༢༠༡༢ ཟླ་ ༧ ཚེས་ ༢༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༡༩ དགོང་དྲོ་ཨ་རིའི་རྒྱལ་སའི་མངའ་ཁུལ་ས་གནས་བོད་རིགས་སྤྱི་མཐུན་ཚོགས་པས་བཀའ་བློན་ཁྲི་པ་བློ་བཟང་སེང་གེ་མཆོག་ལ་ཕེབས་བསུའི་སྣེ་ལེན་གྱི་གསོལ་སྟོན་བཤམས་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཐོག་མར་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོས་བཀའ་ཁྲི་མཆོག་ལ་ས་གནས་བོད་རིགས་ཡོངས་ཀྱི་ཚབ་ཞུས་ཏེ་ཕེབས་བསུའི་འཚམས་འདྲི་ཞུས་ཡོད། དེ་རྗེས་ས་གནས་བོད་རིགས་སློབ་ཕྲུག་ཚོས་བོད་དང་ཨ་རིའི་རྒྱལ་གླུ་བཏང་།
དེ་ནས་བཀའ་ཁྲི་མཆོག་གིས་གིས་དེར་འདུས་མི་མང་རྣམས་ལ་གསུང་བཤད་གནང་དོན། དེ་རིང་འདི་གར་ཕེབས་པའི་རྣམ་པ་ཚང་མར་འཚམས་འདྲི་དང་ཐུགས་རྗེ་ཆེ་ཞུ་རྒྱུ་ཡིན། ངས་བཀའ་བློན་ཁྲི་པའི་འགན་ཁུར་བླངས་ཏེ་ཤེས་ཡོན་ཐོག་ཡར་རྒྱས་སྔར་ལྷག་གཏོང་རྒྱུའི་འབད་བརྩོན་བྱས་དང་བྱེད་མུས་ཡིན། དེ་བཞིན་ང་ཚོས་ལས་གཞི་འདྲ་མིན་སྣ་ཚོགས་ཤིག་སྤེལ་བཞིན་ཡོད་པའི་ཁོངས་ནས་ཤེས་ཡོན་ཡར་རྒྱས་གཏོང་རྒྱུ་དེ་གལ་ཆེན་བཟུང་དང་འཛིན་བཞིན་ཡིན། ཤེས་ཡོན་ཡར་རྒྱས་གཏོང་རྒྱུར་འགྲོ་སོང་གཏོང་རྒྱུ་ཞིག་དགོས་ཀྱི་ཡོད། དེར་བརྟེན་ད་རེས་ཨ་རིའི་སྲིད་གཞུང་ནས་ང་ཚོར་རོགས་སྐྱོར་རག་གི་ཡོད་པ་དེ་དག་ཤེས་ཡོན་ཐོག་འགྲོ་སོང་གཏོང་རྒྱུར་ཕན་ཐོགས་ཡོང་གི་རེད་སྙམ་གྱི་འདུག དེ་སྔོན་འདི་གར་ཡོང་སྐབས་གྲོས་ཚོགས་ཀྱི་གནད་ཡོད་འཐུས་མི་ཚོ་དང་ཐུག་འཕྲད་བྱེད་རྒྱུ་བྱུང་།
ད་རེས་ང་རང་འདི་གར་ཡོང་དགོས་དོན་ནི་ཆེད་མངགས་ཨ་རིའི་འཛིན་སྐྱོང་དང་གཞུང་ནང་ཡོད་པའི་གནད་ཡོད་མི་སྣ་ཚོ་དང་ལྷན་ཐུག་འཕྲད་བྱུང་ན། ད་རེས་ཙམ་མ་ཡིན་པར་མ་འོངས་པར་བཀའ་བློན་ཁྲི་པ་སུ་ཞིག་ཕེབས་ཀྱང་འགྲོ་ལམ་ཞིག་བཟོ་ཐུབ་ན་བསམས་པའི་རེ་བ་བྱས་ཏེ་གསར་འགྱུར་བརྒྱུད་ལམ་ཁག་ཐུག་འཕྲད་བྱ་རྒྱུ་ཉུང་ཙམ་བྱས་ཏེ། འཛིན་སྐྱོང་དང་ཐད་ཀར་འབྲེལ་བ་བྱུང་ན་བསམས་པའི་རེ་བ་བྱས་པ་ལྟར་ད་ལྟ་བར་ཧ་ཅང་ཡག་པོ་བྱུང་། དེའི་གནད་འགག་ནི་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་སུ་རྫོགས་པར་གསོལ་རས་སྩལ་རྗེས་ཆབ་སྲིད་ཀྱི་འགན་ཁུར་ཡོད་པའི་མི་སྣ་ཞིག་དང་ལྷན་ཐད་ཀར་འབྲེལ་བ་བྱེད་སྐབས་ཆབ་སྲིད་ཆགས་ཀྱི་ཡོད། ཅེས་སོགས་ཀྱི་གསུང་བཤད་གནང་སྟེ་མང་ཚོགས་ཀྱི་དྲི་བར་ལན་འདེབས་གནང་ཡོད་པ་བཅས། །
