༢༠༡༢ ཟླ་ ༧ ཚེས་ ༢༦ རེས་གཟའ་ཕུར་བུ།
༄༅། །འདི་གར་ཕྱི་དྲིལ་ལས་ཁུངས་ཀྱི་ཁོར་ཡུག་ཚན་པའི་ལས་བྱེད་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༧ ཚེས་ ༢༤ ཉིན་ཕྱི་དྲིལ་ཁོར་ཡུག་ཚན་པའི་ཉམས་ཞིབ་པ་ཚེ་རིང་དོན་གྲུབ་ལགས་དང་འཇིགས་མེད་ནོར་བུ་ལགས་གཉིས་ཀྱིས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྟེན་གཞི་བྱས་པའི་སེ་ར་བླ་སྤྱིའི་ཆོས་རྭར་དགེ་འདུན་ཞལ་གྲངས་ ༦༠༠ ཙམ་འདུ་འཛོམས་ཐོག ད་ལྟའི་བོད་ཀྱི་ཁོར་ཡུག་གནས་སྟངས་སྐོར་གཏམ་བཤད་གནང་ཡོད། དགེ་འདུན་པ་མང་པོ་ཞིག་གིས་བོད་ནང་གི་འཁྱགས་རོམ་བཞུར་བཞིན་པ་དང། གཏན་ཆགས་འཁྱགས་རོམ་ཉམས་བཞིན་པ། རྩྭ་ཐང་རྩ་མེད་དུ་འགྲོ་བཞིན་པ། འབྲོག་ས་སྐྱས་སྤོས། དེ་བཞིན་གཏེར་ཁ་སྔོག་འདོན་སོགས་ཀྱི་སྐོར་ཤེས་རྟོགས་དང་འདྲ་པར་བརྒྱུད་གཟིགས་སྐབས་སེམས་འཚབ་ཆེན་པོའི་རྣམ་འགྱུར་བསྟན་ཡོད།
ཕྱི་དྲིལ་ཁོར་ཡུག་ཚན་པའི་གཏམ་བཤད་ཀྱི་ལས་རིམ་འདི་ནི་རྒྱ་གར་ནང་ཡོད་པའི་བོད་མི་སྤྱི་ཚོགས་ཁྲོད་ད་ལྟའི་བོད་ཀྱི་ཁོར་ཡུག་གནས་སྟངས་སྐོར་གོ་རྟོགས་སྤེལ་རྒྱུ་དེ་ཡིན། སྔ་ལོ་རྒྱ་གར་ནང་ཡོད་པའི་བོད་མིའི་སློབ་གྲྭ་ཁག་ནང་བོད་ཀྱི་ཁོར་ཡུག་གནས་སྟངས་སྐོར་གཏམ་བཤད་ཀྱི་ལས་རིམ་ལེགས་གྲུབ་རྗེས།
འདི་ལོ་བོད་མི་གཞིས་ཆགས་ཁག་ཏུ་ཡོད་པའི་དགོན་སྡེ་ཁག་གི་ནང་གོང་གསལ་བརྗོད་གཞིའི་ཐོག་གཏམ་བཤད་གནང་རྒྱུ་ཡིན་འདུག ལས་གཞིའི་དམིགས་ཡུལ་གཙོ་བོ་ནི་བོད་པའི་སྤྱི་ཚོགས་ནང་བོད་མཐོ་སྒང་གི་གལ་གནད་དང། འདས་པའི་ལོ་བཅུ་ཕྲག་ལྔའི་ནང་བོད་ཀྱི་ཁོར་ཡུག་གནས་སྟངས་ཧ་ཅང་ཛ་དྲག་པོ་ཆགས་ཡོད་པ་སོགས་གོ་རྟོགས་སྤེལ་ཆེད་ཡིན་སྐོར་འབྲེལ་ཡོད་ལས་བྱེད་འཇིགས་མེད་ནོར་བུ་ལགས་ཀྱིས་གསུངས་ཡོད།
དེ་བཞིན་ཁོང་གཉིས་ཀྱིས་སྦེལ་ཀོབ་གཞིས་མི་རྣམས་རྣམས་ལ་གྲོང་སྡེ་སོ་སོའི་སྤྱི་ཁང་ནང་གཏམ་བཤད་གནང་ཡོད་པ་མ་ཟད།
སྦེལ་ཀོབ་གཞིས་གྲོང་བཞི་པའི་ནང་རྟེན་གཞི་བྱས་པའི་སྔ་འགྱུར་རྙིང་མའི་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དགོན་པའི་དགེ་འདུན་ཞལ་གྲངས་ ༡༢༠༠ བརྒལ་བར་གོང་འཁོད་བརྗོད་གཞིའི་ཐོག་གཏམ་བཤད་གནང་ཡོད། གཏམ་བཤད་སྐབས་ལུགས་བསམ་ནས་ཡིན་པའི་བུ་མོ་ཞིག་གིས་ལས་གཞི་དེ་བཞིན་བོད་ཀྱི་ཁོར་ཡུག་སྐོར་གོ་རྟོགས་མེད་མཁན་བོད་མི་གཞོན་སྐྱེས་རྣམས་ལ་ཧ་ཅང་ཕན་ཐོགས་ཆེན་པོ་ཡོད་སྐོར་གསུངས་འདུག གཞན་ཡང་ཁོང་གཉིས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཧོན་སུར་དང། ཀོ་ལི་གྷལ། མོན་གྷོ་བཅས་སུའང་ཕེབས་ཏེ་གཏམ་བཤད་གནང་རྒྱུ་ཡིན་འདུག་པ་བཅས།།
