༢༠༡༢ ཟླ་ ༧ ཚེས་ ༡༧ རེས་གཟའ་མིག་དམར།
༄༅། ། འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༧ ཚེས་ ༡༧ ཉིན་
བོད་མདོ་སྨད་རྔ་པ་བོད་རིགས་རང་སྐྱོང་ཁུལ་འབར་ཁམས་རྫོང་། རྒྱལ་རོང་ཚོ་བདུན་ཀིརྟི་དགོན་པའི་གྲྭ་བློ་བཟང་བློ་འཛིན་རང་ལོ་༡༨ ཡིན་པ་ཁོང་གིས་ཚེས་ ༡༧ ཉིན་གྱི་བོད་ནང་གི་ཉིན་གུང་དུས་ཚོད་ ༡༢ ཡོལ་ཙམ་ལ་ཚོ་བདུན་ཀིརྟི་དགོན་པའི་གླིང་དཀྱིལ་གྱི་འདུ་ཁང་མདུན་ནས་རང་ལུས་མེར་སྲེག་བཏང་སྟེ། ས་གནས་ཞང་སྲིད་གཞུང་ཕྱོགས་སུ་གོམ་འགྲོས་བྱས་ཡོད་ཅིང་། ཅུང་ཙམ་ནས་ལུས་ཀྱི་མེ་ཤུགས་ཆེ་རུ་སོང་སྟབས་ས་ལ་འགྱེལ་ནས་འདས་གྲོངས་གྱུར་འདུག
མེ་བསྒྲོན་པ་དང་མཉམ་དུ་སྐད་འབོད་མང་པོ་ཞིག་བྱས་ཡོད་ཀྱང་བརྗོད་ཚིག་གང་ཡིན་གསལ་པོ་ཤེས་རྟོགས་ཐུབ་མི་འདུག། གནས་ཚུལ་དེ་བྱུང་རྗེས་དགེ་འདུན་པ་རྣམས་ཀྱིས་སྐུ་ཕུང་གཙང་ཉར་བྱས་ཏེ། ཀུན་རིག་རྣམ་པར་སྣང་མཛད་ཀྱི་སྒོ་ནས་རྗེས་འཇུག་གི་ཆོ་ག་བསྒྲུབས་དང་སྒྲུབ་མུས་ཡིན་ཞིང་། དགེ་འདུན་པ་རྣམས་ཀྱིས་དོ་དགོང་མཚན་ལ་སྐུ་ཕུང་ཞུགས་འབུལ་བྱ་རྒྱུའི་གྲ་སྒྲིག་བྱེད་བཞིན་ཡོད་འདུག
དེ་རྗེས་འབར་ཁམས་རྫོང་ནས་རྒྱ་ནག་གཞུང་གི་དྲག་ཆས་ཉེན་རྟོག་པ་སོགས་མང་པོ་ཞིག་ཚོ་བདུན་ཀིརྟི་དགོན་པའི་ཕྱོགས་སུ་ཡོང་གི་ཡོད་ཀྱང་། ཚོ་བདུན་མི་མང་གིས་ཚོ་བདུན་ཟམ་ཁ་ནས་བཀག་འགོག་བྱ་རྒྱུའི་གྲ་སྒྲིག་བྱས་ནས་ཡོད་འདུག་པས། ཉེན་རྟོག་པ་དང་མི་མང་གདོང་ཐུག་གིས་ཛ་དྲག་གི་གནས་ཚུལ་ཡོང་ཉེན་ཡོད་འདུག
སྐུ་གཤེགས་ཁོང་ནི་འབར་ཁམས་རྫོང་རྒྱལ་རོང་ཚོ་བདུན་ཞང་ཥོ་ལ་ཅང་སྡེ་བའི་མཁར་མགོ་ཚང་ནས་ཡིན་ཞིང་། ཕ་མིང་ལ་འབྱོར་རྒྱས་དང་། མ་མིང་ལ་ཚེ་པོ་པོ་ཟེར་གྱི་ཡོད་འདུག ཆུང་ཆུང་སྐབས་ནས་རྒྱལ་རོང་ཚོ་བདུན་ཀིརྟི་དགོན་པར་ཞུགས་ཏེ་ད་ལྟ་འཛིན་གྲྭ་ཁ་དོག་གོང་མ་ཡིན་ཞིང་། འཛིན་གྲྭའི་ནང་ནས་སློབ་སྦྱོང་རྩེ་གྲས་ཡིན་པ་མ་ཟད། ཀུན་སྤྱོད་ལེགས་ཤིང་ཡ་རབས་ཚུལ་མཐུན་ཞིག་ཡིན་འདུག མི་ཚང་དེར་ད་ལྟ་ནང་མི་ལྔ་ཡོད་འདུག
རྒྱལ་རོང་ཚོ་བདུན་ཀིརྟི་དགོན་པ་ནི་འབར་ཁམས་རྫོང་ཁོངས་སུ་ཡོད་ཅིང་། འབར་ཁམས་རྫོང་ནས་བྱང་ཕྱོགས་སུ་སྤྱི་ལེ་ ༨༥ ཙམ་གྱི་སར་ཡོད། དགོན་འདིའི་མིང་ཆ་ཚང་ལ་རྒྱལ་རོང་ཚོ་བདུན་ཀིརྟི་དགོན་དགེ་ལྡན་བཀྲ་ཤིས་ཆོས་གླིང་ཡིན་ཞིང་། དེང་སྐབས་དགེ་འདུན་ཞལ་གྲངས་ ༣༠༠ ལྷག་ཡོད་པའི་རྒྱལ་རོང་ཕྱོགས་ཀྱི་དགེ་ལུགས་པའི་དགོན་པ་ཆེ་ཤོས་ཡིན་འདུག
དེ་སྔོན་ཕྱི་ཟླ་ ༣ ཚེས་ ༣༠ ཉིན་དགོན་འདིའི་གྲྭ་འཆི་མེད་དཔལ་ ལྡན་དང་གྲྭ་བསྟན་པ་དར་རྒྱས་གཉིས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་ཡོད་པ་བཅས། །
