༢༠༡༢ ཟླ་ ༨ ཚེས་ ༨ རེས་གཟའ་ལྷག་པ།
༄༅། །ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཆོས་རིག་ལས་ཁུངས་ཀྱི་ལོ་གཅིག་གི་ལོ་འཁོར་ལས་དོན་ངོ་སྤྲོད་གནང་དོན། གཞི་རྩའི་མཁས་དབང་བློ་བཟང་སེང་གེ་མཆོག་གི་གསར་གཏོད་དང་ཆིག་སྒྲིལ། རང་ཁ་རང་གསོ་བཅས་ལྟ་གྲུབ་གསུམ་གཞི་ལ་བཞག་སྟེ་ལོ་
ལྔའི་འཆར་གཞི་ཞིག་བཀའ་ཤག་ལ་ཕུལ་ཡོད། གནད་དོན་དེ་དག་རེ་རེའི་ཐོག་ཞིབ་ཕྲ་ཞུ་མི་དགོས་པའི་ཐོག་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པ་ལོ་གཉིས་དང་གསུམ་གྱི་བར་ལ་ཆོས་རིག་ལས་ཁུངས་ཀྱིས་འགན་བཞེས་ནས་བླ་ཆེན་གྱི་ལྷན་ཚོགས་ཤིག་བསྐོང་ཚོགས་གནང་བཞིན་ཡོད། ལྷན་ཚོགས་དེའི་སྐབས་ཆོས་རིག་ལས་ཁུངས་ཀྱིས་འབྱུང་འགྱུར་ལོ་གཉིས་གསུམ་ནང་ལག་བསྟར་བྱ་རྒྱུའི་འཆར་གཞི་བང་སྒྲིག་པའི་གནད་དོན་ཐོག་བཀའ་བསྡུར་གནང་བཞིན་ཡོད། སྤྱིར་བཏང་གནད་དོན་དེ་དག་ཐོག་བཀའ་བསྡུར་མང་པོ་གནང་བཞིན་ཡོད་ནའང་ཆོས་རིག་ལས་ཁུངས་ཀྱིས་དངོས་སུ་ལག་བསྟར་དོན་ཁྱོལ་ཡོང་བའི་ལས་དོན་རིགས་ལ་དམིགས་བསལ་བཀའ་བསྡུར་ལྷུག་པོ་གནང་མཐར་ལག་ལེན་བསྟར་བཞིན་ཡོད། དཔེར་ན། ཆོས་བརྒྱུད་གཞན་གྱི་བཙུན་མར་དགེ་བཤེས་མའི་ཕྱག་འཁྱེར་སྤྲོད་རྒྱུར་དཀའ་ངལ་ཧ་ལམ་མེད། འོན་ཀྱང་དགེ་ལུགས་ནང་དེར་དཀའ་ངལ་ཞིག་འཕྲད་བཞིན་ཡོད་པར་བརྟེན་འདི་ལོའི་ཕྱི་ཟླ་ ༥ ཚེས་ ༡༨ ། ༡༩ ཉིན་གཉིས་རིང་བཙུན་དགོན་ཁག་དྲུག་གི་དགེ་རྒན་དང་འབྲེལ་ཡོད་བཙུན་མ་རྣམས་གདན་ཞུ་བྱས་ཏེ་༸གོང་ས་༸མཆོག་གི་བཀའ་སློབ་གཞི་རྩར་བཞག་ཐོག་མཁས་དབང་ཟམ་གདོང་རིན་པོ་ཆེ་མཆོག དེ་བཞིན་དགའ་ལྡན་ཁྲི་པ་མཆོག་བཅས་ལྷན་འཛོམས་ཐོག་ཉིན་གཉིས་རིང་བཀའ་བསྡུར་རིམ་པ་གནང་རྗེས་དགེ་ལུགས་པའི་ཕྱོགས་ནས་ལོ་ ༢༡ རིང་སློབ་གཉེར་མཐར་ཕྱིན་ཏེ་ཡིག་རྒྱུགས་འཕྲོད་པའི་བཙུན་མར་དགེ་བཤེས་མའི་ཕྱག་འཁྱེར་སྤྲོད་རྒྱུ་གཏན་འབེབས་གནང་ཡོད།
