༢༠༡༢ ཟླ་ ༧ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན་འབུམ་སྡེ་ལ་བོད་མིའི་གཞིས་ཆགས་སུ་སྐུའི་འཁྲུངས་སྐར་གོ་སྒྲིག་ཚོགས་ཆུང་གི་ཚོགས་གཙོ་མཚོ་སྣ་དགོན་རྩེ་རབ་རྒྱས་གླིང་མཁན་རིན་པོ་ཆེ་དགེ་བཤེས་ཐུབ་བསྟན་ཀུན་ཕན་མཆོག་དང་དྲུང་ཆེ་འབུམ་ལ་ས་གནས་འགོ་འཛིན་ལས་ཁུངས་ཀྱི་ལས་དྲུང་སྡེ་འགན་བཀྲིས་ནོར་བུ་གཙོས་གཞན་བོད་མི་དང་ཡུལ་མི་རྣམས་ལས་གྲུབ་པའི་ཚོགས་ཆུང་གསར་འཛུགས་གནང་བ་དེས་གོ་སྒྲིག་ཐོག་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག དེ་ཡང་ཐོག་མ་སྔ་དྲོ་ཆུ་ཚོད་ ༥ པའི་ཐོག་མཚོ་སྣ་དགོན་རྩེ་རབ་རྒྱས་གླིང་དང་ཐུབ་མཆོག་དགའ་ཚལ་གླིང་དགོན་པ་གཉིས་ཀྱིས་མཁན་པོས་གཙོས་དགེ་འདུན་པ་རྣམས་ཀྱིས་༸གོང་ས་མཆོག་སྐུ་ཚེ་ཡུན་རིང་བརྟན་ཅིང་ཐུགས་ཀྱི་བཞེད་དགོངས་ལྷུན་གྱིས་འགྲུབ་ཆེད་སྨོན་ལམ་གསུང་འདོན་གནང། དེ་རྗེས་ཆུ་ཚོད་ ༨ པའི་ཐོག་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་འབུམ་ལ་ས་གནས་འགོ་འཛིན་ལས་ཁུངས་ནས་དུང་རྒྱ་སྤོས་སྣེས་སྔོན་བསུས་ཏེ་ཐུབ་མཆོག་དགའ་ཚལ་གླིང་དགོན་དུ་གདན་ཞུས་ཀྱིས་མཎྜལ་རྟེན་གསུམ་འདེགས་འབུལ་དང། སྐུ་རླུང་དར་འཛུགས་ཀྱིས་རྟེན་ཁང་མདུན་དུ་སྲུང་མ་དམར་ནག་གཉིས་ལ་འཕྲིན་བསྐུལ་བཏང་སྟེ་དཀར་ཕྱོགས་སྐྱོང་བའི་ལྷ་རྣམ་དབུ་འཕང་དགུང་དུ་བཏེགས།
དེ་ནས་ྋགོང་ས་མཆོག་གི་སྐུ་དཔར་སླར་ཡང་དུང་རྒྱ་སྤོས་སྣེས་སྔོན་བསུས་ཏེ་འབུམ་སྡེ་ལའི་འཁྲོམ་གཞུང་ནང་བླངས་འཁོར་བང་སྒྲིག་སྐོར་བསྐྱོད་ཐོག་སྟོན་པའི་ཞི་བའི་ལྡུམ་རྭའི་བཞུགས་ཁྲི་རིན་པོ་ཆེར་གདན་འདྲེན་ཞུས་རྗེས་སྐུ་མགྲོན་གཙོ་བོ་རྫོང་དཔོན་རིན་ཆེན་བཀྲིས་ལགས་དང་མཚོ་སྣ་དགོན་རྩེ་རབ་རྒྱས་གླིང་མཁན་རིན་པོ་ཆེ་དགེ་བཤེས་ཐུབ་བསྟན་ཀུན་ཕན་ལགས། ས་གནས་ལས་དྲུང་སྡེ་འགན་བཀྲིས་ནོར་བུ་བཅས་ཀྱིས་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