༢༠༡༢ ཟླ་ ༦ ཚེས་ ༢༢ རེས་གཟའ་པ་སངས།
༄༅། །རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་རྒྱུན་ལས་ལྷན་ཚོགས་ནས་ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་འཛམ་གླིང་གི་ས་ཕྱོགས་གང་སར་རྒྱལ་སྤྱིའི་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཉིན་མོ་སྲུང་བརྩི་ཞུ་རྒྱུ་ཡོངས་གྲགས་གནང་ཡོད་པ་ལྟར། ཧོང་ཀོང་ནང་རྟེན་གཞི་བྱས་པའི་བོད་དོན་རྒྱབ་སྐྱོར་མཉམ་སྦྲེལ་ཚོགས་པས་ཁུལ་དེར་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེའི་ལས་འགུལ་ཞིག་སྤེལ་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༦ ཚེས་ ༢༠ ཉིན་ལྕམ་སྐུ་ཤུ་ཤེ་མན་ལགས་ཀྱིས་སྣེ་ཁྲིད་འོག་བོད་དོན་རྒྱབ་སྐྱོར་བ་བཞི་བཅུ་ལྷག་ཙམ་ནས་ཧོང་ཀོང་དང་རྒྱ་ནག་མཉམ་སྦྲེལ་ལས་ཁུངས་ཀྱི་རྒྱལ་སྒོའི་མདུན་དུ་བོད་རྒྱལ་ཁབ་ཆེན་པོའི་རྒྱལ་དར་དང་བོད་ཀྱི་བདེན་དོན་ཆེད་རང་ལུས་མེར་སྲེག་གཏོང་མཁན་གྱི་རྒྱལ་གཅེས་དཔའ་བོ་ཕོ་མོ་རྣམས་ཀྱི་འདྲ་པར་སྒྲིག་ཤོམ་གྱི་ལས་འགུལ་སྤེལ་རྒྱུའི་ཐོག་མར་བོད་བསྟན་སྲིད་བདེན་དོན་ཆེད་རང་སྲོག་བློས་གཏོང་མཁན་གྱི་རྒྱལ་གཅེས་དཔའ་བོ་འདས་གསོན་ཡོངས་ལས་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ངག་བཅད་སྐར་མ་གཅིག་ཞུས་གྲུབ་མཚམས། ཁོང་རྣམ་པས་ཉིན་དེའི་ལས་འགུལ་བརྒྱུད་ནས་རྒྱ་ནག་གཞུང་ལ་དགོས་འདུན་དོན་ཚན་བཞི་བཏོན་ཡོད་པ་རྣམས་ནི། ༡༽ཧོང་ཀོང་གི་ཆབ་སྲིད་གྲོས་ཚོགས་ཀྱི་འཐུས་མི་རྣམས་ནས་གྲོས་ཚོགས་ནང་བོད་དོན་གླེང་སློང་གནང་དགོས་པ། ༢༽རྒྱ་ནག་གཞུང་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྡེ་ཚན་གྱི་མི་སྣ་བོད་ནང་གི་དངོས་ཡོད་གནས་ཚུལ་རྟོག་ཞིབ་སླད་ཆེད་གཏོང་ལ་དང་ལེན་གནང་དགོས་པ། ༣༽རྒྱ་ནག་གཞུང་ནས་བོད་ནང་གི་བོད་མིའི་ཁ་པར་དང་དྲ་རྒྱ་སོགས་ལ་དམ་བསྒྲགས་བྱས་དང་བྱེད་མུས་ཡིན་པ་དེ་དག་མཚམས་འཇོག་བྱེད་དགོས་པ། ༤༽རྒྱ་ནག་གཞུང་ནས་བོད་མི་ཆབ་སྲིད་བཙོན་པ་རྣམས་འཕྲལ་དུ་གློད་བཀྲོལ་གཏོང་དགོས། ཞེས་པའི་དགོས་འདུན་བཏོན་ཡོད་པ་བཅས། །