དེ་བཞིན་དགེ་སློང་མའི་སྡོམ་རྒྱུན་བསྐྱར་གསོ་བྱ་རྒྱུའི་བཀའ་ཞིག་ཕེབས་པ་དང་གྲོས་ཆོད་ཀྱང་བཞག་ཡོད། གནད་དོན་དེ་བཞིན་དེ་མུར་ཐག་གཅོད་ཐུབ་པ་ཞིག་མེད་སྟབས། ང་ཚོས་ཉེ་ལམ་ཆོས་བརྒྱུད་ཁག་བཞིའི་བླ་ཆེན་ལ་སྙན་ཞུ་ཕུལ་ཏེ་ཁུངས་སོ་སོ་ནས་སློབ་དཔོན་དང་མཁས་དབང་གི་སྐུ་ཚབ་གཉིས་རེ་གཏོང་རོགས་ཞེས་འབོད་སྐུལ་ཡང་ཞུས་ཡོད། ལས་གཞི་འདི་ནི་འདི་ལོའི་ཕྱི་ཟླ་ ༨ ཚེས་ ༡ ཉིན་ས་རཱ་སློབ་གྲྭར་ཟླ་བ་བཞིའི་རིང་ཉམས་ཞིབ་ཐོག་དགེ་སློང་མའི་སྡོམ་རྒྱུན་དེ་བསྐྱར་གསོ་ཇི་ལྟར་བྱ་ཐུབ་དང་མ་ཐུབ་བཀའ་སྡུར་གནང་བཞིན་ཡོད། བསྐྱར་གསོ་གནང་རྒྱུ་ཡོད་ན་འདི་འདྲ་ཞིག་གནང་དགོས་པ་དང། གནང་མ་ཐུབ་ན་གནང་རྒྱུ་མི་འདུག་ཅེས་ཐག་གཅོད་ཅིག་ཡོང་གི་རེད། དེ་ཆོས་རིག་ལས་ཁུངས་ཀྱི་སྐབས་བབ་ཀྱི་འགན་ཞིག་ཆགས་ཡོད། ཕྱོགས་མཚུངས་རྡོ་རྗེ་གདན་ལ་དུས་དབང་སྐབས་སྨོན་ལམ་ཆེན་མོ་དང། དེ་བཞིན་ཐུབ་དབང་སྐུ་ལ་ཞལ་གསེར་འབུལ་ལམ་ཞུས་པ་དང་ན་བཟའ་གསོལ་བ། དེ་བཞིན་དུས་འཁོར་དབང་ཆེན་ངོ་སྤྲོད་ཀྱི་ཟབ་སྦྱོང་སྤྲོད་རྒྱུས་མཚོན་ཆོས་ཕྱོགས་དང་འབྲེལ་བའི་སྐབས་བབ་ལས་དོན་ཞུ་སྒོ་ཁག་མང་པོ་ཞིག་གནང་ཡོད། དེ་བཞིན་ཉེ་ལམ་ཆོས་རིག་ལས་ཁུངས་དང་དགོན་པ་དང་བཙུན་དགོན་སོགས་དང་འབྲེལ་བ་ཆེན་པོ་ཡོད་པར་བརྟེན་རྡ་སའི་ཉེ་འཁོར་གྱི་དགོན་སྡེ་དང་བཙུན་དགོན་ ༡༣ ཙམ་ནང་ཕྱི་ཟླ་ ༥ ཚེས་ ༢།༩ བར་ལྟ་སྐོར་ཕྱིན་པ་ཡིན། དེ་བཞིན་སྡེ་ར་ལྡུན་ཁུལ་དུ་ཕྱི་ཟླ་ ༥ ཚེས་ ༢༢ ནས་ ༢༨ བར་ཆོས་བརྒྱུད་ཚང་མའི་དགོན་པ་འདུག་པ་རྣམས་ལ་ཞིབ་ཚགས་ཐོག་ལྟ་སྐོར་འགྲོ་རྒྱུ་བྱུང། དེ་བཞིན་རྒྱ་གར་ལྷོ་ཕྱོགས་སུ་ཕྱི་ཟླ་ ༦ ཚེས་ ༢ ནས་ ༩ བར་དགོན་སྡེ་ ༢༣ ཙམ་ལ་ལྟ་སྐོར་འགྲོ་རྒྱུ་བྱུང། དེ་རྗེས་ཕྱི་ཟླ་ ༦ ཚེས་ ༩ ནས་ཚེས་ ༡༥ བར་ལྷོ་ཀོ་རི་ཡའི་ནང་འཛམ་གླིང་རྒྱལ་སྤྱིའི་ནང་པའི་ལྷན་ཚོགས་སུ་བོད་མིའི་སྒྲིག་འཛུགས་ཀྱི་སྐུ་ཚབ་བྱས་ཏེ་བཅར་རྒྱུ་བྱུང། སྐབས་དེར་གནས་ཚུལ་གང་བྱུང་བ་རྣམས་བརྒྱུད་ལམ་ཁག་གི་ནང་གསལ་བསྒྲགས་ཤུགས་ཆེན་པོ་ཐོན་ཡོད། སྐབས་དེར་ང་ཚོར་ཐོབ་མ་མྱོང་བའི་རྒྱལ་ཁ་ཞིག་ཐོབ་ཡོད་བསམ་དྲན་གྱི་འདུག
དེ་བཞིན་ཉེ་ལམ་ཕྱི་ཟླ་ ༧ ཚེས་ ༢ ནས་ཚེས་ ༡༨ བར་ཡུ་རོབ་ཁུལ་དུ་སྐུའི་འཁྲུངས་སྐར་གྱི་དུས་ཆེན་མཛད་སྒོར་བཅར་ནས་སུད་སི་དང་ཨི་ཊ་ལི། ཨོ་སི་ཊི་རི་ཡ། ཇར་མན། ཨིང་ལེན་ཌི་བཅས་རྒྱལ་ཁབ་ལྔའི་ནང་ཕྱིན་ཏེ་འབྲེལ་ཡོད་ས་གནས་བོད་རིགས་མང་ཚོགས་རྣམས་དང་ཐུག་རྒྱུ་བྱུང་བ་མ་ཟད། ཕྱི་རྒྱལ་བོད་དོན་རྒྱབ་སྐྱོར་བ་མང་པོ་ཞིག་དང་ཐུག་འཕྲད་ཀྱིས་བོད་སྤྱི་པའི་རྩ་དོན་སྐོར་སྐད་ཆ་བཤད་པ་ཡིན། ཕྱོགས་མཚུངས་ཉེ་ལམ་ཕྱི་ཟླ་ ༧ ཚེས་ ༢༦ ཉིན་སིམ་ལར་བཅར་ཏེ་རྙིང་མའི་བླ་ཆེན་རྩེ་སྤྲུལ་རིན་པོ་ཆེ་མཆོག་ལ་ཆོས་རིག་ལས་ཁུངས་ནས་བརྟན་བཞུགས་ཕུལ་བ་ཡིན། གཞི་རྩའི་ཆོས་བརྒྱུད་ཁག་ལྔའི་དབུ་ཁྲིད་བླ་ཆེན་རྣམ་པར་ཆོས་རིག་ལས་ཁུངས་ནས་རིམ་བཞིན་བརྟན་བཞུགས་འབུལ་རྒྱུའི་ལས་རིམ་གཏན་འབེབ་བྱས་ཡོད། ཐེངས་འདིར་རྙིང་མའི་དབུ་བླ་རྩེ་སྤྲུལ་རིན་པོ་ཆེ་མཆོག་ལ་བརྟན་བཞུགས་ཕུལ་བ་དེ་དང་པོ་ཆགས་ཡོད། དེ་བཞིན་འཛམ་གླིང་འདིའི་ནང་བོད་བརྒྱུད་ནང་པའི་ཆོས་ཚོགས་ཇི་ཙམ་ཡོད་མིན་དང་ཇི་འདྲ་ཡོད་མིན་ཐོག་ཉམས་ཞིབ་བྱེད་སྐབས་ཨ་རི་དང་ཡུ་རོབ། ཨེ་ཤི་ཡའི་ནང་ ༡༧༠༠ ལྷག་ཙམ་འདུག ཆོས་ཚོགས་དེ་དག་དང་ང་ཚོས་རིམ་བཞིན་འབྲེལ་བ་བྱས་ཏེ་ནང་ཆོས་ཐོག་ནས་འཛམ་གླིང་རྒྱལ་སྤྱིའི་སྟེང་བོད་སྤྱིའི་པའི་རྩ་དོན་ཆོས་དང་རིག་གཞུང་གང་གི་ཐོག་སྨིན་པའི་ལས་དོན་ཇི་འདྲ་ཞིག་བསྒྲུབ་ཐུབ་མིན་ཐོག་ལས་རིམ་སྒྲིག་བཞིན་ཡོད། ཅེས་གསུངས་ཡོད།
