པའི་བོད་རིགས་སྤུན་ཟླ་ཚོས་མུ་མཐུད་ནས་རྩ་ཆེན་གྱི་རང་སྲོག་བློས་གཏོང་གནང་སྟེ་ཕྱི་ཕྱོགས་སུ་ཡོད་པའི་བོད་མི་དང་དེ་བཞིན་རྒྱལ་སྤྱིའི་ཐོག་ཁོང་རྣམ་པས་༸གོང་ས་མཆོག་བོད་དུ་གདན་ཞུ་བྱེད་དགོས་པ་དང་བོད་ལ་རང་དབང་དགོས་ཞེས་འབོད་སྒྲ་སྒྲོགས་པ་གཞི་བཟུང་བཀའ་ཤག་གིས་ཀྱང་འབོད་སྐུལ་ཞུ་བཞིན་ཡོད། དེ་བཞིན་གྲོས་ཚོགས་ནས་ཀྱང་ལས་འགུལ་སྤེལ་དང་སྤེལ་མུས་རེད།
ཉེ་ཆར་བྱུང་བའི་གནས་ཚུལ་ཞིག་ཞུས་ན། ཨ་རིའི་གྲོས་ཚོགས་འཐུས་མི་སྐུ་ཞབས་ཇེམ་སི་མེཀ་གོ་ཝན་(James P McGovern) མཆོག་དང་སྐུ་ཞབས་ཕེ་རེངྐ་ཝུལ་ཕུ་མཆོག (Frank R Wolf) རྣམ་གཉིས་ཀྱིས་ཨ་རིའི་ཕྱི་སྲིད་དྲུང་ཆེ་ལྕམ་སྐུ་ཧི་ལེ་རི་ཁི་ལིན་ཊོན་(Hillary Clinton) མཆོག་ལ་འབོད་སྐུལ་གྱི་ཕྱག་བྲིས་ཤིག་ཕུལ་ཡོད་པའི་སྙིང་དོན་ཞུས་ན། ངེད་གཉིས་ཀྱི་ཐོག་ནས་འབོད་སྐུལ་ཞུ་རྒྱུར། བོད་དོན་ཐོག་ཨ་རིའི་གཞུང་ནས་ཆ་ཤས་ཤུགས་ཆེ་ཙམ་ལེན་དགོས་པ་མ་ཟད། ཡུལ་ལུང་གཞན་དང་ལྷན་ཕྱར་གྲུ་མཉམ་འདེགས་ཀྱིས་རྒྱལ་སྤྱིའི་སྡིངས་ཆར་དངོས་སུ་མཐོང་རྒྱུ་ཡོད་པའི་ལས་འགུལ་སྤེལ་རྒྱུ་ཧ་ཅང་ཆེན་པོ་རེད། གཞི་རྩའི་ཨ་རིའི་སྲིད་གཞུང་གིས་རྒྱ་ནག་གཞུང་ནས་ཁྲིམས་རྩོད་པ་ཁྲན་གུང་ཁྲན་གློད་བཀྲོལ་གཏོང་རྒྱུར་འབད་བརྩོན་ཤུགས་ཆེ་གནང་བར་བསྔགས་བརྗོད་ཞུ་རྒྱུ་ཡིན། དེ་བཞིན་བོད་དོན་ཐོག་རྒྱབ་སྐྱོར་གང་མང་གནང་དགོས་རྒྱུའི་དུས་ལ་བབས་འདུག གང་ལ་ཞེ་ན། བོད་ནང་རང་ལུས་མེར་སྲེག་གཏོང་བཞིན་ཡོད། མདོར་ན། བོད་ནང་གི་གནས་ཚུལ་ཉིན་རེ་ལས་མ་འདས་པར་ཇེ་ཞན་ཇེ་སྡུག་ཏུ་ཕྱིན་ཏེ་ཧ་ཅང་ཉེན་ཚབས་ཆེན་པོ་ཆགས་ཀྱི་འདུག རྒྱ་ནག་གཞུང་གིས་དུས་རྟག་ཏུ་སྤྱི་ཚོགས་འཆམ་མཐུན་ཡོང་བའི་མཐུན་རྐྱེན་སྐྲུན་གྱི་ཡོད་ཅེས་ཤོད་བཞིན་པ་དེ་བདེན་པ་མིན་པ་མངོན་བཞིན་ཡོད།
