༢༠༡༢ ཟླ་ ༨ ཚེས་ ༣༡ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༣༠ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་ཀྱིས་གསར་འགོད་གསལ་བསྒྲགས་སྤེལ་བའི་ནང་འཁོད་དོན། བོད་ནང་གི་གནས་སྟངས་ཇེ་ཞེན་ཇེ་སྡུག་ཏུ་འགྲོ་བཞིན་པ་དེར་བོད་མིའི་སྒྲིག་འཛུགས་ལ་ཧ་ཅང་སེམས་འཚབ་ཡོད། ང་ཚོས་བོད་མི་རྣམས་ལ་འུ་ཐུག་ཐབས་ཟད་ཀྱི་ལས་འགུལ་ནམ་ཡང་མ་སྤེལ་རོགས་ཞེས་འབོད་སྐུལ་ཡང་ཡང་ཞུས་ཀྱང་། ཕྱི་ལོ་ ༢༠༠༩ ཕྱི་ཟླ་ ༢ ནས་ད་བར་རང་ལོ་ ༡༦ ནས་ ༦༤ བར་སོན་པའི་བོད་མི་སྐྱ་སེར་དང། སློབ་ཕྲུག འབྲོག་པ། ཞིང་པ་སོགས་མི་གྲངས་ ༥༡ གིས་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་བོད་ལ་རང་དབང་དགོས་པའི་འབོད་སྒྲ་སྒྲོག་བཞིན་རང་ལུས་མེར་སྲེག་བཏང་ཡོད། བོད་ས་ཡོངས་རྫོགས་དམག་ཁྲིམས་བསྡམས་པའི་གནས་སྟངས་ལྟ་བུའི་འོག་ཕྱི་རྒྱལ་ཡུལ་སྐོར་སྤྲོ་འཆམ་པ་དང་གསར་འགོད་པ་སུ་ཡང་བོད་ནང་གཏོང་གི་མེད། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་མུ་མཐུད་འཛིན་བཞིན་པ་དེས་བོད་མི་རྣམས་འུ་ཐུག་ཐབས་ཟད་ཀྱིས་ལས་འགུལ་མ་སྤེལ་ཐབས་མེད་ཆགས་བཞིན་ཡོད།
དེར་བརྟེན་བོད་ནང་གོང་གསལ་བོད་མི་དེ་དག་གིས་རང་ལུས་མེར་སྲེག་བཏང་བའི་འུ་ཐུག་ཐབས་ཟད་ཀྱི་བྱ་སྤྱོད་སྤེལ་དགོས་པའི་འགན་འཁྲི་ཆ་ཚང་རྒྱ་ནག་གཞུང་ལ་ཡོད་པ་མ་ཟད། དཀའ་ངལ་སེལ་རྒྱུའི་ཐབས་ལམ་ཡང་རྒྱ་གཞུང་ཁོ་ནར་ཡོད། བོད་ནང་གི་ཛ་དྲག་གནས་སྟངས་ཐོག་ཨོ་སི་ཊོ་ལི་ཡ་དང་ཁེ་ན་ཌ། ཅེཀ་སྤྱི་མཐུན་རྒྱལ་ཁབ། ཡུ་རོབ་སྤྱི་མཐུན་རྒྱལ་ཁབ། ཕ་རན་སི། ཇར་མན། ཨི་ཊ་ལི། ཉི་ཧོང། པོ་ལན་ཌི། ལྷོ་ཨ་ཕི་རི་ཀ། ཨ་རི་སོགས་འཛམ་གླིང་རྒྱལ་ཁབ་འདྲ་མིན་གྱི་སྲིད་གཞུང་དང་རྒྱལ་སྤྱིའི་སྤྱི་ཚོགས། གྲོས་ཚོགས་སོགས་ཀྱིས་སེམས་འཚབ་ཀྱི་རྣམ་པ་ཧ་ཅང་ཤུགས་ཆེ་བསྟན་ཡོད་པ་མ་ཟད། གྲོས་ཆོད་བཞག་པ་དང་རྒྱ་ནག་གཞུང་ལ་རེ་འདུན་གྱི་ཞུ་སྙན་བརྒྱུད་བོད་ནང་དམ་བསྒྲགས་ཆུང་དུ་གཏང་སྟེ་གྲོས་མོལ་གྱི་ལམ་ནས་བོད་མིའི་དངོས་ཡོད་དཀའ་ངལ་རྣམས་སེལ་ཐབས་དགོས་པ་ལས། བོད་མིའི་ཐུན་མིན་ངོ་བོ་དང་རིག་གཞུང། སྐད་ཡིག ཁོར་ཡུག་སོགས་ལ་ཉེན་ཚབས་བཟོ་རྒྱུའི་སྲིད་བྱུས་མཚམས་འཇོག་བྱེད་དགོས། ཞེས་རེ་འདུན་བཏོན་ཡོད། རེ་འདུན་དེ་དག་ལ་རྒྱ་ནག་གཞུང་གིས་རྩིས་འཇོག་གནང་དགོས་པར་བོད་མིའི་སྒྲིག་འཛུགས་ཀྱིས་འབོད་སྐུལ་ཞུ་རྒྱུ་ཡིན།
བོད་ནང་གི་དངོས་ཡོད་གནས་ཚུལ་ཇི་ཡིན་ཤེས་རྒྱུའི་ཐོབ་ཐང་ཡོད་པའི་རྒྱ་ནག་མི་དམངས་ཁྲོད་བློ་གཟུ་བོར་གནས་པའི་རྒྱ་རིགས་ཤེས་ལྡན་མི་སྣ་ཁག་གཅིག་གིས་བོད་ནང་གི་ཛ་དྲག་གནས་སྟངས་ཐོག་སེམས་འཚབ་ཀྱི་རྣམ་པ་ཤུགས་ཆེ་བསྟན་ཡོད། དཔེར་ན། ཉེ་ལམ་རྒྱ་རིགས་སྒྱུ་རྩལ་བ་གྲགས་ཅན་སྐུ་ཞབས་ཨེ་ཝེ་ཝེས་(Ai Weiwei) རང་ལུས་མེར་སྲེག་གཏོང་མཁན་བོད་མི་ཚོར་རྒྱ་ནག་གཞུང་གིས་ཡ་ང་སྙིང་རྗེ་སྤུ་ཙམ་མེད་པའི་ཐོག་ནས་དྲག་གནོན་བྱེད་པའི་བྱ་སྤྱོད་དེས་ང་ཚོ་ངོ་ཚ་དགོས་པ་བྱུང་། ཞེས་བསྐྱོན་བརྗོད་གནང་ཡོད།
འདི་ལོ་ཕྱི་ཟླ་ ༩ ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྐབས་རྒྱལ་ཁབ་སོ་སོའི་སྲིད་གཞུང་ནས་བོད་ནང་གི་དངོས་ཡོད་གནས་ཚུལ་རྟོག་ཞིབ་ཆེད་རྒྱལ་སྤྱིའི་རང་དབང་ཅན་གྱི་སྐུ་ཚབ་དང་གསར་འགོད་པ་སོགས་བོད་ནང་གཏོང་དགོས་པ་དང། བོད་ཀྱི་གནད་དོན་སེལ་ཆེད་བོད་མིའི་སྒྲིག་འཛུགས་དང་ལྷན་གྲོས་མོལ་གནང་དགོས་པ་རྒྱ་ནག་གཞུང་ལ་གནོན་ཤུགས་སྤྲོད་རོགས་ཞེས་ང་ཚོས་འབོད་སྐུ་ཞུ་རྒྱུ་ཡིན།།