༢༠༡༢ ཟླ་ ༧ ཚེས་ ༢༥ རེས་གཟའ་ལྷག་པ།
༄༅། །འདི་གར་ཨ་རིའི་སྐུ་ཚབ་དོན་ཁང་གི་རྒྱ་ཡིག་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༡༢ པ་ནིའུ་ཡོཀ་གྲོང་ཁྱེར་དུ་སྐུ་ཚབ་དོན་གཅོད་ལས་ཁུངས་ནས་གོ་སྒྲིག་ཐོག་ཕྱི་ལོ་ ༢༠༡༢ ཕྱི་ཟླ་ ༧ ཚེས་ ༢༡ དང་ ༢༢ ཉིན་གཉིས་རིང་སྐོང་ཚོགས་གནང་བ་ལྟར། བོད་རིགས་སྤྱི་མཐུན་ཚོགས་པ་ཁག ༢༣ གྱི་རྒྱུན་ལས་སྐུ་ཚབ་ཚོགས་ཞུགས་གནང་ཡོད། ཐོག་མར་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཚོགས་འདུའི་ངོ་སྤྲོད་གནང་རྗེས་བཀའ་བློན་ཁྲི་པ་མཁས་དབང་བློ་བཟང་སེང་གེ་མཆོག་གིས་ཚོགས་འདུ་དབུ་འབྱེད་གནང་ཞིང༌། དབུ་འབྱེད་གསུང་བཤད་ནང་དབུས་བོད་མིའི་སྒྲིགས་འཛུགས་ཀྱི་མང་གཙོའི་འཕེལ་རིམ་དང༌། འཚེ་བ་སྤངས་པའི་གཞི་རྩའི་འཐབ་རྩོད་ཀྱི་ལངས་ཕྱོགས། དེ་མཚུངས་ཆིག་སྒྲིལ་དང༌། གསར་གཏོད། རང་ཁ་རང་གསོ་གསུམ་གྱི་ད་ལྟའི་བཀའ་ཤག་གི་ལྟ་གྲུབ་དེ་གསུམ་གཞི་ལ་བཅོལ་དེ་བར་ལམ་ལས་འཆར་གསར་འཛུགས་གནང་རིགས། བོད་རྒྱ་ཞི་མོལ་གྱི་གནས་སྟངས་བཅས་ངོ་སྤྲོད་ཞིབ་ཕྲ་གནང་བ་མ་ཟད། ཚོགས་བཅར་བ་ཚོར་དོགས་འདྲི་ཞུ་རྒྱུའི་གོ་སྐབས་གནང་བ་དང་ཆབས་ཅིག་ཚོགས་འདུ་དངོས་གཞི་དབུ་འཛུགས་གནང༌།
གྲོས་གཞི་དོན་ཚན་དང་པོ།
རིང་མིན་ཕྱི་ཟླ་ ༩ པའི་ནང་དམིགས་བསལ་ཚོགས་ཆེན་ཐེངས་གཉིས་པ་བསྐོང་ཚོགས་གནང་གཏན་འཁེལ་བ་ལྟར། ཚོགས་ཆེན་ཐོག་བོད་ཀྱི་བདེན་པའི་འཐབ་རྩོད་དང༌། བོད་ནང་གི་ཛ་དྲག་གནས་སྟངས་བཅས་ཀྱི་གནད་དོན་ཐོག་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་གི་དགོངས་འཆར་བསྡུ་ལེན་ཐུབ་ཆེད་བགྲོ་གླེང་གནང་རྒྱུ།
གྲོས་ཆོད་དང་པོ།
བར་ལམ་གཞིས་ལུས་མི་མང་གི་ཁྲོད་ནས་བོད་མི་གཅིག་མཇུག་གཉིས་མཐུད་ཀྱིས་རང་ལུས་མེར་བསྲེགས་ཀྱི་ལམ་ནས་བོད་མིའི་རང་དབང་དང་༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་ཞུ་དགོས་པའི་དགོས་འདུན་ཤུགས་ཆེ་བཏོན་དང་འདོན་བཞིན་པའི་གནས་སྟངས། རྒྱ་ནག་གཞུང་ནས་བོད་མིར་སྔར་དང་མི་འདྲ་བའི་དམ་བསྒྲགས་དང་བཙན་གནོན་བྱས་དང་བྱེད་བཞིན་པའི་གནས་བབ་བཅས་ལ་བསམ་ཞིབ་ཀྱིས་གཞུང་མང་གཉིས་ནས་ལས་འགུལ་སྤེལ་ཕྱོགས་སྐོར་གོ་བསྡུར་ཞིབ་ཕྲ་ཞུས་པ་ལྟར། བཙན་བྱོལ་དུ་བོད་མི་དང་བོད་དོན་རྒྱབ་སྐྱོར་བ་སོགས་ཚོགས་ཁག་ཚང་མས་ཀྱང་གཞིས་ལུས་མི་མང་གི་ལས་འགུལ་ལ་གདུང་སེམས་མཉམ་སྐྱེ་ཆེད་སེམས་ཤུགས་དང་ཚོར་སྣང་ཆེན་པོས་ལས་འགུལ་སྣ་མང་ཞིག་སྤེལ་དང་སྤེལ་མུས་ཀྱང༌། ལས་འགུལ་སྤེལ་མཁན་ཚང་མས་འབོད་ཚིག་དང་བསྒྲགས་གཏམ་གྱི་འབོད་སྒྲ་སོགས་གཅིག་གྱུར་མེད་པར་སྣ་ཚོགས་བེད་སྤྱོད་བྱེད་མུས་དེས་རྒྱལ་སྤྱིའི་གཞུང་དང་མི་མང་གི་ནུས་པ་ཐོན་པའི་རྒྱབ་སྐྱོར་ཐོབ་རྒྱུར་དོ་ཕོགས་ཡོང་གཞིར་སོང༌། ད་ལྟ་བོད་ནང་གི་གནས་སྟངས་དང་གཞིས་ལུས་མི་མང་གི་མངོན་འདོད་དང་མཐུན་པའི་འབོད་སྒྲ་གཅིག་གྱུར་ཡོང་ཐབས་སུ་བཞུགས་སྒར་དུ་རིང་མིན་ཕྱི་ཟླ་ ༩ པའི་ནང་དམིགས་བསལ་ཚོགས་ཆེན་ཐེངས་གཉིས་པ་བསྐོང་ཚོགས་གནང་སྐབས་འབོད་སྐུལ་ནན་པོ་ཞུ་རྒྱུ།
གྲོས་ཆོད་གཉིས་པ།
ཕྱི་ལོ་ ༢༠༠༩ ནས་བཟུང་གཞིས་ལུས་བོད་མིས་རང་ལུས་མེར་བསྲེགས་ཀྱི་ལམ་ནས་བོད་མིའི་བདེན་དོན་འཐབ་རྩོད་བྱེད་པ་དེ་དག་རྒྱ་ནག་གཞུང་གིས་༸གོང་ས་མཆོག་དང་བཙན་བྱོལ་བོད་མིའི་འགོ་ཁྲིད་ཚོས་ཆེད་བཟོས་བྱས་པ་ཡིན་ལུགས་སྐྱོན་འཛུགས་མུ་མཐུད་བྱས་པ་དེ་དག་དངོས་བདེན་མིན་པར་མ་ཟད། བོད་ནང་གི་དངོས་ཡོད་གནས་སྟངས་ལས་གཡོལ་ཐབས་ཀྱི་ཐབས་བྱུས་ཤིག་ཡིན་པ་དང༌། ལྷག་དོན་རང་ལུས་མེར་སྲེག་བཏང་བ་དེ་དག་རྒྱ་ནག་གཞུང་ནས་སྐྱོན་འཛུགས་བྱེད་པ་ལྟར་གཞན་ལ་འཚེ་བ་བྱེད་པའི་ལས་འགུལ་ཞིག་མིན་པ་བྱང་ཨ་མི་རི་ཀའི་བོད་རིགས་སྤྱི་མཐུན་ཚོགས་པའི་ཆོགས་ཆེན་འདི་ནས་ངོས་འཛིན་ཞུས་པ་དང་ཆབས་ཅིག་རིང་མིན་བསྐོང་ཚོགས་གནང་རྒྱུའི་དམིགས་བསལ་ཚོགས་ཆེན་ཐོག་ནས་ཀྱང་གསལ་སྟོན་ཡོང་བའི་འབོད་སྐུལ་ནན་པོ་ཞུ་རྒྱུ།
གྲོས་ཆོད་གསུམ་པ།