སྤྱིར་བཏང་རྒྱ་ནག་གཞུང་ལ་ཨ་རིའི་གཞུང་ཕྱོགས་ནས་བོད་དོན་ཐོག་ལ་གྲོས་བསྡུར་མང་པོ་གནང་བཞིན་ཡོད་ཀྱང་རྒྱལ་ཁབ་དཔེར་ན། ཁེ་ན་ཌ་དང་། ཇར་མན། ཅེཀ་སྤྱི་མཐུན་རྒྱལ་ཁབ་སོགས་དང་ལྷན་གྲོས་བསྡུར་གྱི་བསམ་ཚུལ་བརྗེ་ལེན་བྱས་པའི་ཐོག་ནས་ལས་འགུལ་ཤུགས་ཆེ་ཙམ་སྤེལ་རྒྱུ་ཧ་ཅང་གལ་ཆེན་པོ་རེད། དེ་ལྟར་བྱས་ན་རྒྱ་ནག་གཞུང་ཐོག་ནས་ཁོང་ཚོའི་བདག་དབང་ལ་ཐེ་བྱུས་བྱེད་ཀྱི་འདུག དེ་བཞིན་བོད་དོན་དེ་རྒྱ་ནག་ནང་གི་གནད་དོན་ཞིག་ཡིན་ཞེས་ཤོད་ཀྱི་རེད་ཀྱང་། ད་ལྟའི་ཆར་བོད་ནང་གི་ཛ་དྲག་གནས་སྟངས་གཞི་བཞག་སྐབས། ཨ་རིས་འགོ་འཁྲིད་པའི་ཐོག་ནས་ལས་འགུལ་སྤེལ་རྒྱུ་ཧ་ཅང་གལ་ཆེན་པོ་རེད། ལྷག་པར་ཨ་རིའི་གཞུང་གི་སྲིད་བྱུས་གཙོ་བོར་ཨེ་ཤི་ཡ་གཞི་བཞག་ཐོག་ནས་འཛིན་གྱི་ཡིན་ཞེས་བརྗོད་ཀྱི་ཡོད་ན། ཨེ་ཤི་ནང་ལ་རྒྱ་ནག་དང་དེའི་ནང་ནས་བོད་ནང་ག་རེ་ཆགས་ཀྱི་ཡོད་པ་དེ་རྣ་བ་འོན་པ་ལྟར་གོ་ཡི་མི་འདུག་ཅེས་བརྗོད་རྒྱུ་མིན་པར་དམིགས་བསལ་གྱི་ལས་འགུལ་སྤེལ་རྒྱུ་ཧ་ཅང་གལ་ཆེན་པོ་རེད་ཅེས་གྲོས་ཚོགས་འཐུས་མི་གཉིས་ནས་ཕུལ་འདུག་ཅེས་སྙན་སེང་ཞུ་རྒྱུ་ཡིན། དེས་ག་རེ་སྟོན་གྱི་ཡོད་དམ་ཞེ་ན། གཞི་རྩའི་བོད་ནང་རང་ལུས་མེར་སྲེག་གཏོང་མཁན་རྣམ་པའི་རེ་འདུན་གྱི་འབོད་སྒྲ་རྒྱལ་སྤྱིའི་སྤྱི་ཡོངས་ནས་ཐོས་པ་དང་རྒྱབ་སྐྱོར་གྱི་རྣམ་པ་ཤུགས་ཆེ་རུ་འགྲོ་གི་ཡོད་པ་གསལ་པོ་རེད། དེར་བརྟེན་ཚང་མས་ཐུགས་སྨོན་གང་ཐུབ་ཅི་ཐུབ་གནང་རོགས་གནང་ཞུ་རྒྱུ་ཡིན། ཞེས་གསུང་བཤད་གནང་ཡོད་པ་མ་ཟད། ཨ་སམ་ཁུལ་དུ་བྱུང་བའི་དོན་རྐྱེན་གྱི་གནས་སྟངས་ཐོག་ལ་ཡང་འགྲེལ་བརྗོད་གནང་ཡོད་པ་བཅས། །
