༸གོང་ས་མཆོག་དང་ཇ་མུ་ཀ་ཤི་མིར་མངའ་སྡེའི་བློན་ཆེན་ཨོ་མར་ཨ་ཕི་དྷུ་ལ་ཧ་མཆོག
༢༠༡༢ ཟླ་ ༧ ཚེས་ ༡༣ རེས་གཟའ་པ་སངས།
༄༅། །འདི་གའི་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་་ཟང་མཁས་གྲུབ་ཀྱིས་ས་གནས་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇ་མུ་ཀ་ཤི་མིར་མངའ་སྡེའི་བློན་ཆེན་ལས་ཁུངས་དང་ཁུལ་འདིར་གཞིས་ཆགས་པའི་བོད་རིགས་ཁ་ཆེའི་མཐུན་ཚོགས། བོད་རིགས་ཁ་ཆེའི་སློབ་གྲྭ་བཅས་ཐུན་མོང་ནས་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར། ཕྱི་ལོ་ ༢༠༡༢ ཟླ་ ༧ ཚེས་ ༡༢ ཉིན་གྱི་སྔ་དྲོའི་ཆུ་ཚོད་ ༡༡་༤༥ ཐོག་ལྡི་ལི་ནས་མཁའ་ལམ་བརྒྱུད་ཀ་ཤི་མིར་གནམ་ཐང་དུ་༸ཞབས་སོར་འཁོད་སྐབས།
སྐུ་པར་སྐུ་སྒེར་ཆོས་འབྱོར་ནས།
ཇ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཨོ་མར་ཨབ་དུ་ལ་(Omar Abdullah) མཆོག་དང་ཡུལ་སྐོར་སྤྲོ་འཆམ་བློན་ཆེན་ངག་དབང་རིགས་འཛིན་ཛོ་རཱ་མཆོག་རྣམ་གཉིས་ཀྱིས་ཕེབས་བསུ་ཞུས་ཏེ་བཞུགས་གནས་མགྲོན་ཁང་ནེ་ནེ་ཧེ་རུ་མངའ་སྡེའི་གསོལ་མགྲོན་ཁང་དུ་ (Nehru State Guest House) གདན་འདྲེན་ཞུས་ཡོད།
བཞུགས་གནས་མགྲོན་ཁང་མདུན་དུ་ས་གནས་བོད་རིགས་ཁ་ཆེའི་མི་མང་དང་ལ་དྭགས་ཁུལ་གྱི་བོད་རིགས་ཁག་གཅིག ས་གནས་བོད་རིགས་ཚོང་པ་ཁག་གཅིག་བཅས་ནས་ལག་ཏུ་དཀར་གཙང་མཇལ་དར་དང་མེ་ཏོག བདུག་སྤོས་སོགས་ཐོགས་ཏེ་ཕེབས་བསུ་གཟབ་རྒྱས་ཞུས་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩེ་བ་ཆེན་པོས་དེར་བཅར་བའི་བོད་རིགས་ཁ་ཆེ་བ་རྣམས་ལ་བྱམས་བརྩེའི་གསུང་གི་བདུད་རྩིས་ཁོང་རྣམས་དགའ་བདེས་འཚིམས་པར་མཛད་པ་དང་། དེ་བཞིན་ལ་དྭགས་ཁུལ་གྱི་ཚོང་པ་ཚོར་ཡང་བཀའ་འདྲི་སོགས་མཛད་རྗེས་མངའ་སྡེའི་བློན་ཆེན་མཆོག་དང་ལྷན་བཞུགས་གནས་མགྲོན་ཁང་དུ་ཆིབས་སྒྱུར་སྐབས་མགྲོན་ཁང་རྒྱལ་སྒོའི་ནང་དུ་བོད་རིགས་ཁ་ཆེའི་སློབ་གྲྭའི་འགན་འཛིན་དང་ལ་དྭགས་ཁུལ་ནས་ཕེབས་པ་ཁག་གཅིག་བཅས་ནས་ཕེབས་བསུ་གཟབ་རྒྱས་ཞུས་ཡོད།
འདྲ་པར་སྐུ་སྒེར་ཡིག་ཚང་ཆོས་འབྱོར་ནས།
སྐུ་པར་སྐུ་སྒེར་ཡིག་ཚངཆོས་འབྱོར་གྱིས།
སྤྱིར་༸གོང་ས་༸སྐྱབས་མགོན་ཆེན་པོ་མཆོག་ཤི་རི་ན་གའི་བོད་རིགས་ཁ་ཆེ་བ་རྣམས་གནས་ཡུལ་གཞིས་ཆགས་རྙིང་པ་ཨི་དི་གར་ Id gah ཕྱི་ལོ་ ༡༩༧༥ ཐོག་མར་༸ཞབས་སོར་འཁོད་དེ་ཁོང་རྣམས་ལ་བྱམས་བརྩེའི་བཀའ་སློབ་དང་གཟིགས་སྐོར་སོགས་མཛད་འདུག་ལ་དེ་བཞིན་ཕྱི་ལོ་ ༡༩༨༨ ལོར་ཁུལ་དེའི་གཞིས་ཆགས་གསར་པ་ཧ་ཝེལ་དབུ་འབྱེད་དང་སྦྲགས་མི་མང་གནས་ཡུལ་ལ་གཟིགས་སྐོར་དང་བཀའ་སློབ་སོགས་སྩལ་ཆེད་སླར་ཡང་ཆིབས་སྒྱུར་བསྐྱངས་འདུག
ད་ཐེངས་ཆིབས་སྒྱུར་བསྐྱངས་ཐེངས་གསུམ་པ་དེ་ཆགས་ཡོད་ལ་ཐེངས་འདིའི་མཛད་སྒོ་གཙོ་བོ་ཕྱི་ཚེས་ ༡༤ ཉིན་བོད་རིགས་ཁ་ཆེའི་སློབ་གྲྭའི་མདུན་ཐང་དུ་བཀའ་སློབ་དང་མི་རབས་རྒན་གྲས་རྣམས་ལ་མཇལ་ཁ་སོགས་སྩལ་རྒྱུ་ཡིན་འདུག་པ་བཅས།།