བོད་ནང་གི་ཛ་དྲག་གནས་སྟངས་ལ་གཞིགས་པའི་སྔ་ལོ་ཨོསི་ཊོ་རིའི་རྒྱལ་ས་ཝི་ནར་ཡུ་རོབ་ཁུལ་དུ་གནས་སྡོད་བོད་མི་དང་བོད་དོན་རྒྱབ་སྐྱོར་བ་མཉམ་བསྡུས་མངོན་གསལ་དོད་པོའི་ལུས་འགུལ་ཞིག་སྤེལ་བ་ལྟར། བྱང་ཨ་མི་རི་ཀའི་ཁུལ་དུ་ཡང་འབྱུང་འགྱུར་ལོ་གཅིག་ནང་སྐུ་ཚབ་དོན་གཅོད་ལས་ཁུངས་ནས་འགོ་ཁྲིད་དེ་བོད་རིགས་སྤྱི་མཐུན་ཚོགས་པ་ཁག་མཉམ་རུབ་ཀྱིས་ཝ་ཤིང་ཊོན་ནམ་ནིའུ་ཡོཀ་གང་རུང་ཞིག་ཏུ་བྱང་ཨ་མི་རི་ཀའི་ཁུལ་དུ་གནས་སྡོད་བོད་མི་དང་བོད་དོན་རྒྱབ་སྐྱོར་བ་མཉམ་བསྡུས་མངོན་གསལ་དོད་པོའི་ལས་འགུལ་ཞིག་སྤེལ་རྒྱུ།
གྲོས་གཞི་དོན་ཚན་གཉིས་པ།
བོད་རིགས་སྤྱི་མཐུན་ཚོགས་ཚོགས་པ་ཁག་ཚགས་ཚུད་ཡར་རྒྱས་གཏོང་ཐབས་སྐོར་དང༌། བྱང་ཨ་རིའི་སྤྱི་འཐུས་རྣམ་པ་གཉིས་དང་སྤྱི་མཐུན་ཚོགས་པ་ཁག་དབར་གྱི་འབྲེལ་བ་ཤུགས་ཆེ་རུ་གཏོང་ཐབས་ཇི་དགེའི་སྐོར།
གྲོས་ཆོད་དང་པོ།
སྤྱི་མཐུན་ཚོགས་པ་ཁག་ས་གནས་སུ་ཁྲིམས་མཐུན་དེབ་སྐྱེལ་བྱས་ཡོད་མེད་ལ་མ་ལྟོས་པར་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་གནས་དགོས་པ་ཚོགས་ཆེན་འདི་ནས་ཧ་ཅང་གལ་ཆེར་ངོས་འཛིན་ཞུ་གི་ཡོད།
གྲོས་ཆོད་གཉིས་པ།
བྱང་ཨ་མི་རི་ཀའི་སྤྱི་འཐུས་རྣམ་པ་གཉིས་དང༌། བྱང་ཨ་མི་རི་ཀའི་ནང་ཡོད་བོད་རིགས་སྤྱི་མཐུན་ཚོགས་པ་ཁག་དབར་འབྲེལ་ལམ་དམ་ཟབ་ཡོང་ཆེད་རྒྱུན་དུ་གློག་འཕྲིན་དང་དྲ་རྒྱའི་བརྒྱུད་ལམ་བེད་སྤྱོད་གནང་གལ་ཆེ་བའི་ཐོག སྤྱི་འཐུས་རྣམ་པ་ས་གནས་སོ་སོར་ལྷ་རབས་བྱུང་ན་ལོ་རེར་ཐེངས་རེ་དང༌། དེ་མིན་ལོ་གཉིས་ནང་ཐེངས་གཅིག་ཕེབས་ཐབས་སུ་ས་གནས་ཆེ་ཁག་ནས་མགྲོན་འབོད་དང་སྤྱི་འཐུས་རྣམ་པའི་ལམ་གྲོན་སོགས་གོ་སྒྲིག་ཞུ་རྒྱུ་དང༌། ས་གནས་ཆུང་ཁག་མཐུན་རྐྱེན་ཞན་སར་དེ་ལྟར་ལག་བསྟར་ཐུབ་ཐབས་སུ་མཐུན་རྐྱེན་གོ་སྒྲིག་ཞུ་ཕྱོགས་ལམ་སྟོན་གནང་རྒྱུ།
གྲོས་ཆོད་གསུམ་པ།
འདི་ལོ་སྤྱི་འཐུས་ལྷན་ཚོགས་ནས་བོད་ནང་གི་ཛ་དྲག་གནས་སྟངས་ལ་བསམ་ཞིབ་ཀྱིས་བོད་དོན་ཁྱབ་སྤེལ་སླད་འཛམ་གླིང་ནང་བདེན་པའི་མེ་ལྕེ་བསྐོར་བསྐྱོད་ལས་འགུལ་ཞིག་རྒྱ་གར་ནང་འགོ་འཛུགས་ཟིན་པ་ལྟར། བྱང་ཨ་རིའི་ནང་བདེན་པའི་མེ་ལྕེ་བསྐོར་བསྐྱོད་ཀྱི་ལས་འགུལ་དེ་དག་འདི་ལོའི་ཕྱི་ཟླ་ ༩ པའི་ཚེས་ ༢ ཉིན་ཨ་རིའི་རྒྱལ་ས་ཝ་ཤིང་ཊོན་དང༌། ཁེ་ན་ཌའི་རྒྱལ་ས་ཨོ་ཊ་ཝ་ས་གནས་ཁག་གཉིས་ནས་འགོ་འཛུགས་ཞུ་རྒྱུ་དང་ཆབས་ཅིག་བྱང་ཨ་རིའི་འབྲེལ་ཡོད་གྲོང་ཁྱེར་ཆེ་ཁག་ལ་བསྐོར་བསྐྱོད་གནང་སྟེ་མཐའ་མ་ཁལ་ཕོར་ནི་ཡའི་གྲོང་ཁྱེར་སན་ཕ་རནསི་ཁོ་དང༌། མི་ནི་སོ་ཀྲ་མངའ་སྡེའི་གྲོང་ཁྱེར་མི་ན་པོ་ལི་སིར་ཕྱི་ཟླ་ ༡༡ ཚེས་ ༡༥ ཉིན་མཇུག་བསྡོམས་ཞུ་རྒྱུ་གཏན་འཁེལ་བ་ལྟར། བོད་རིགས་སྤྱི་མཐུན་ཚོགས་པ་ཁག་ནས་བྱང་ཨ་རིའི་སྤྱི་འཐུས་རྣམ་པ་གཉིས་དང་ཨ་རིའི་སྐུ་ཚབ་དོན་གཅོད་ལས་ཁུངས་གཉིས་ནས་གོ་སྒྲིག་ལམ་སྟོན་འོག་བདེན་པའི་མེ་ལྕེ་བསྐོར་བསྐྱོད་ཀྱི་ལས་གཞིའི་ནང་མཉམ་ཞུགས་འགན་འཁུར་ཆ་ཤས་ལེན་རྒྱུ་དང་ཆབས་ཅིག བདེན་པའི་མེ་ལྕེ་བསྐོར་བསྐྱོད་བྱེད་ཡུན་རིང་ས་གནས་སོ་སོར་མང་ཚོགས་ནས་བོད་དོན་ཆེད་ཞུ་ཡིག་འབུལ་རྒྱུ་ Petition Drive ལས་གཞིའི་ནང་ཆ་ཤས་ཤུགས་ཆེན་པོ་ལེན་ཐུབ་ཐབས་སུ་བོད་རིགས་སྤྱི་མཐུན་ཚོགས་པ་ཚང་མས་འགན་འཁུར་ལེན་རྒྱུ།
གྲོས་ཆོད་བཞི་པ།
བྱང་ཨ་མི་རི་ཀའི་སྤྱི་མཐུན་ཚོགས་པ་ཁག་ནས་གཞུང་འཛིན་མ་ཡིན་པའི་ཚོགས་པ་ཁག་དང་མཉམ་རུབ་ཐོག་བོད་དོན་ལས་འགུལ་སྤེལ་རྒྱུར་དམིགས་བསལ་ཤུགས་སྣོན་རྒྱག་རྒྱུ་མ་ཟད། ས་གནས་སོ་སོར་སྤྱི་མཐུན་ཚོགས་པའི་སྒྲིག་འཛུགས་སྲ་བརྟན་ཡོང་དང་མི་ཡོང་ས་གནས་བོད་མིའི་རྒྱབ་སྐྱོར་ལ་རག་ལུས་སྟབས། ས་གནས་སུ་ཡོད་པའི་བོད་མིའི་ཚོགས་ཁག་ཆུང་རིགས་ཚང་མར་བོད་རིགས་སྤྱི་མཐུན་ཚོགས་པས་སྤྱི་མཚུངས་འབྲེལ་ལམ་ཟབ་ཏུ་གཏོང་རྒྱུ། དེ་མཚུངས་ས་གནས་སོ་སོར་ཡོད་པའི་ཆོས་ཚོགས་ཁག་ལའང་མུ་མཐུད་འབྲེལ་ལམ་དམ་ཟབ་ཀྱིས་ཆོས་ཚོགས་ཁག་བོད་དོན་ལས་འགུལ་ནང་མཉམ་ཞུགས་ཡོང་ཐབས་འབད་བརྩོན་བྱ་རྒྱུ།
གྲོས་ཆོད་ལྔ་པ།
སྤྱི་མཐུན་ཚོགས་པའི་རྒྱུན་ལས་རྣམ་པས་བོད་དོན་ལས་འགུལ་སོགས་ལས་དོན་ཞུ་སྒོ་ཁག་ཚགས་ཚུད་ཡར་རྒྱས་གཏོང་ཐབས་ཀྱི་ཆ་ཤས་སུ་འབྱུང་འགྱུར་བོད་རིགས་སྤྱི་མཐུན་ཚོགས་པའི་ཚོགས་ཆེན་བསྐོང་ཚོགས་གནང་སྐབས། བོད་དོན་སྐོར་མཁས་དབང་རེ་ཟུང་ཡང་གདན་ཞུ་དང་འབྲེལ་བོད་སྐོར་གཏམ་བཤད་གོ་སྒྲིག་ཐུབ་ན་ཕན་ཐོགས་ངེས་ཅན་ཡོང་རྒྱུར་སོང་སྐུ་ཚབ་དོན་གཅོད་ལས་ཁུངས་ནས་བབ་གཟིགས་གནང་རྒྱུ།
གྲོས་གཞི་དོན་ཚན་གསུམ་པ།
