༢༠༡༢ ཟླ་ ༧ ཚེས་ ༧ རེས་གཟའ་སྤེན་པ།
༄༅། །བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དགུང་གྲངས་ ༧༧ ལ་ཕེབས་པའི་མཛད་སྒོར་ངས་ཧི་མ་ཅལ་མངའ་སྡེའི་བློན་ཆེན་མཆོག་དང་ཧི་མ་ཅལ་མི་མང་གི་ཚབ་ཞུས་ཏེ་སྐུ་ཉིད་མཆོག་སྐུ་ཚེ་བསྐལ་བརྒྱར་བརྟན་པའི་དཀོན་མཆོག་ལ་གསོལ་འདེབས་ཞུ་རྒྱུ་ཡིན། དེ་རིང་གི་ཉི་མོ་འདི་ནི་ལོ་རྒྱུས་ལྡན་པ་ཞིག་རེད། ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་༸གོང་ས་ཏཱ་ལའི་བླ་མ་མཆོག་བོད་ཀྱི་ཞིང་པའི་ཁྱིམ་ཚང་ཞིག་ཏུ་སྐུ་འཁྲུངས། ངས་ཤེས་ཚོད་ལྟར་ན། ༸གོང་ས་ཏཱ་ལའི་བླ་མ་མཆོག་སྐུ་མ་འཁྲུངས་བའི་ཉིན་ཤས་གོང་ཁོང་གི་ཡབ་བསྙུང་གཞི་དྲག་པོ་བཞེས་ནས་སྨན་དཔྱད་གང་གིས་ཀྱང་ཕན་མེད། འོན་ཀྱང་ཁྱིམ་དེར་སྐུ་ཉིད་མཆོག་སྐུ་འཁྲུངས་སྟབས་ཡབ་ནད་མནར་ལས་གྲོལ་ཏེ་འཛམ་གླིང་ནང་ཞི་བདེའི་ཉི་མ་འཆར་འགོ་ཚུགས་ཡོད། དེ་ནས་༸གོང་ས་ཏཱ་ལའི་བླ་མ་མཆོག་སྐུ་ཕྲེང་བཅུ་བཞི་པར་ངོས་འཛིན་གནང་ཡོད། ༸གོང་ས་ཏཱ་ལའི་བླ་མ་མཆོག་གི་འཁྲུངས་ཡུལ་ནི་བོད་ཡིན་ཡང་མཛད་འཕྲིན་བསྐྱངས་ཡུལ་སྤྱིར་རྒྱ་གར་རྡ་ས་དང་ཡང་སྒོས་ཕྱི་རྒྱལ་ཡུལ་གྲུ་ཁག་ཡིན། སྐུ་ཉིད་མཆོག་གི་ཐུགས་རྗེ་བཀའ་དྲིན་ལ་བརྟེན་དེང་སྐབས་རྡ་ས་འདི་འཛམ་གླིང་ནང་སྙན་གྲགས་ཅན་ཞིག་ཆགས་ཡོད། འདི་ལྟ་བུའི་བཀའ་དྲིན་ལ་ཧི་མ་ཅལ་མི་མང་དང་ངས་ཐུགས་རྗེ་བླ་ལྷག་ཏུ་ཆེ་ཞུ་རྒྱུ་ཡིན། དང་པོ་ཆོས་ཕྱོགས་ཀྱི་མཛད་འཕྲིན་བཞེས། དེ་ནས་ཆབ་སྲིད་ཀྱི་མཛད་འཕྲིན་བཞེས།
དེ་རྗེས་སེམས་སྐྱོ་དགོས་པ་ཞིག་ལ་སྐུ་ཉིད་མཆོག་དང་སྐུ་ཉིད་ཀྱི་མི་མང་བཅས་སྐྱབས་བཅོལ་དུ་ཕེབས་དགོས་བྱུང་ཡོད། སྐུ་ཉིད་མཆོག་གིས་འཛམ་གླིང་ཡུལ་གྲུ་ཁག་ཏུ་སྐུ་ངལ་འཛེམས་མེད་ཐོག་བོད་ཀྱི་ཆོས་དང་རིག་གཞུང་གོ་རྟོགས་སྤེལ་ཡོད། འཛམ་གླིང་གི་ཡུལ་གྲུ་གང་ཞིག་ཏུ་མནར་གཅོད་བྱུང་ཚེ་འཚེ་བས་ལན་འདེབས་བྱེད་ཀྱི་ཡོད། འོན་ཀྱང་༸གོང་ས་ཏཱ་ལའི་བླ་མ་མཆོག་གིས་འཚེ་བ་ལས་ལྡོག་སྟེ་ཞི་བའི་ལམ་ནས་རང་དབང་འཐབ་རྩོད་མཛད་བཞིན་ཡོད། དེར་བརྟེན་ཕྱི་ལོ་ ༡༩༨༩ ལོར་སྐུ་ཉིད་ལ་ནོ་བེལ་ཞི་བདེའི་གཟེངས་རྟགས་ཐོབ་ཡོད་པ་དེ་ནི་ཧི་མ་ཅལ་དང་རྒྱ་གར་རྒྱལ་ཡོངས་ཀྱི་གཟི་བརྗིད་རེད། ཕྱི་ལོ་ ༢༠༡༡ ལོར་༸གོང་ས་ཏཱ་ལའི་བླ་མ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་གཞོན་སྐྱེས་འགོ་ཁྲིད་ཚོར་རྩིས་སྤྲོད་མཛད་ནས་ཆོས་ཕྱོགས་ཀྱི་དབུ་ཁྲིད་ཀྱི་ངོ་བོའི་ཐོག་འཁྲུངས་སྐར་གཏོང་བ་ཐེངས་དང་པོ་དེ་ཆགས་ཡོད དེ་རིང་ནི་གཟི་བརྗིད་ཀྱི་ཉི་མ་གསར་པ་ཞིག་རེད། སྐུ་ཉིད་ཀྱི་ཐུགས་རྗེ་བཀའ་དྲིན་ནི་ཧི་མཱ་ཅལ་མི་མང་རྣམས་ནས་འབྱུང་འགྱུར་ལོ་རྒྱུས་ནང་ནམ་ཡང་བརྗེད་ཐབས་མེད་པ་ཞིག་ཡིན། ཞེས་གསུང་བཤད་གནང་ཡོད།