་དགེ་འདུན་པ་རྣམས་ཀྱིས་༸རྒྱལ་བའི་ཞབས་བརྟན་གསུང་འདོན་ཐོག་དཔོན་རིགས་དང་མི་མང་གསུམ་སྟོང་བརྒལ་བས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་རིམ་བཞིན་མཇལ་དར་སྒྲོན་འབུལ་ཞུས་རྗེས་མཛད་སྒོ་དངོས་གཞི་འགོ་འཛུགས་ཀྱི་ཐོག་མར་རྟེན་འབྲེལ་གསོལ་ཇ་འབྲས་སིལ་སྐུ་མགྲོན་དང་མི་མང་རྣམས་ལ་ཕུལ། དེ་ནས་ནང་པའི་རིག་གཞུང་ལྷན་ཚོགས་ཀྱི་ཚོགས་གཙོ་རྡོ་རྗེ་ཚེ་རིང་ལགས་ཀྱིས་དུས་ཆེན་ངོ་སྤྲོད་དང་སྐུ་མགྲོན་དང་མི་མང་རྣམས་ལ་འཚམས་འདྲི་ཞུས་ཡོད་པ་མ་ཟད། ༸གོང་ས་མཆོག་གི་རླབས་ཆེན་མཛད་འཕྲིན་སྙིང་བསྡུས་མང་ཚོགས་ལ་ངོ་སྤྲོད་གནང༌། དེ་རྗེས་འབུམ་ལ་བོད་མིའི་ས་གནས་འགོ་འཛིན་ལས་ཁུངས་ཀྱི་ལས་དྲུང་སྡེ་འགན་བཀྲིས་ནོར་བུ་ལགས་ཀྱིས་འཚམས་འདྲི་ཞུས་པ་དང་ཆབས་ཅིག་བོད་མིའི་སྒྲིག་འཛུགས་བཀའ་ཤག་གི་ཡོངས་ཁྱབ་གསུང་བཤད་སྒྲོག་སྦྱང་གནང། དེ་བཞིན་ཁོང་གིས་ས་གནས་ཡུལ་མི་རྣམས་ནས་ད་བར་བོད་མིར་རྒྱབ་སྐྱོར་མཐུན་འགྱུར་གནང་བ་མ་ཟད།
ལྷག་པར་༸གོང་ས་མཆོག་གི་སྐུའི་འཁྲུངས་སྐར་ལ་མཐུན་འགྱུར་འཁུར་བཞེས་གནང་བར་ཐུགས་རྗེ་ཆེ་ཞུས་ཡོད། དེ་ནས་སྐུ་མགྲོན་གཙོ་བོ་འབུམ་སྡེ་ལའི་རྫོང་དཔོན་རིན་ཆེན་བཀྲ་ཤིས་ལགས་ཀྱིས་༸གོང་ས་སྐུ་ཕྲེང་ན་རིམ་གྱི་མཛད་རྣམ་དང་། ༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གི་མཛད་རྣམ་རྒྱས་པ། ༸གོང་ས་མཆོག་ལ་གཟེངས་རྟགས་ཕྱག་འཁྱེར་འབུལ་བཞེས་གནང་བ་ཁག་གི་མཛད་འཕྲིན། གཞན་༸གོང་ས་མཆོག་ནི་འཛམ་གླིང་ནང་ཞི་བདེ་སྤེལ་མཁན་གཙོ་བོ་ཡིན་པ་དང་འགྲོ་བ་མིའི་རིན་ཐང་གོང་མཐོར། དེ་བཞིན་ཆོས་ལུགས་ཕན་ཚུན་འཆམ་མཐུན་ཐོག་མཛད་འགན་བཞེས་དང་བཞེས་མུས་སྐོར་གྱི་གསུང་བཤད་གནང་གྲུབ་མཚམས་སྐུའི་འཁྲུངས་སྐར་གོ་སྒྲིག་ཚོགས་ཆུང་གི་ཚོགས་གཙོ་མཁན་རིན་པོ་ཆེ་ཐུབ་བསྟན་ཀུན་ཕན་མཆོག་གིས་ཆོས་འབྲེལ་དང་དུས་ཆེན་སྐོར་གསུང་བཤད་གཟབ་རྒྱས་གནང༌། དེ་བཞིན་འབུམ་སྡེ་ལ་ནང་གཞུང་དང་སྒེར་གྱི་ཡུལ་མིའི་སློབ་གྲྭ་གྲངས་ ༡༦ གི་ཕྲུག་གུ་གྲངས་ ༣༥ ལ་འཛིན་རིམ་དབྱེར་ཕྱེད་ཀྱིས་ཡིག་རྒྱུགས་གྲུབ་འབྲས་བརྒྱ་ཆ་ལེགས་ཤོས་ལོན་པ་རྣམས་ལ་བྱ་དགའ་གནང་ཡོད། དེའི་རྗེས་བོད་གཞས་དང་མོན་གཞས་ཚིག་སྒྲ་ལེགས་པ་གྲངས་ ༡༦ འཁྲབ་སྟོན་གནང་ཡོད། གཞན་ཡང་འཁྲབ་སྟོན་པ་རྣམས་ལ་སྐུ་མགྲོན་གཙོ་བོ་མཆོག་གིས་བྱ་དགའ་དང་མཇལ་དར་གནང་རྗེས་ཚོགས་ཆུང་གི་ཚོགས་མི་ཚེ་རིང་འཕྲིན་ལས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་།
གཞན་མི་མང་གསུམ་སྟོང་ལས་བརྒལ་བར་ཉིན་གུང་གསོལ་ཚིགས་གཏོང་ཆེད་ཁུལ་དེའི་མངའ་སྡེའི་གྲོས་ཚོགས་ཀྱི་སྤྱི་འཐུས་སྐུ་ཞབས་ཨ་ཀྲི་ཁུན་ཇུ་ཇུ་ལགས་ཀྱིས་ཧིན་སྒོར། ༥༠༠༠༠།༠༠ ཞལ་འདེབས་གནང་ཡོད། ༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཆེད་ཁུལ་འདིའི་སློབ་གྲྭ་དང་དགོན་པའི་སློབ་གྲྭ་གྲངས་ ༡༦ གི་སློབ་ཕྲུག་གྲངས་ ༤༥༠༠ ཙམ་ལ་མངར་ཟས་བགོ་འགྲེམས་ཀྱིས་སྔ་དྲོ་བསྡུ་འཛོམས་སྐབས་བསྡུ་འཛོམས་སྐབས་སློབ་གྲྭ་སོ་སོའི་སློབ་སྤྱི་སོགས་ནས་ངོ་སྤྲོད་དང་སྦྲགས་མངར་ཟས་བགོ་འགྲེམས་གནང། དེ་བཞིན་ཕྱི་ཚེས་ ༧ ཉིན་སྐུའི་འཁྲུངས་སྐར་དང་སྟབས་བསྟུན་ཁུལ་དེའི་ཉེ་འགྲམ་རྭ་འོང་ཞེས་ས་གནས་སུ་ལྗོན་ཤིང་གྲངས་ ༤༠༠ ལྷག་ཙམ་འདེབས་འཛུགས་དང་ཁུལ་དེའི་ཕོ་མོ་རང་ལོ་ ༤༠ ཡན་ལ་མ་ཎི་ཕྲེང་བ་བགོ་འགྲེམས་ཞུས་ནས་ཐེངས་འདིའི་སྐུའི་འཁྲུངས་སྐར་སྤྱི་ཚོགས་བདེ་དོན་དང་མི་མང་གོ་རྟོགས་སྤེལ་ཐུབ་པ་ཡུལ་མི་དང་བོད་མིའི་དབར་མཐུན་ལམ་སྔར་ལས་ཡར་རྒྱས་དང༌།
གོང་མཚུངས་མོན་རྟ་དབང་ས་གནས་སུའང་སྐུའི་འཁྲུངས་སྐར་གཟབ་རྒྱས་ཞུས་པ་ཁག་མངའ་སྡེའི་གསར་ཤོག་ཁག་ནང་འདོན་སྤེལ་གྱིས་དྲིལ་བསྒྲགས་གང་ལེགས་བྱུང་བ་དང༌། ས་གནས་གཞན་ལྡི་རང༌། ཨི་ཌ་ན་གྷར་བཅས་སུའང་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད་པ་བཅས།།