༸གོང་ས་མཆོག་གིས་བར་ལམ་ནས་བོད་མིའི་ཡ་རབས་བཟང་སྤྱོད་ཉམས་རྒྱུའི་ཉེན་ཁ་གཟིགས་ཀྱི་ཡོད་སྐོར་བཀའ་སློབ་སྔ་རྗེས་ཕེབས་པ་ལྟར། བོད་མིའི་ཡ་རབས་བཟང་སྤྱོད་མི་ཉམས་གོང་འཕེལ་གཏོང་ཐབས་དང༌། བྱང་ཨ་རིའི་ཁྱབ་ཁོངས་རང་རིགས་གཞོན་སྐྱེས་རྣམས་ཀྱི་བོད་སྐད་དང་བོད་ཡིག་ཡར་རྒྱས་གཏོང་ཐབ་སྐོར།
གྲོས་ཆོད་དང་པོ།
བོད་ཕྲུག་ན་གཞོན་ཚོའི་རྒྱུད་ལ་བོད་མིའི་ཡ་རབས་བཟང་སྤྱོད་འཇགས་དང་མི་འཇགས། དེ་བཞིན་བོད་སྐད་བཀོལ་སྤྱོད་ཐུབ་དང་མི་ཐུབ་གཙོ་བོ་ཕྲུ་གུའི་ཕ་མ་ཚོར་རག་ལུས་པས་སྤྱི་མཐུན་ཚོགས་པ་ཁག་ནས་རྒྱུན་དུ་གནད་དོན་དེའི་སྐོར་ཕྲུག་གུའི་ཕ་མ་ཚོར་འབོད་སྐུལ་དང་དྲན་སྐུལ་ཡང་ཡང་གནང་རྒྱུ། དེ་མཚུངས་བོད་མིའི་བཟང་སྤྱོད་ཀྱི་གཞི་རྩ་བོད་མི་རྒན་གཞོན་ཚང་མར་ནང་ཆོས་ཀྱི་གོ་རྟོགས་གནས་ཚད་ཇི་ཙམ་ཡོད་མེད་ལ་རག་ལུས་པས་ས་གནས་སོ་སོར་ནང་ཆོས་སྐོར་བགྲོ་གླེང་གང་མང་གོ་སྒྲིག་ཞུ་ཐབས་འབད་བརྩོན་ཞུ་རྒྱུ།
གྲོས་ཆོད་གཉིས་པ།
བྱང་ཨ་མི་རི་ཀའི་སྤྱི་འཐུན་ཚོགས་པའི་ཚོགས་ཆེན་ཐེངས་ ༡༡ པའི་གྲོས་ཆོད་དགོངས་དོན་ལྟར། བྱང་ཁེལ་ཕོར་ནི་ཡའི་བོད་རིགས་སྤྱི་མཐུན་ཚོགས་པ་ནས་རིང་མིན་ཕྱི་ཟླ་ ༨ པའི་ནང་བོད་ཡིག་སློབ་ཁྲིད་བྱེད་ཕྱོགས་ཟབ་སྦྱོང་དང་འབྲེལ་བའི་ཚོགས་འདུ་ཞིག་གོ་སྒྲིག་གནང་གི་ཡོད་པ་ལྟར། བོད་ཡིག་སློབ་གྲྭ་ཡོད་སའི་ས་གནས་ཁག་ནས་ཚོགས་འདུ་དེའི་ནང་ཆ་ཤས་ངེས་པར་དུ་ལེན་རྒྱུ་དང༌། ས་གནས་སོ་སོ་ནས་ས་གནས་ཀྱི་དགོས་མཁོ་ལ་གཞིགས་པའི་བོད་ཡིག་སློབ་ཁྲིད་ཆེད་བསླབ་གཞི་དང༌། སློབ་དེབ། ལས་འཆར་སོགས་ཡིག་ཐོག་གཏན་འབེབས་ཡོད་རིགས་ཀྱི་ངོ་བཤུས་རེ་སྐུ་ཚབ་དོན་གཅོད་ལས་ཁུངས་སམ་བོད་ཡིག་སློབ་ཁྲིད་ཚོགས་འདུ་གོ་སྒྲིག་ཞུ་མཁན་ལ་མཁོ་སྤྲོད་གནང་རྒྱུ་དང༌། འབྱུང་འགྱུར་ཡིག་ཆ་དེ་རིགས་ཕྱོགས་སྒྲིག་དང་འབྲེལ་ས་གནས་ཚང་མར་གཅིག་མཚུངས་འགྲེམས་སྤེལ་ཞུ་རྒྱུ། དེ་མཚུངས་བྱང་ཨ་རི་ཁུལ་དུ་བོད་མི་ན་གཞོན་ཚོར་བོད་ཡིག་སློབ་ཁྲིད་ཀྱི་ལས་དོན་ཚགས་ཚུད་དང་དོན་ཕན་སོན་པ་ཡོང་ཐབས་སུ་གནས་དུས་དང་བསྟུན་པའི་བོད་ཡིག་བྱེད་ཕྱོགས་ཀྱི་དམིགས་ཚད་གཏན་འབེབས་ཐུབ་ཐབས་འབད་བརྩོན་ཞུ་རྒྱུ་དང༌། དེ་མཚུངས་དབུ་ཅན་དང་དབུ་མེད་ཡི་གེ་གཉིས་གང་ལ་ཤུགས་རྒྱག་དགོས་དང་མི་དགོས་སྐོར་མུ་མཐུད་བགྲོ་གླེང་སྦྱངས་བཤད་གནང་རྒྱུ།
