༢༠༡༢ ཟླ་ ༧ ཚེས་ ༢༤ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༣ །༢༤ བཅས་ཉིན་གཉིས་རིང་ཨ་རིའི་རྒྱལ་ས་ཝ་ཤིང་ཊོན་དུ་ཨ་རི་དང་རྒྱ་ནག་དབར་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་གྲོས་མོལ་ལྷན་ཚོགས་སྐབས་ཨ་རིའི་གཞུང་གིས་བོད་ནང་རང་ལུས་མེར་སྲེག་བཏང་བའི་སྐོར་དང་བོད་མི་ཆབ་སྲིད་བཙོན་པ་ཁག་གཅིག་གི་གནས་སྟངས་སྐོར་བགྲོ་གླེང་གནང་ཡོད་པ་རྒྱལ་སྤྱིའི་བོད་དོན་ལས་འགུལ་ཁང་ (ICT)གི་ཚོགས་གཙོ་ལྕམ་སྐུ་མེ་རི་བྷེ་ཐི་མར་ཀེ་མཆོག་ (Mary Beth Markey) གིས་གསུངས་ཡོད། ཡུལ་གཉིས་ཀྱི་དབར་སྔ་ལོའི་འགྲོ་བ་མིའི་ཐོབ་ཐང་གི་ལོ་འཁོར་ལྷན་ཚོགས་དེ་རྒྱ་ནག་རྒྱལ་ས་པེ་ཅིང་དུ་ཕྱི་ལོ་ ༢༠༡༡ ཟླ་ ༤ ནང་ཚོགས་ཡོད། རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་ཕྱི་སྲིད་ལས་ཁུངས་ལ་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་དང་བོད་མིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱས་དང་བྱེད་བཞིན་པའི་སྐོར། དེ་བཞིན་རྒྱ་ནག་གཞུང་གིས་བོད་མི་ཚོར་དམ་བསྒྲགས་ཅན་གྱི་སྲིད་བྱུས་མུ་མཐུད་ལག་བསྟར་བྱེད་བཞིན་པར་བརྟེན་གནས་སྟངས་དེ་བས་ཛ་དྲག་ཏུ་ཕྱིན་ཏེ་རང་ལུས་མེར་སྲེག་ལྟ་བུའི་ལས་འགུལ་ད་དུང་ཇེ་མང་དུ་འགྲོ་རྒྱུའི་ཉེན་ཁ་ཡོད་སྐོར་སོགས་ཞིབ་ཕྲ་གསལ་བཤད་གནང་ཡོད།
གནད་དོན་དེ་དང་འབྲེལ་ནས་ཚོགས་གཙོ་ལྕམ་སྐུ་མཆོག་གིས་གསུང་དོན། རྒྱ་ནག་གཞུང་གིས་འཛམ་གླིང་མཉམ་འབྲེལ་རྒྱལ་ཚོགས་སུ་སི་རི་ཡའི་གྲོས་ཆོད་ Syria ཐོག་དམིགས་བསལ་འགོག་དབང་ (Veto) བེད་སྤྱོད་བཏང་སྟེ་གྲོས་ཆོད་ལམ་ལྷོང་མ་བཏང་བའི་བྱ་སྤྱོད་དེ་ནི་ངོ་ཚ་དགོས་པ་ཞིག་རེད་ཅེས་སྐྱོན་བརྗོད་ཤུགས་ཆེ་བྱས་ཡོད། དེར་བརྟེན་ཐེངས་འདིར་ཨར་རྒྱ་གཉིས་ལྷན་ཚོགས་སྐབས་ཨ་རིའི་གཞུང་ནས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་སྐྱོན་བརྗོད་ཐེར་འདོན་བྱེད་ཤུགས་ཆུང་དྲགས་རྒྱུ་མེད། བོད་ནང་དམ་བསྒྲགས་ཅན་གྱི་སྲིད་བྱུས་ཀྱི་འགན་ཡོངས་རྫོགས་རྒྱ་ནག་སྲིད་གཞུང་ལ་ཡོད། ཨ་རིའི་ནང་སྲིད་ལས་ཁུངས་ཀྱིས་ཐེངས་འདིའི་རྒྱ་ནག་དང་ལྷན་གྲོས་མོལ་དེ་བཞིན་རྒྱུན་ལྡན་ཞིག་མིན་པའི་ཐོག་ནས་རྒྱ་ནག་དང་འབྲེལ་ལམ་བཟང་དུ་གཏོང་དགོས་པ་མ་ཟད། ཨ་རིའི་གཞུང་ཕྱོགས་ནས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་གི་གནས་སྟངས་ཐོག་ཡར་རྒྱས་གཏོང་དགོས་པའི་གནད་དོན་རྣམས་ཇི་ཡིན་གསལ་པོར་ར་སྤྲོད་བྱ་རྒྱུ་མ་ཟད། གལ་ཏེ་རྒྱ་ནག་གཞུང་གིས་ཨ་རིའི་དགོས་འདུན་དེ་དག་ལ་ཉན་འཇོག་མ་བྱས་ཚེ་ཨ་རིའི་གཞུང་གིས་ཡར་ལན་ཇི་འདྲ་ཞིག་སྤྲོད་རྒྱུ་ཡིན་མིན་ཁ་གསལ་བརྗོད་དགོས། ཞེས་གསུངས་ཡོད་པ་བཅས།།