༢༠༡༢ ཟླ་ ༧ ཚེས་ ༢༧ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༢༣། ༢༤ བཅས་ ཉིན་གཉིས་རིང་ཨ་རི་དང་རྒྱ་ནག་དབར་འགྲོ་བ་མིའི་ཐོབ་ཐང་གི་ལོ་འཁོར་ལྷན་ཚོགས་སྐབས་ཨ་རིའི་གཞུང་གིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པར་བརྟེན། རྒྱ་ནག་ནང་ཆབ་སྲིད་བཅོས་བསྒྱུར་གཏོང་དགོས་པའི་དུས་ལ་བབ་ཡོད་སྐོར་བསམ་ཚུལ་བཏོན་ཡོད། དེ་ཡང་ཕྱི་ཚེས་ ༢༥ ཉིན་ཨ་རིའི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་ལས་ཁུངས་ཀྱི་དྲུང་ཆེ་ལས་རོགས་སྐུ་ཞབས་པོ་སི་ནར་ (Michael Posner) ལགས་ཀྱིས་ཨར་རྒྱའི་འགྲོ་བ་མིའི་ཐོབ་ཐང་གི་ལོ་འཁོར་ལྷན་ཚོགས་སྐོར་་གསར་འགོད་ལྷན་ཚོགས་ཤིག་སྐབས་གསུང་དོན།
རྒྱ་ནག་སྤྱི་ཡོངས་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་འདུག ལྷན་ཚོགས་སྐབས་ང་ཚོས་རྒྱ་ནག་གཞུང་ལ་རྒྱ་ནག་ནང་དེང་སྐབས་དཔལ་འབྱོར་གྱི་གནས་སྟངས་ཡར་རྒྱས་ཕྱིན་ཡོད། ད་ཆ་མི་མང་ཚོར་འཇིགས་སྣང་མེད་པའི་ཐོག་ནས་གཞུང་ལ་སྐྱོན་བརྗོད་བྱ་རྒྱུ་དང་གཞུང་གི་སྲིད་བྱུས་ལ་མི་སྒེར་གྱི་བསམ་ཚུལ་འདོན་རྒྱུའི་རང་དབང་སྤྲོད་དགོས་པའི་དུས་ལ་བབ་ཡོད་ཅེས་བརྗོད་པ་ཡིན། ཞེས་གསར་འགོད་པར་འགྲེལ་བརྗོད་གནང་ཡོད།
དེ་བཞིན་ཁོང་གིས་མུ་མཐུད་གསུང་དོན། འཛམ་གླིང་མི་མང་གཞན་དང་གཅིག་མཚུངས་རྒྱ་ནག་མི་མང་ལའང་ཆེ་མཐོང་དགོས་ཀྱི་ཡོད། དེའི་གོ་དོན་ནི་ཁོང་ཚོར་དཔལ་འབྱོར་གྱི་ཁེ་ཕན་དང་ལས་ཀའི་གོ་སྐབས་ཐོབ་རྒྱུ་ཙམ་མིན་པར་རང་གི་དངོས་ཡོད་དཀའ་ངལ་རྣམས་ལ་ཡུལ་ཁྲིམས་ཀྱིས་སྲུང་སྐྱོབ་དགོས་པ་དང་། རྒྱལ་ཁབ་ཀྱི་ཆབ་སྲིད་ཁ་ཕྱོགས་ཇི་འདྲ་ཞིག་ལ་བསྒྱུར་རྒྱུའི་ཐག་གཅོད་ཀྱི་དབང་ཆ་སྤྲོད་དགོས་པ་དེ་ཡིན་ཞེས་གསུངས།
ལྷག་པར་ལྷན་ཚོགས་སྐབས་ཕྱོགས་གཉིས་ཀས་ཡུ་གུར་དང་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་སྐོར་བགྲོ་གླེང་ལྷུག་པོ་བྱུང་བ་མ་ཟད། ཨ་རིའི་ངོས་ནས་ད་ལྟའི་བོད་ནང་རང་ལུས་མེར་སྲེག་གི་དོན་རྐྱེན་ཐོག་བློ་འཚབ་ཆེན་པོ་ཡོད་སྐོར་ཡང་རྒྱ་ནག་གཞུང་ལ་བརྗོད་ཡོད་སྐོར་ཁོང་གིས་གསུངས་ཡོད་པ་བཅས།།