གྲོས་ཆོད་གསུམ་པ།
ས་གནས་སོ་སོར་ས་གནས་ཀྱི་སློབ་གྲྭ་བོད་ཕྲུག་མང་བ་ཡོད་ས་ཁག་ནང་བོད་ཡིག་སློབ་ཁྲིད་གོ་སྐབས་གསར་སྐྲུན་ཐུབ་ཐབས་འཚོལ་དང་བོད་ཡིག་སློབ་སྦྱོང་བྱས་པ་དེར་ས་གནས་ཀྱི་སློབ་གྲྭ་ཁག་ནས་ Credit ངོས་འཛིན་ཐོབ་ཐབས་སོགས་ལ་རྒྱུན་དུ་འབད་བརྩོན་ཞུ་རྒྱུ་དང༌། དེ་མཚུངས་ཁྲིམས་མཐུན་དེབ་སྐྱེལ་ཟིན་པའི་བོད་རིགས་སྤྱི་མཐུན་ཚོགས་པ་ཁག་ནས་བོད་སྐད་སློབ་ཁྲིད་གཙོས་ཚོགས་པའི་སྤྱི་ཚོགས་ཞབས་ཞུའི་ལས་གཞི་ཁག་ལ་ས་གནས་མངའ་སྡེ་དང་གྲོང་ཁྱེར་སྲིད་གཞུང༌། གཞུང་འཛིན་མ་ཡིན་པའི་རོགས་ཚོགས་བཅས་ནས་དཔལ་འབྱོར་རོགས་རམ་ཐོབ་རྒྱུའི་གོ་སྐབས་ཡོད་པ་རྣམས་བེད་སྤྱོད་གཏོང་ཐབས་འབད་བརྩོན་བྱ་རྒྱུ།
གྲོས་གཞི་དོན་ཚན་བཞི་པ།
བྱང་ཨ་རིའི་ཁྱབ་ཁོངས་སུ་བོད་དོན་རྒྱབ་སྐྱོར་ཚོགས་པ་ཁག་དང༌། དེ་བཞིན་བོད་རིགས་སྤྱི་མཐུན་ཚོགས་པ་གནས་ཡུལ་མངའ་སྡེ་དང༌། གྲོང་ཁྱེར་བཅས་ཀྱི་སྲིད་གཞུང་དང་གྲོས་ཚོགས་ནང་བོད་ཀྱི་བདེན་པའི་འཐབ་རྩོད་ལ་སྔར་ལས་རྒྱབ་སྐྱོར་ཐོབ་ཐབས་སུ་ལས་འགུལ་སྤེལ་ཕྱོགས། ལྷག་པར་དུ་༸གོང་ས་མཆོག་དང༌། བོད་མིའི་སྒྲིག་འཛུགས་ནས་ཡང་ཡང་ལམ་སྟོན་གནང་མུས་བཞིན་རྒྱ་རིགས་དང་མཉམ་དུ་འབྲེལ་ལམ་ཤུགས་ཆེ་རུ་གཏོང་ཐབས་ཐོག་བཀའ་བསྡུར་གནང་རྒྱུ།
གྲོས་ཆོད་དང་པོ།
གནས་ཡུལ་མངའ་སྡེ་དང་གྲོང་ཁྱེར་སོ་སོའི་སྲིད་གཞུང་དང་གྲོས་ཚོགས་ཀྱི་འཐུས་མི་བཅས་ནས་བོད་དོན་རྒྱབ་སྐྱོར་སྔར་ལྷག་ཐོབ་ཐབས་སུ་གྲོས་ཚོགས་འཐུས་མི་གསར་པ་འདེམས་ཐོན་བྱུང་བའི་སྐབས་དང༌། ས་གནས་སོ་སོར་བོད་ཀྱི་རིགས་གཞུང་གི་དུས་སྟོན་གོ་སྒྲིག་བྱེད་པའི་དུས་ཚོད། གཞན་ཡང་དམིགས་བསལ་དུས་སྟོན་སོགས་ཀྱི་གོ་སྐབས་དམ་འཛིན་དང་འབྲེལ་མངའ་སྡེ་དང་གྲོང་ཁྱེར་སྲིད་གཞུང་གི་དཔོན་རིགས་ཁག་དང༌། ས་གནས་ཀྱི་གྲོས་ཚོགས་འཐུས་མི་རྣམས་ལ་འབྲེལ་ལམ་དམ་ཟབ་ཡོང་ཐབས་འབད་བརྩོན་བྱ་རྒྱུ།
གྲོས་ཆོད་གཉིས་པ།
