༢༠༡༢ ཟླ་ ༧ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༧ ཚེས་ ༦ ཉིན་འཛམ་གླིང་ཡུལ་གྲུ་གང་སར་ཡོད་པའི་བཙན་བྱོལ་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༧ ལ་ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུ་བཞིན་ཡོད་པ་ལྟར། གོང་ཚེས་ཉིན་བོད་ནང་གི་ཁམས་རྟའུ་དང་མདོ་སྨད་རྨ་ཆུ་བཅས་སུ་མགོན་པོ་གང་ཉིད་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་ཐོན་གསལ་ལྟར་ན། ཕྱི་ཟླ་ ༧ ཚེས་ ༦ ཉིན་བོད་ནང་གི་ཁམས་རྟའུ་རུ་བོད་མི་ཚོས་རྒྱ་ནག་གཞུང་གིས་རྟའུ་ས་གནས་ཀྱི་རྨ་རྒྱལ་སྦོམ་ར་ཞེས་འབོད་པའི་རི་མགོ་ཡོངས་སུ་དམག་མིའི་བསྐོར་བ་དང་ས་གནས་སུ་དམ་བསྒྲགས་ཤུགས་ཆེར་བྱས་པའི་དབང་གིས་ནམ་རྒྱུན་ལྟར་རི་རྩེར་བསངས་གསོལ་དང་ས་གནས་སུ་རྟ་རྒྱུགས་འགྲན་བསྡུར་སོགས་བྱས་ཐུབ་མེད་ཀྱང་། ཁ་སང་ཉ་མཚོ་དགོན་པའི་དགེ་འདུན་པ་དང་ས་གནས་མི་མང་གིས་དགོན་པའི་མདུན་གྱི་མཆོད་རྟེན་ཉེ་འཁྲིས་སུ་ལྷ་བསངས་བཏང་ཡོད་པ་མ་ཟད། ༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་དགོན་པར་གདན་འདྲེན་ཞུས་པ་དང་། སྐྱ་སེར་རྣམས་ནས་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་ཏེ་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་འདུག དེ་བཞིན་ཁ་སང་མདོ་སྨད་ཀན་ལྷོ་ཁུལ་རྨ་ཆུ་རྫོང་མུ་ར་ས་ཁུལ་དུའང་རྒྱ་གཞུང་གིས་དམ་བསྒྲགས་དང་ལྟ་རྟོག་བྱས་མིན་ལ་མ་ལྟོས་པར། བོད་མི་བརྒྱ་ཕྲག་བརྒལ་བ་འདུ་འཛོམས་ཀྱིས་ས་གནས་ཀྱི་རི་རྩེར་ལྷ་བསངས་བཏང་སྟེ་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་འདུག
གཞན་ཡང་གནས་ཚུལ་ཐོན་གསལ་ལྟར་ན། ད་ལྟའི་ཆར་བོད་ནང་གི་བོད་མི་ཚོས་སྔར་དང་མི་འདྲ་བར་༸གོང་ས་༸སྐྱབས་མགོན་ཆེན་པོ་མཆོག་གི་འཁྲུངས་སྐར་གྱི་ཉིན་མོར་དོ་སྣང་ཆེན་པོ་གནང་བཞིན་ཡོད་པར་བརྟེན། རྒྱལ་ས་ལྷ་སའི་གཙོས་བོད་རིགས་གནས་ཡུལ་ས་གནས་གང་སར་རྒྱ་གཞུང་གིས་དམག་མི་སྟོང་ཕྲག་མང་པོ་འགྲེམས་འཇོག་གིས་དམ་བསྒྲགས་ཤུགས་ཆེ་བྱས་དང་བྱེད་མུས་རེད། འོན་ཀྱང་ཁ་སང་ལྷ་སར་གནས་སྡོད་བོད་མི་ཚོས་སྔ་པོ་ནས་ཇོ་ཁང་མདུན་དུ་བསངས་གསོལ་གཏོང་བ་དང་མཆོད་མཇལ་སོགས་སུ་ཕྱིན་ཡོད་པ་མ་ཟད། ཁམས་དང་ཨ་མདོའི་དགོན་སྡེ་ཁག་དང་ས་གནས་ཁག་གཅིག་ཏུའང་རྣམ་པ་འདྲ་མིན་གྱི་ལམ་ནས་སྐུའི་འཁྲུངས་སྐར་སྲུང་བརྩི་ཞུས་འདུག་པ་བཅས། །