༢༠༡༢ ཟླ་ ༧ ཚེས་ ༡༢ རེས་གཟའ་ཕུར་བུ།
༄༅། །འདི་གར་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཇ་མུ་ཀ་ཤི་མིར་མངའ་སྡེའི་བློན་ཆེན་ལས་ཁུངས་དང་ས་གནས་འདིར་གཞིས་ཆགས་པའི་བོད་རིགས་ཁ་ཆེའི་མཐུན་ཚོགས། བོད་རིགས་ཁ་ཆེའི་སློབ་གྲྭ་བཅས་ནས་ཇི་ལྟར་གསོལ་འདེབས་ཞུས་དོན་ལྟར་ཕྱི་ལོ་ ༢༠༡༢ ཟླ་ ༧ ཚེས་ ༡༢ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སི་རི་ན་གར་༸ཞབས་སོར་འཁོད་རྒྱུ་ཡིན་པ་དང་ཕྱི་ཚེས་ ༡༣ དང་ ༡༤ ཉིན་སི་རི་ན་གར་རྟེན་གཞི་བྱས་པའི་བོད་རིགས་ཁ་ཆེའི་གཞིས་ཆགས་ལ་གཟིགས་སྐོར་དང་བོད་རིགས་ཁ་ཆེ་རྒན་གྲས་རྣམས་ལ་མཇལ་ཁ།
དེ་མིན་ཉིན་དེའི་སྔ་དྲོ་བོད་རིགས་ཁ་ཆེའི་སློབ་གྲྭར་ཆིབས་སྒྱུར་བསྐྱང་སྟེ་བཀའ་སློབ་ཟབ་རྒྱས་སྩལ་རྒྱུའི་མཛད་འཆར་ཡོད་པར་བརྟེན། དེ་རིང་ཕྱི་ཚེས་ ༡༡ ཉིན་ནས་སློབ་གྲྭ་དེའི་ཐང་ཆེན་དང་སློབ་གྲྭའི་ཉེ་འཁོར་ཚང་མར་བྲེལ་ཟིང་ངང་གཙང་སྦྲ་བྱེད་པ་དང་དར་ཚོན་སྣ་ལྔ་དཔྱང་སྟེ་ཕེབས་བསུའི་གོ་སྒྲིག་གཟབ་རྒྱས་ཞུ་བཞིན་འདུག མཛད་སྒོ་དེར་སྐུ་མགྲོན་གཙོ་བོ་༸གོང་ས་མཆོག་དང་ཇ་མུ་ཀ་ཤི་མིར་མངའ་སྡེའི་སྤྱི་ཁྱབ་བློན་ཆེན་མཆོག མངའ་སྡེའི་ཡུལ་སྐོར་སྤྲོ་འཆམ་བློན་ཆེན་ངག་དབང་རིག་འཛིན་མཆོག མངའ་སྡེའི་ནང་སྲིད་བློན་ཆེན་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་སོགས་མཛད་སྒོར་བཅར་རྒྱུ་ཡིན་པ་མ་ཟད།
གསུང་བཤད་ཀྱང་རིམ་པས་གནང་རྒྱུ་ཡིན་འདུག བཀའ་སློབ་དང་གསུང་བཤད་གྲུབ་རྗེས་བོད་རིགས་ཁ་ཆེའི་སློབ་ཕྲུབས་རྣམས་ནས་ཕེབས་བསུའི་གཞས་སྣ་འདྲ་མིན་གཟིགས་འབུལ་ཞུ་རྒྱུ་རེད་འདུག
སྤྱིར་བོད་རིགས་ཁ་ཆེའི་སློབ་གྲྭ་འདིར་འཛིན་རིམ་དང་པོ་ནས་བཅུ་པ་བར་ཡོད་འདུག་པར་དབྱིན་ཡིག་དང་ཨུར་ཏུའི་སྐད་ཡིག ཀ་ཤི་མིར་སྐད་ཡིག བོད་ཡིག་བཅས་སློབ་ཁྲིད་གནང་བཞིན་འདུག དེ་ཡང་འཛིན་རིམ་དང་པོ་ནས་བདུན་པ་བར་བོད་ཡིག་སློབ་ཁྲིད་གནང་བཞིན་འདུག་ལ་བོད་ཡིག་སློབ་ཁྲིད་གནང་མཁན་སློབ་དགེ་གཅིག་དང་སློབ་ཕྲུག་ ༧༥ ཙམ་ཡོད་འདུག བོད་ཀྱི་སྐད་ཡིག་ནི་སྐད་ཡིག་གསུམ་པ་དེ་ཡིན་འདུག སྤྱིར་སློབ་གྲྭ་འདིར་སློབ་ཕྲུག་གྲངས་ ༥༥༠ ཡོད་འདུག་པ་དང་དགེ་ལས་གྲངས་སུམ་ཅུ་ཙམ་ཡོད་འདུག་པ་བཅས།།
