༢༠༡༢ ཟླ་ ༧ ཚེས་ ༡༩ རེས་གཟའ་ཕུར་བུ།

༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༠ ནས་ ༡༣ བར་ཨོ་སི་ཊོ་ལི་ཡའི་གྲོས་ཚོགས་འཐུས་མི་ཚོགས་ཆུང་གི་སྐུ་ཚབ་གྲོས་ཚོགས་ཀྱི་ངལ་རྩོལ་ཚོགས་པའི་ Labour Party འཐུས་མི་ལྕམ་སྐུ་ལི་ས་སིངྒ་ Senators Lisa Singh མཆོག་དང་ལྗང་ཁུ་ཚོགས་པའི་ Green Party ལ་རི་ས་ཝ་ཊར་ Larissa Waters མཆོག་རྡ་སར་ཕེབས་ཏེ་བོད་མི་མང་སྤྱི་འཐུས་རྣམ་དང་མཇལ་འཕྲད་གནང་ཡོད་པ་མ་ཟད། བོད་དོན་ལ་སྔར་ལྷག་རྒྱབ་སྐྱོར་གནང་རྒྱུའི་ཁས་ལེན་ཡང་གནང་ཡོད། དེ་ཡང་ཁོང་རྣམ་གཉིས་ཕྱིར་རང་ཡུལ་དུ་ལོག་ནས་ཨོ་སི་ཊོ་ལི་ཡའི་སྲིད་གཞུང་དང་དེ་བཞིན་མཐུན་ཕྱོགས་ཀྱི་ཆབ་སྲིད་ཚོགས་པ་ཁག་དང་ནུས་པ་མཉམ་སྤུངས་ཐོག་བོད་ཀྱི་གནད་དོན་སེལ་ཆེད་ཨོ་སི་ཊོ་ལི་ཡའི་སྲིད་གཞུང་གིས་རྒྱ་ནག་དང་ལྷན་སྐད་ཆ་ཤོད་དགོས་པའི་རེ་འདུན་འདོན་རྒྱུ་ཡིན་སྐོར་གསུངས།

སྐབས་དེར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྐུ་མགྲོན་རྣམ་གཉིས་ལ་ད་ལྟའི་བོད་ནང་གི་ཛ་དྲག་གནས་སྟངས་སོགས་ངོ་སྤྲོད་ཞིབ་ཕྲ་གནང་བ་དང་སྦྲགས། བོད་མིའི་བདེན་པའི་འཐབ་རྩོད་ལ་རྒྱབ་སྐྱོར་མུ་མཐུད་གནང་རྒྱུའི་འབོད་སྐུལ་ཤུགས་ཆེ་ཞུས་ཡོད། དེ་བཞིན་སྐུ་མགྲོན་རྣམ་གཉིས་ཀྱིས་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་བཅས་དང་མཇལ་འཕྲད་གནང་ཡོད།

ཐེངས་འདིར་སྐུ་མགྲོན་རྣམ་གཉིས་ལ་བོད་མི་མང་སྤྱི་འཐུས་ལྷན་ཁང་ནས་གསོལ་ཚིགས་ཕུལ་ཡོད་པ་མ་ཟད། བོད་ཀྱི་ཟློས་གར་ཚོགས་པས་རིག་གཞུང་གི་གཞས་སྣ་འཁྲབ་སྟོན་གནང་ཡོད། དེ་བཞིན་རྡ་སའི་ཉེ་འཁོར་དུ་རྟེན་གཞི་བྱས་པའི་བོད་མིའི་རིག་གཞུང་སྲུང་སྐྱོབ་ཀྱི་ཚོགས་པ་དང་ལྷན་ཁང། སློབ་གྲྭ དེ་བཞིན་ལས་ཁུངས་སོགས་སུའང་གཟིགས་སྐོར་དུ་ཕེབས་ཡོད། ངལ་རྩོལ་ཚོགས་པའི་གྲོས་ཚོགས་འཐུས་མི་ལྕམ་སྐུ་ལི་ས་སིངྒ་མཆོག་ནི་ཨོ་སི་ཊོ་ལི་ཡའི་གྲོང་ཁྱེར་ཏ་སི་མ་ནི་ཡ་ནས་ (Tasmania) ཡིན་ཞིང། ཨོ་སི་ཊོ་ལི་ཡའི་གྲོས་ཚོགས་ནང་ལྷོ་ཨེ་ཤི་ཡའི་མི་རིགས་ཀྱི་གྲོས་ཚོགས་འཐུས་མི་ཐོག་མ་དེ་ཆགས་ཡོད། ལྕམ་སྐུ་མཆོག་ཕྱི་ལོ་ ༢༠༡༠ ལོར་གྲོས་ཚོགས་སུ་འོས་འདེམས་བྱུང་ཡོད། དེང་སྐབས་ལྕམ་སྐུ་མཆོག་ཨོ་སི་ཊོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་མི་ཡིན་ཞིང་༸གོང་ས་མཆོག་དེ་སྔ་ཏ་སི་མ་ནི་ཡར་ཆིབས་སྒྱུར་སྐབས་མགོན་པོ་གང་ཉིད་མཆོག་དང་མཇལ་འཕྲད་ཞུས་ཡོད།

ལྗང་ཁུ་ཚོགས་པའི་ལ་རི་ས་ཝ་ཊར་མཆོག་ནི་ཨོ་སི་ཊོ་ལི་ཡའི་གྲོང་ཁྱེར་ཁུ་ཝིན་སི་ལེན་ཌི་Queensland ནས་ཡིན་པ་དང་གྲོས་ཚོགས་ནང་ཕྱི་ལོ་ ༢༠༡༠ ལོར་འོས་འདེམས་བྱུང་ཡོད། ད་བར་བོད་དོན་ཐོག་རྒྱབ་སྐྱོར་དང་དོ་སྣང་ཧ་ཅང་གནང་མཁན་ཞིག་ཡིན་འདུག་པ་བཅས།།