འདས་པའི་ལོ་བཞིའི་རིང་གསུམ་བཅུའི་དུས་དྲན་གྱི་དུས་ཚིགས་དང་སྟབས་བསྟུན་བོད་དོན་ཞུ་བསྐུལ་གྱི་ཉི་མོ་ Tibet Lobby Day ཞེས་སྲུང་བརྩི་ཞུས་ཐོག་སྐབས་དེར་ཨ་རིའི་རྒྱལ་ས་ཝ་ཤིང་ཊོན་དང༌། ཁེ་ན་ཌའི་རྒྱལ་ས་ཨོ་ཀྲ་བ་གཉིས་ནང་བོད་མི་དང་བོད་དོན་རྒྱབ་སྐྱོར་བ་ཚང་མ་མཉམ་རུབ་ཐོག་ཨ་རི་དང་ཁེ་ན་ཌའི་གྲོས་ཚོགས་ཀྱི་འཐུས་མི་ཚོར་བོད་དོན་ཞུ་བསྐུལ་བྱས་དང་བྱེད་མུས་དེས་ཕན་ནུས་གང་ལེགས་བྱུང་ཡོད་པས། ལས་གཞི་དེ་དག་གཞི་རྒྱ་ཆེ་རུ་གཏོང་ཐབས་སུ་བོད་རིགས་སྤྱི་མཐུན་ཚོགས་པ་ཁག་ནས་དམིགས་བསལ་འགན་འཁུར་ཆ་ཤས་ལེན་རྒྱུ།
གྲོས་ཆོད་གསུམ་པ།
རྒྱ་མི་རིགས་ལ་འབྲེལ་བ་བྱེད་རྒྱུ་དེ་བཞིན་ད་ལྟའི་ཆར་གལ་གནད་ཆེ་ཤོས་ཤིག་ཡིན་པ་ལྟར། ༸གོང་ས་༧སྐྱབས་མགོན་ཆེན་པོ་མཆོག་གིས་དེའི་སྐོར་ལམ་སྟོན་བཀའ་སློབ་སྔ་རྗེས་ཕེབས་པ་དང༌། དེ་མཚུངས་བོད་མིའི་སྒྲིག་འཛུགས་ནས་ཀྱང་སྲིད་བྱུས་གཏན་འབེབས་གནང་ཡོད་སྟབས། ལས་དོན་དེའི་ཐད་བོད་རིགས་སྤྱི་མཐུན་ཚོགས་པ་ཚང་མས་འབད་བརྩོན་མུ་མཐུད་གནང་རྒྱུ་དང༌། ལས་དོན་དེ་དང་འབྲེལ་ལམ་སྟོན་དང་ཡིག་ཆ་སོགས་ཇི་དགོས་སྐབས་མཚམས་སོ་སོར་སྤྱི་མཐུན་ཚོགས་པ་ཁག་ནས་སྐུ་ཚབ་དོན་གཅོད་ལས་ཁུངས་སུ་ཐད་ཀར་འབྲེལ་གཏུག་ཞུ་རྒྱུ།
གྲོས་གཞི་དོན་ཚན་ལྔ་པ།
གོང་གསལ་གྲོས་གཞི་ཁག་ནང་མ་ཚུད་པའི་གནད་དོན་གཞན་ཁག་གི་ཐོག་གོ་བསྡུར་སྦྱངས་བཤད་ཞུ་རྒྱུ།
གྲོས་ཆོད་དང་པོ།
སྤྱི་མཐུན་ཚོགས་པ་ཚང་མར་དྭང་བླང་དཔྱ་ཁྲལ་ལག་དེབ་དང་འབྲེལ་བའི་སྐོར་དཀའ་ངལ་དང་བསམ་ཚུལ་ཤུགས་ཆེ་ཡོད་པར་སོང༌། དོན་གནད་འདི་དག་གལ་ཆེར་རྩིས་ཏེ་རིང་མིན་ཕྱིན་ཟླ་ ༨ པའི་ནང་དཔལ་འབྱོར་བཀའ་བློན་མཆོག་བྱང་ཨ་རི་ཁུལ་དུ་ས་གནས་སྤྱི་མཐུན་ཚོགས་པ་ཡོད་སའི་ས་གནས་ཁག་གཅིག་ལ་འཚམས་གཟིགས་ཕེབས་གཏན་འཁེལ་བ་ལྟར། འབྲེལ་ཡོད་བཀའ་བློན་མཆོག་ས་གནས་སུ་ཕེབས་སྐབས་ས་གནས་སུ་འཕྲད་པའི་དཀའ་ངལ་ཐོག་མང་ཚོགས་དང་གོ་བསྡུར་ལྷུག་པོ་ཡོང་ཐབས་སུ་འབྲེལ་ཡོད་སྤྱི་མཐུན་ཚོགས་པ་ཁག་ནས་འགན་ཁུར་ལེན་རྒྱུ།
གྲོས་ཆོད་གཉིས་པ།
