༢༠༡༢ ཟླ་ ༧ ཚེས་ ༡༡ རེསགཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༧ ཉིན་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་དང་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་བྷེལ་ཇམ་གྲོང་ཁྱེར་ཨན་ཝར་པན་ (Antwerpen)
མེ་འཁོར་འབབ་ཚུགས་སུ་ཕེབས་སྐབས་སྐུ་ཚབ་དོན་གཅོད་ལས་ཁུངས་ཀྱི་འབྲེལ་ཡོད་ཚོགས་མི་དང་ས་གནས་བོད་རིགས་མཐུན་ཚོགས་ཀྱི་ཚོགས་གཙོ། ཁུལ་དེར་རྟེན་གཞི་བྱས་པའི་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་རྣམ་པས་ཕེབས་བསུ་གཟབ་རྒྱས་ཞུས་ཡོད།
དེ་རྗེས་ས་གནས་བོད་མི་ཚོས་༸གོང་ས་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོ་སྲུང་བརྩི་ཞུ་སའི་ས་གནས་སུ་ཕེབས་ཏེ་མཛད་སྒོར་དབུ་བཞུགས་ཐོག་བཀའ་ཤག་གི་འཚམས་འདྲི་ཞུས་པ་དང་ཆབས་ཅིག ད་ལྟའི་བོད་ནང་གི་ཛ་དྲག་གནས་སྟངས་སྐོར་དང་བྷེལ་ཇམ་ནང་གནས་སྡོད་བོད་རིགས་སྤྱི་མཐུན་ཚོགས་པས་འབད་བརྩོན་འོག་བོད་མི་རྣམས་ཆིག་སྒྲིལ་ངང་རང་གི་ཐུན་མིན་རིག་གཞུང་དང་ངོ་བོ་སྲུང་སྐྱོབ་གནང་དང་གནང་མུས་ཡིན་པ་དེར་བསྔགས་བརྗོད་ཞུས་པ་དང་སྦྲགས། སླད་ཀྱང་བོད་རིགས་ནང་ཁུལ་མཐུན་སྒྲིལ་རྡོག་རྩ་ཆིག་སྒྲིལ་ངང་གནས་ཏེ་བོད་མིའི་བདེན་པའི་འཐབ་རྩོད་ཐོག་སྔར་ལྷག་འབད་བརྩོན་གནང་དགོས་པ་ནི་དུས་ཀྱི་དགོས་མཁོ་ཞིག་ཆགས་ཡོད་པ་ནན་བརྗོད་གནང་ཡོད། ཕྱོགས་མཚུངས་བཀའ་བློན་མཆོག་གིས་སྐབས་དེར་བོད་དོན་རྒྱབ་སྐྱོར་བ་བྷེལ་ཇམ་མི་མང་ཁག་གཅིག་མཉམ་ཞུགས་གནང་བ་རྣམས་ལ་བོད་མི་ཚོའི་བདེན་པའི་འཐབ་རྩོད་ལ་ལྷག་བསམ་གཡོ་མེད་ཀྱིས་རྒྱབ་སྐྱོར་གནང་བར་བཀའ་ཤག་གི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུས་ཡོད།
གཞན་ཡང་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་འདས་པའི་ལོ་མང་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཡང་དག་པའི་དབུ་ཁྲིད་ལམ་སྟོན་འོག་བོད་མི་ཙམ་མ་ཟད། འཇིག་རྟེན་སྐྱེ་འགྲོ་ཡོངས་ལ་བྱམས་བརྩེ་དང་བཟོད་བསྲན། འཚེ་བ་མེད་པ་སོགས་འགྲོ་བ་མིའི་ནང་གི་བཟང་སྤྱོད་དང་འབྲེལ་བའི་རིན་ཐང་དང། ཆོས་ལུགས་ཕན་ཚུན་མཐུན་སྒྲིལ་གོང་མཐོར་གཏོང་ཐབས་ཀྱི་མཛད་བཟང། ལྷག་པར་བོད་མིའི་མང་གཙོའི་སྒྲིག་འཛུགས་སྲ་བརྟན་ཐོག་རྒྱལ་སྤྱིའི་ནང་དེང་སྐབས་བོད་མིའི་བདེན་པའི་འཐབ་རྩོད་ལ་རྒྱབ་སྐྱོར་ཧ་ཅང་ཚད་མཐོན་པོར་སོན་པའི་མཛད་རྗེས་ལ་ཡི་རང་བསྔགས་བརྗོད་ཞུས་ཡོད། མཛད་སྒོའི་སྐབས་གཞིས་བྱེས་བོད་མི་དཔའ་བོ་དཔའ་མོ་རྣམས་ཀྱིས་བོད་མི་རིགས་ཀྱི་ཆེད་རང་སྲོག་བློས་བཏང་གནང་བར་རྗེས་དྲན་ཆེད་སྐར་མ་གཅིག་རིང་ངག་བཅད་ཞུས་ཡོད། མི་གྲངས་ ༨༠༠ ལྷག་འདུ་འཛོམས་བྱུང་བའི་མཛད་སྒོའི་སྐབས་སེ་ར་བླ་སྤྱིའི་དགེ་འདུན་པ་ཁག་གཅིག་གིས་༸རྒྱལ་བའི་ཞབས་བརྟན་གསུང་འདོན་གནང་བ་དང་འཆམ་འཁྲབ་སྟོན་གནང། དེ་བཞིན་བོད་མི་ཁག་གཅིག་གིས་ནང་མ་སྟོད་གཞས་སོགས་གཞས་སྣ་འདྲ་མིན་ཁག་གཅིག་ཀྱང་འཁྲབ་སྟོན་གནང་བར་མང་ཚོགས་རྣམས་དགའ་ཚོར་ཆེན་པོ་བྱུང་ཡོད།
ཕྱི་ཚེས་ ༨ ཉིན་བདེ་སྲུང་བཀའ་བློན་མཆོག་སྐུ་ཚབ་དོན་ཁང་དང་བྷེལ་ཇམ་བོད་རིགས་སྤྱི་མཐུན་ཚོགས་པ་ཐུན་མོང་འོག་གོ་སྒྲིག་ཞུས་པའི་བོད་མིའི་རིག་གཞུང་གི་རྣམ་པ་འགྲེམས་སྟོན་ཆེད་རྒྱལ་ས་བྷར་སེལ་ Brussels གྱི་མིན་ནེ་ཀན་པི་སི་ Menneken Pis ཞེས་པ་ནས་རྒྱལ་སའི་གཞུང་ལམ་དུ་གོམ་འགྲོས་གནང་བཞིན་ཐོག་གཞས་སྣ་འཁྲབ་སྟོན་ཞུས་ཡོད། སྐབས་དེར་བོད་མི་ཙམ་མ་ཟད་བྷེལ་ཇམ་བོད་དོན་རྒྱབ་སྐྱོར་བ་མང་པོས་གཞུང་ལམ་གཡས་གཡོན་དུ་ཕྱི་རྒྱལ་ཡུལ་སྐོར་སྤྲོ་འཆམ་པ་དང་ས་གནས་ཡུལ་མི་དང་སློབ་ཕྲུག སོགས་ལ་༸གོང་ས་མཆོག་གི་མཛད་རྣམ་ཕྱོགས་སྒྲིག་ཞུས་པའི་དེབ་ཆུང་འགྲེམས་སྤེལ་གནང་ཡོད་པ་མ་ཟད། གོམ་འགྲོས་ལེགས་པར་མཇུག་སྒྲིལ་མཚམས་མང་ཚོགས་རྣམས་གྷ་རན་ཕོ་བྲང་ Grand Palace དུ་འཛོམས་ཏེ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་བཀའ་ཤག་གི་གསུང་བཤད་སྒྲོགས་སྦྱང་གནང། དེ་བཞིན་བྷེལ་ཇམ་གྲོས་ཚོགས་འཐུས་མི་སྐུ་ཞབས་ཨེ་ཌི་ཝ་ཌི་མེཀ་མི་ལན་སི་ཀོ་ཌི་ Edward Mcmillan Scott མཆོག་དང་། ལག་སིམ་བྷག་བོད་ཀྱི་གྲོགས་པོའི་མཐུན་ཚོགས་ཀྱི་ཚོགས་གཙོ། Luxembourg friends of Tibet ལྕམ་སྐུ་མོ་ནིཀ་ Ms Monique མཆོག བྷེལ་ཇམ་བོད་རིགས་མཛའ་འབྲེལ་ཚོགས་པའི་ཚོགས་གཙོ་ལྕམ་སྐུ་ཨིན་ཇི་ཧར་མན་ Ms Inge Hermans ལགས་བཅས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་ཡོད་པ་མ་ཟད། བྷེལ་ཇམ་ས་གནས་བོད་རིག་དང་སློབ་ཕྲུག་ཚོས་གཞས་སྣ་འཁྲབ་སྟོན་ཞུས་ཡོད།
དེ་བཞིན་བདེ་སྲུང་བཀའ་བློན་མཆོག་ཕྱི་ཚེས་ ༡༡ ཉིན་སྐུ་ཚབ་དོན་ཁང་གིས་གོ་སྒྲིག་འོག་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོར་དམིགས་བསལ་སྐུ་མགྲོན་དུ་ཕེབས་ཡོད། སྐབས་དེར་ཡུ་རོབ་སྤྱི་མཐུན་ཚོགས་པ་དང་ཕྱི་རྒྱལ་གཞུང་ཚབ་ཁག གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་འཐུས་མི་བཅས་ཁྱོན་སྐུ་མགྲོན་ ༡༥༠ བརྒལ་བ་ལྷན་ཞུགས་གནང་ཡོད།
ཕྱི་ཚེས་ ༡༢ ཉིན་བཀའ་བློན་མཆོག་སི་པེན་ Spain དུ་ཕེབས་ཏེ་བོད་རིགས་ཚོ་དང་ལྷན་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུ་ཡིན་འདུག་པ་བཅས།།
