༢༠༡༢ ཟླ་ ༨ ཚེས་ ༨ རེས་གཟའ་ལྷག་པ།
༄༅། །དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་དཔལ་འབྱོར་ལས་ཁུངས་ཀྱི་ལོ་གཅིག་གི་ལོ་འཁོར་ལས་དོན་ངོ་སྤྲོད་གནང་དོན། དཔལ་འབྱོར་ལས་ཁུངས་ཀྱི་ལས་དོན་ཞུ་སྒོ་མང་པོ་ཞིག་ཡོད་པའི་ནང་ནས་གཙོ་བོ་བོད་མིའི་སྒྲིག་འཛུགས་ཀྱི་ལོ་རེའི་དཔལ་འབྱོར་གྱི་གཏོང་ཡོང་སྔོན་རྩིས་ཀྱི་ལམ་ནས་བོད་མི་མང་སྤྱི་འཐུས་ལྷན་ཚོགས་ནས་བཀའ་འཁྲོལ་ཐོབ་པ་ཞུ་རྒྱུ་དེ་རེད། དེ་བཞིན་བཀའ་འཁྲོལ་གང་བྱུང་བ་དེའི་དགོས་ངེས་རྣམས་ཐབས་འཚོལ་ཞུ་རྒྱུ་ད་ཡིན། དེའི་ལས་དོན་དང་འབྲེལ་བའི་ཐོག་ནས་མང་པོ་ཞིག་ཞུ་དགོས་པ་རྣམས་ནི་རྒྱུན་གཏན་གྱི་ལས་དོན་ཞིག་རེད། དཔལ་ལྡན་བཀའ་བློན་ཁྲི་པ་མཆོག་གིས་བཀའ་ཤག་སྐབས་བཅུ་བཞི་པའི་བཀའ་ཁྲིའི་མཛད་འགན་དམ་འབུལ་ཞུས་ཏེ་ལོ་གཅིག་འཁོར་ཡོད། དེའི་ནང་ལ་བཀའ་ཤག་ངོས་ནས་བོད་མིའི་སྤྱི་ཚོགས་ཀྱི་དགོས་མཁོ་དང་། ལྷག་པར་བཀའ་ཤག་གི་ཆིག་སྒྲིལ། རང་ཁ་རང་གསོ། གསར་གཏོད་ཀྱི་ལྟ་གྲུབ་གསུམ་ཐོག་ནས་ལས་འཆར་གང་ལ་གང་ཙམ་ཞིག་གསར་དུ་སྤེལ་རྒྱུར་འབད་བརྩོན་གནང་བ་རེད།
དེའི་ནང་ནས་ལས་དོན་ཁག་གཉིས་དཔལ་འབྱོར་ལས་ཁུངས་ནས་ཞུ་དགོས་རྒྱུ་ཆགས་ཡོད། ༡༽བོད་མིའི་སྤྱི་ཚོགས་དང་ལྷག་པར་གཞོན་སྐྱེས་ནང་ཁྱད་ལས་པ་གང་མང་ཐོན་ཐབས་བྱེད་རྒྱུ་དང་དེའི་ཆེད་དུ་གཞོན་སྐྱེས་སློབ་གྲྭ་ཐོན་མཁན་གང་མང་ཞིག་ལ་ཁྱད་ལས་པ་རིགས་གཅིག་རྐང་འཛིན་གྱི་སློབ་སྦྱོང་གོ་སྐབས་ཐོབ་ཆེད་མ་དངུལ་བུ་ལོན་གྱི་མཐུན་རྐྱེན་སྦྱོར་རྒྱུའི་འབད་བརྩོན་བྱེད་རྒྱུ་དང་། དེའི་ཆེད་དུ་སྤྱི་ཚོགས་དངུལ་ཁང་ངམ་བོད་པའི་དངུལ་ཁང་ཞིག་འཛུགས་ཐུབ་རྒྱུའི་འབད་བརྩོན་བྱེད་རྒྱུ་དེ་རེད། ༢༽རང་ཁ་རང་གསོའི་གནས་སྟངས་སྟེང་ནས་རང་ཁ་རང་གསོ་ཡོང་རྒྱུ་ཡག་ཤོས་དེ་ལས་འཚོལ་མ་ཡིན་པར་ལས་རིགས་གོ་སྐབས་སྐྲུན་ཐུབ་མཁན་གྱི་ཆ་ཤས་གང་མང་ལེན་ཐུབ་ན་ཡག་པོ་ཡོད་པ་ཞིག་བཀའ་ཤག་གཟིགས་ཀྱི་ཡོད། དེའི་ངོ་བོའི་ཆ་ནས་གཞོན་སྐྱེས་གང་མང་བཟོ་ཚོང་དང་ཚོང་གཉེར་ཐོག་དོ་དབྱིངས་དེ་བཞིན་དངོས་སུ་བཞུགས་ཐུབ་རྒྱུར་རམ་འདེགས་དང་གསོ་སྐྱོང་བྱེད་རྒྱུའི་ལམ་རིམ་དེ་གཉིས་ཀའི་ཐོག་ལ་དཔལ་འབྱོར་ལས་ཁུངས་ཐོག་ནས་ལས་དོན་ཞུས་དང་ཞུ་མུས་ཡིན། བཀའ་ཤག་དགོངས་དོན་ལྟར། ལས་དོན་དེ་ཚོ་དོན་འཁྱོལ་ཡོང་རྒྱུའི་ཐོག་ང་ཚོས་ཞིབ་འཇུག་གི་ལས་དོན་འགྲོ་དང་འགྲོ་མུས་ཡིན། གལ་ཆེ་ཤོས་འདས་པའི་ལས་དོན་མང་པོ་ཞིག་འཕྲོས་སྐྱོང་བྱེད་དགོས་ཀྱི་ཡོད་པ་མ་ཟད། དེ་དག་འཐུས་ཤོར་མེད་པའི་ཐོག་ནས་མཇུག་སྐྱོང་བྱེད་དགོས་རྒྱུ་དེ་གལ་ཆེན་པོར་ངོས་འཛིན་བྱེད་ཀྱི་ཡོད།
བཀའ་ཤག་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ཉིན་གཏམ་བཤད་ནང་འཐུས་ཤོར་ཆེན་པོ་ཕྱིན་མེད་པའི་སྐོར་གསུངས་ཡོད། དེ་ནི་དངོས་ཡོད་གནས་སྟངས་རེད། དེ་དག་ཡོང་དགོས་རྒྱུ་གཙོ་བོ་དེ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་རླབས་དང་། མང་ཚོགས་ཀྱི་རྒྱབ་སྐྱོར། དངོས་སུ་ལས་ཀ་བྱེད་མཁན་གྱི་ལས་བྱེད་རྣམ་པའི་ཕྱར་གྲུ་མཉམ་འདེགས། བཀའ་བློན་ཁྲི་པས་དབུས་པའི་བཀའ་བློན་རྣམ་པའི་མཐུན་འགྱུར་དང་ཆིག་སྒྲིལ་གྱི་གནས་སྟངས་ནས་བྱུང་བ་ཞིག་ཡིན་པར་ངས་ངོས་འཛིན་ཞུ་གི་ཡོད། དེར་བརྟེན་ཚང་མར་འཚམས་འདྲི་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུང་བཤད་གནང་ཡོད་པ་བཅས། །