དོད་རྒྱལ་བསྟེན་གསོལ་སྐོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མང་ཚོགས་ལ་བླང་དོར་བཀའ་སློབ་སྔ་རྗེས་ཕེབས་པ་མ་ཟད། བོད་མིའི་སྒྲིག་འཛུགས་ནས་ཀྱང་སྲིད་བྱུས་ལམ་སྟོན་གསལ་པོ་གནང་ཡོད་པ་ལྟར། གཞིས་ལུས་བོད་མི་ཕལ་མོ་ཆེས་༸གོང་ས་མཆོག་གི་བཀའ་སློབ་སྔ་རྗེས་དང་བོད་མིའི་སྒྲིག་འཛུགས་ཀྱི་སྲིད་བྱུས་ལམ་སྟོན་ལྟར་ཤར་བསྐྱོད་བྱས་དང་བྱེད་མུས་དེ་ལྟར་ལགས་ཀྱང༌། ད་དུང་ཡང་མང་ཚོགས་ནས་གནད་དོན་གལ་ཆེ་དེའི་ཐོག་ལྷོད་ཡང་དང་འཐུས་ཤོར་མི་འབྱུང་བའི་ཆེད་ས་གནས་སྤྱི་མཐུན་ཚོགས་པའི་རྒྱུན་ལས་རྣམ་པས་མང་ཚོགས་ལ་ཡང་ཡང་དྲན་སྐུལ་ཞུ་རྒྱུ་དང༌། དེ་མཚུངས་རྒྱ་ནག་གཞུང་ནས་དོད་རྒྱལ་བསྟེན་གསོལ་བྱེད་མཁན་ཚོ་བེད་སྤྱོད་ཀྱིས་བོད་མིའི་རྩ་དོན་ལ་གནོད་གཞིའི་ལས་འཆར་མུ་མཐུད་སྤེལ་དང་སྤེལ་མུས་ཀྱི་གནས་ཚུལ་རྣམས་བོད་མི་མང་ཚོགས་ནས་ཤེས་རྟོགས་ཐུབ་ཐབས་སུ་སྤྱི་མཐུན་ཚོགས་པ་ཁག་གིས་མང་ཚོགས་ལ་དུས་ནས་དུས་སུ་གནས་ཚུལ་གསལ་བཀྲོལ་གནང་རྒྱུ།
གྲོས་ཆོད་གསུམ་པ།
བཀའ་བློན་ཁྲི་པ་མཆོག་གིས་ཚོགས་འདུའི་དབུ་འབྱེད་གསུང་བཤད་གནང་བའི་ཁོངས་སུ་བོད་མིའི་ཤེས་ཡོན་ཡར་རྒྱས་གཏོང་རྒྱུར་དམིགས་ཏེ་མ་འཛུགས་ལས་གཞི་དང༌། དེ་འབྲེལ་བོད་རིགས་སྤྱི་མཐུན་པ་ཚོགས་པ་དང་རྒྱ་གར་བལ་ཡུལ་ནང་ཡོད་པའི་གཞིས་ཆགས་ཉམ་ཐག་རིགས་དབར་ཕན་ཚུན་རོགས་རེ་བྱ་རྒྱུའི་ལས་འཆར་ངོ་སྤྲོད་གནང་བ་ལྟར། བོད་རིགས་སྤྱི་མཐུན་ཚོགས་པ་ཁག་ནས་གཞི་རྩའི་ལས་འཆར་དེ་གཉིས་ལ་མོས་མཐུན་རྒྱབ་སྐྱོར་ཞུ་རྒྱུ་དང༌། སླད་ལས་འཆར་དེ་གཉིས་ཚགས་ཚུད་འབྱུང་སླད་གཞོགས་འདེགས་གང་ཐུབ་ཞུ་རྒྱུ།
གྲོས་ཆོད་བཞི་པ།
བོད་རིགས་ན་གཞོན་ཚོས་བོད་ཀྱི་ཆོས་དང་རིག་གཞུང༌། མི་རིགས་ཀྱི་ངོ་བོ་བཅས་ཀྱི་སྐོར་གོ་རྟོགས་འཕེལ་ཐབས་ཀྱི་ལས་འཆར་གྱི་ཆ་ཤས་སུ་བོད་རིགས་ན་གཞོན་རང་ངོས་ནས་མ་བསྐུལ་དང་བླངས་ཀྱིས་ན་གཞོན་ཚོའི་བསམ་བློ་དང་གོ་རྟོགས་གནས་བབས་ལ་གཞིགས་པའི་བགྲོ་གླེང་བྱེད་སའི་གླེང་སྟེགས་གསར་འཛུགས་ཀྱི་ལས་གཞིར་རྒྱབ་སྐྱོར་དང་གླེང་སྟེགས་དེ་རིགས་དོན་ཕན་ལྡན་པ་ཡོང་ཆེད་སྤྱི་མཐུན་ཚོགས་པ་ཁག་ནས་གཞོགས་འདེགས་གནང་རྒྱུ་བཅས་ཀྱི་གྲོས་ཆོད་དུ།
ཕྱི་ལོ་ ༢༠༡༢ ཟླ་ ༧ ཚེས་ ༢༢ ལ།
