༢༠༡༢ ཟླ་ ༧ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༣ རེས་གཟའ་ཟླ་བའི་ཉིན་བྷེང་ལོར་དུ་རྟེན་གཞི་བྱས་པའི་ལྷོ་སྤྱི་ལས་ཁུངས་ཀྱི་ལྷོ་སྤྱི་ཀརྨ་སེང་གེ་ལགས་ཀྱིས་ཀར་ན་ཊ་ཀ་མངའ་སྡེའི་བློན་ཆེན་སྐུ་ཞབས་ཇག་དི་ཤི་ཤེ་ཊར་ Jagadish Shetter མཆོག་མངའ་སྡེའི་བློན་ཆེན་གསར་བསྐོ་བྱུང་བར་བོད་མིའི་སྒྲིག་འཛུགས་སྤྱི་དང་ལྷག་པར་མངའ་སྡེའི་ནང་གནས་སྡོད་བྱེད་བཞིན་པའི་བཙན་བྱོལ་བོད་མི་ཚང་མའི་ཚབ་ཞུས་ཏེ་འཚམས་འདྲི་ཞུས་ཡོད་པ་མ་ཟད། ཀར་ན་ཊ་ཀ་མངའ་སྡེའི་གཞུང་མང་གཉིས་ཀྱིས་འདས་པའི་ལོ་ ༤༠ ལྷག་གི་རིང་བོད་མི་ཚོར་རོགས་རམ་དང་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་རྗེས་དྲན་ཞུས་པ་དང་སྦྲགས། སླད་ཀྱང་བོད་མི་ཚོར་རྒྱབ་སྐྱོར་མུ་མཐུད་གནང་རོགས་ཞེས་འབོད་སྐུལ་ཡང་ཞུས་ཡོད། གཞན་ཡང་སྐབས་དེར་ལྷོ་སྤྱིས་འདི་ལོ་ཕྱི་ཟླ་ ༡༡ ནང་༸གོང་ས་མཆོག་ཁུལ་དེར་ཆིབས་སྒྱུར་བསྐྱང་རྒྱུ་དང་ཕྱི་ཟླ་ ༡༢ ནང་མོན་གྷོ་འདོད་རྒུ་གླིང་གཞིས་ཆགས་སུ་ཆིབས་སྒྱུར་བསྐྱང་རྒྱུའི་མཛད་འཆར་རྣམས་ངོ་སྤྲོད་ཞུས་ཡོད་པ་བཅས།།